Mathais 15:1-9
Nqe cim:
“Vajtswv hais tias, koj yuav tsum hwm koj niam koj txiv, thiab hais tias, yog leejtwg cem nws niam nws txiv, yuav tsum muab tus ntawd tua povtseg.” (Mathais 15:4)
Lus nug rau sawvdaws xav:
– Vajtswv Txojlus qhia kom cov menyuam yuav tsum ua li cas rau cov niam txiv?
– Tej kabke coj thiab Vajtswv txoj kevcai koj yuav ua yam twg ua ntej?
– Peb twb ua thiab tabtom qhia tshwm lub siab hwm niam txiv zoo li cas?
Hwm niam txiv yog Vajtswv Nqe Kevcai uas Nws muab rau Nws haivneeg coj, thiab txhua tus yog leejtwg ua txhaum nqe kevcai no yuav raug txim (saib Levis Kevcai 20:9; Khiavdim 21:17). Cov neeg Falixais muab tej kabke uas ibtxwm coj los hais rau Tswv Yexus cov thwjtim, tiamsis tus Tswv teb rau cov neeg Falixais thiab cov xibhwb uas qhia Vajtswv txoj kevcai hais tias lawv tsis coj raws li Vajtswv txoj kevcai. Tus Tswv cem cov Falixais thaum lawv qhia rau cov pejxeem: “Tiamsis nej qhia hais tias, yog leejtwg muaj ib yam dabtsi uas yuav pab tau nws niam nws txiv, tiamsis nws hais tias, kuv twb muab rau Vajtswv lawm.” (nqe 5). Lawv ua raws li tej lus qhia ibtxwm coj, ib tug qhia dhau ib tug los, ces yog tsis ua li Vajtswv hais. Lawv ua kom lawv tau xwb, lawv thiaj qhia kom cov pejxeem muab feemxyuam hlub niam txiv tso tseg. Tus Tswv cem lawv vim lawv yog neeg ntsejmuag ncaj siab nkhaus; twb tsimnyog ua li Vajtswv hais los lawv tseem ntxias cov pejxeem ua raws li tej kab ke uas neeg rhawv.
Cov ntseeg Yexus uas tsevneeg ntseeg Vajtswv tsis tau tas, tabtom ntsib raug tsevneeg, tebchaws tawmtsam. Lawv raug cem vim raug suav hais tias tsis coj raws li tsevneeg tej kabke coj, yog tus tsis hwm niam txiv… Txawm yog yuav ntsib tej kev sim siab, Vajtswv haivneeg yuav tsum saib txojkev ntseeg muaj nqis, tsuas pehawm Vajtswv tib leeg xwb, ua raws li Vajtswv txoj kevcai qhia ua ntej mam coj tej kab ke hauv tsev tsevneeg, thiab tebchaws yog tsis txhaum kev ntseeg.
Hais txog niam txiv yug, txawm yog yuav nyob rau lub tsamthawj twg, peb yuav tsum hwm niam txiv tas siab thiaj yog ua raws li Vajtswv txoj kevcai, rau qhov yuav tsum hlub lwm tus ib yam Vajtswv hlub peb, thiab yuav tsum ua kom Vajtswv tau ntsejmuag nyob hauv yus tsevneeg. Ua neej raws li Vajtswv tus qauv uas hwm niam txiv yog ua txawv li cov tsis ntseeg ua, tsis pe niam txiv, tiamsis ua feemxyuam yug niam txiv thaum tseem ua neej nyob, txhawb zog thiab thov Vajtswv pab rau niam txiv, tsevneeg. Thaum niam txiv tas sim neej, peb tsis teeb thaj pe, teev niam txiv, tiamsis peb ua neej nyob kawm xyaum niam txiv tus qauv zoo ua neej thiab nyob nrog kwvtij zej zog, kom dhau peb txojkev ua neej qhia tawm kev hlub, coj tau tsevneeg los ntseeg. Nco ntsoov tias, yog peb pheej txav deb tsevneeg thiab kwvtij txheebze ces leejtwg yuav yog tus uas qhia Vajtswv rau lawv!
Thov Vajtswv,
Vajtswv, nyuam yaus ua Koj tsaug vim Koj sau Koj txojlus qhia hwm niam txiv. Thov Vaj Ntsujplig qhia kom nyuam yaus niaj hnub thov Vajtswv pab thiab ua neej hwm niam txiv raws nraim li Koj txojlus qhia. Nyuam yaus tuav Yexus Khetos lub npe thov, Amees.
Ncaj rau hnub teem cia nco niam txiv txiaj ntsig xyoo no, peb yuav ua yam dabtsi kom qhia tawm hais tias peb hwm niam txiv?
Nyeem Vajluskub hauv peb lub xyoo: Yaxayas 5
Kênh Youtube BHKTHN:
