Klei Aê Diê Blŭ: Y-Mathiơ 15:1-9
Êlan kliăng: “Kyuadah Aê Diê mtă leh, ‘Mpŭ bĕ kơ amĭ ama ih,’ leh anăn ‘Hlei pô blŭ jhat kơ ama amâodah amĭ, sĭt nik brei ñu djiê” (Y-Mathiơ 15:4)
Klei êmuh ksiêm mĭn: Si Klei Aê Diê Blŭ mtă brei phung anak ngă hŏng amĭ ama? Plah wah klei bhiăn aê aduôn leh anăn klei Aê Diê mtă ti klei ih srăng gưt êlâo hĭn? Si ngă drei bi êdah leh, leh anăn dôk bi êdah klei drei mpŭ kơ amĭ ama?
Mpŭ kơ amĭ ama jing Klei Bhiăn Aê Diê brei kơ phung ƀuôn sang Ñu, jih jang hlei pô gao klei bhiăn anei srăng tŭ klei bi kmhal sơăi (Bruă Lêwi 20:9; Klei Kbiă 21:17). Phung Pharisi yua klei bhiăn aê aduôn đưm čiăng mă klei soh phung ƀĭng kna Khua Yang, ƀiădah Khua Yang Yêsu lŏ wĭt lač kơ phung Pharisi leh anăn phung khua čih hră diñu pô yơh gao leh klei bhiăn Aê Diê. Khua Yang ƀuah phung Pharisi tơdah diñu mtô kơ phung ƀuôn sang: “Tơdah sa čô lač kơ ama amâodah amĭ ñu, Ya mnơ̆ng kâo dưi đru ih, kâo myơr leh kơ Aê Diê, amâo lŏ yuôm brei ñu đru amĭ ama ñu ôh.” (êlan 5). Kyua klei bhiăn diñu pô, jing klei bhiăn mnuih mjing hlăm ênuk anăn, snăn diñu yap klei Aê Diê blŭ jing hơăi mang. Diñu mtô phung ƀuôn sang lui hĕ klei rông ba amĭ ama kyua klei tŭ dưn kơ diñu pô. Khua Yang ƀuah diñu jing phung ai ngăm, hrô kơ klei ngă tui si klei Aê Diê mtă, diñu mtrŭt phung ƀuôn sang ngă tui si klei bhiăn mnuih duah mjing mă.
Mâo lu phung đăo gŏ sang ka đăo kluôm ênŭm kơ Khua Yang ôh, digơ̆ tŭ lu klei ƀuah mơ̆ng phung hlăm gŏ sang, mơ̆ng phung ti tač êngao. Arăng lač kơ digơ̆ jing phung gao klei bhiăn klei đăo gŏ sang, jing phung amâo thâo mpŭ kơ aê aduôn. Wăt srăng tuôm hŏng klei dleh dlan dưn, brei drei ăt dôk kjăp hlăm klei đăo knŏng kkuh mpŭ hjăn kơ Aê Diê đuč, êlâo hĭn gưt kơ klei Aê Diê mtă, leh anăn gưt kơ klei bhiăn gŏ sang, klei bhiăn djuê ana amâo bi klăk ôh hŏng klei đăo.
Bi kơ amĭ ama, măng ai si klei hdĭp drei jing, brei drei ăt mpŭ kơ digơ̆ hŏng jih ai tiê kyua gưt kơ klei Khua Yang mtă, khăp kơ pô mkăn msĕ si Khua Yang khăp leh kơ drei, leh anăn brei drei bi guh kơang kơ Anăn Khua Yang ti krah phung ƀuôn sang. Drei hdĭp tui si hnơ̆ng čuăn Aê Diê kyuanăn drei srăng bi êdah klei mpŭ mdê hŏng phung amâo mâo đăo, drei amâo ngă yang mbĭt hŏng diñu ôh, ƀiădah brei drei rông ba amĭ ama, đru bi mđĭ ai leh anăn hŏng jih ai tiê wah lač brei kơ amĭ ama, kơ gŏ sang. Tơdah amĭ ama djiê, drei amâo ngă pơ̆ng ôh kyuadah amĭ ama amâo lŏ thâo ƀơ̆ng ôh mnơ̆ng drei ngă yang kơ digơ̆, ƀai êjai hĭn digơ̆ amâo dưi ƀơ̆ng mnơ̆ng drei ngă yang sa thŭn knŏng sa blư̆. Ƀiădah hrô kơ klei anăn, drei srăng tui klei bi hmô jăk mơ̆ng amĭ ama, hdĭp êđăp ênang hŏng phung ayŏng amai adei hlăm gŏ sang, hŏng găp djuê, čiăng hŏng klei hdĭp drei, drei srăng bi êdah klei khăp, klei bi mtlaih kơ gŏ sang leh anăn kơ phung găp djuê. Hdơr bĕ, tơdah drei lui hĕ gŏ sang leh anăn găp djuê, hlei pô srăng hưn Anăn Khua Yang kơ digơ̆?
Hlăm hruê Mpŭ Kơ Amĭ Ama thŭn anei, ya klei drei čuăn srăng ngă čiăng bi êdah klei mpŭ kơ amĭ ama?
Wah lač: Ơ Khua Yang, lač jăk kơ Ih brei leh Klei Ih Blŭ bi hriăm kâo mpŭ kơ amĭ ama. Akâo Yang Mngăt Jăk bi hriăm leh anăn đru kâo thâo wah lač brei kơ amĭ ama leh anăn mpŭ kơ digơ̆ msĕ si klei Ih mtă leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
