Klei Aê Diê Blŭ: Klei Mphŭn Dơ̆ng 11:10-32
Êlan kliăng: “Ih jing Yêhôwa Aê Diê, pô ruah leh Y-Abram leh anăn atăt ñu kbiă mơ̆ng ƀuôn Ur hlăm čar Kaldê leh anăn bi anăn ñu Y-Abraham” (Y-Nêhêmi 9:7)
Klei êmuh ksiêm mĭn: Ti anôk yuôm năng mđing hlăm hră čih anăn găp djuê anei? Y-Abram kkiêng mơ̆ng si gŏ sang jing? Si ngă hdră Aê Diê bi êdah mơ̆ng trăn Klei Aê Diê Blŭ anei?
Trăn Klei Aê Diê Blŭ anei čih wĭt kơ anăn phung anak čô Y-Nôê mơ̆ng ênuk Y-Sem truh kơ ênuk Y-Abram, lŏ čuê kơ klei hƀuê ênuk anak mnuih mơ̆ng ênuk aê phŭn Y-Ađam truh kơ ênuk Y-Nôê msĕ si čih leh hlăm kdrêč 5. Leh mnuih lĕ hlăm klei soh leh anăn tŭ klei bi kmhal, Aê Diê ƀuăn leh sa čô hlăm phung anak čô mniê srăng dưi hŏng Satan (Klei Mphŭn Dơ̆ng 3:15), leh anăn klei ƀuăn anăn ƀrư̆ hruê dơ̆ng bi sĭt hĭn tơdah drei ƀuh Y-Abram mŭt hlăm klei yăl dliê. Boh sĭt gơ̆, hlăm hră čih anăn găp djuê anei, êngao kơ Y-Sem jing anak êkei Y-Nôê, leh anăn Y-Abram jing aê phŭn kơ phung Israel, jih jang anăn phung mkăn jing anăn ka tuôm hmư̆ ôh hŏng phung dlăng Klei Aê Diê Blŭ. Jih jang anăn phung êgar leh anăn amâo mâo klei hing ang anăn lŏ bi ktuê klei Aê Diê ƀuăn mơ̆ng ênuk anei kơ ênuk êdei, čiăng kơ hdră Aê Diê ăt dôk nanao hlăm jih jang ênuk.
Hră anăn găp djuê prŏng mơ̆ng “phung anak čô Y-Sem” (êlan 10) bi hrŏ ƀrư̆ ƀrư̆ jing “phung anak čô Y-Têra” (êlan 27). Mơ̆ng anei, klei čih yăl dliê knŏng kñăm kơ pô phŭn mrâo jing Y-Abram, mô̆ gơ̆ jing H’Sarai, sa čô mniê plao, amâo mâo anak ôh. Y-Abram jing anak Y-Têra, kkiêng leh anăn prŏng ti ƀuôn Ur, čar Kaldê. Hlăm Y-Yôsuê 24:2 brei thâo anei jing anôk Y-Têra kkuh mpŭ kơ yang mkăn. Y-Nêhêmi 9:7 lač Aê Diê yơh pô ruah leh Y-Abram leh anăn atăt ñu kbiă mơ̆ng ƀuôn Ur. Êdei kơnăn, ung mô̆ Y-Abram mbĭt hŏng ama ñu Y-Têra, amuôn ñu Y-Lot kbiă mơ̆ng ƀuôn Ur nao kơ čar Kanaan, leh anăn Aê Diê bi mlih anăn ñu jing Y-Abraham. Ƀiădah tơdah truh ti ƀuôn Čaran, diñu dôk hdĭp tinăn. Snăn yơh, drei ƀuh Y-Abram kkiêng mơ̆ng gŏ sang amâo dôk kjăp sa hnơ̆ng ôh hlăm klei hdĭp myang wăt klei hdĭp kđeh. Aê Diê ruah ñu jing aê phŭn kơ phung ƀuôn sang Aê Diê ruah leh anăn jing aê phŭn klei đăo kơ jih jang phung đăo amâo djŏ kyua ñu jing mnuih jăk ôh, ƀiădah kluôm dhuôm kyua klei pap prŏng Aê Diê pô.
Thŭn mlan găn gao, ênuk anei lŏ čuê kơ ênuk êlâo, wăt tơdah klei hdĭp leh anăn anak mnuih bi mlih, ƀiădah hdră Aê Diê ăt kăn bi mlih rei. Aê Diê ăt kiă kriê klei hƀuê ênuk anak mnuih leh anăn mă bruă hlăm grăp čô mnuih. Ñu pô čŏng čiăng duah, ruah hlei pô Ñu čiăng yua, măng ai mơ̆ng si găp djuê pô anăn kbiă hriê. Drei dưi knang leh anăn dôk hơĭt tơdah mâo Pô sĭt suôr jing Khua kơ klei hdĭp drei.
Aê Diê jing Pô sĭt suôr nanao hlăm jih jang ênuk, snăn drei dôk sĭt suôr hlăm bruă Ñu jao leh čiăng jing sa kdrêč bi mguôp mbĭt hlăm hdră Ñu leh mơ̆?
Wah lač: Ơ Khua Yang, kâo bi mni lač jăk kơ Ih kyuadah Ih jing sĭt suôr nanao leh anăn klei jăk Ih dôk nanao hlŏng lar. Kâo jao jih klei hdĭp kâo hlăm kngan Ih, sĭt suôr hlăm bruă Ih jao leh, čiăng jing sa kdrêč điêt Ih yua hlăm hdră Ih, čiăng hưn nanao Anăn Ih leh anăn klei Ih ƀuăn kơ phung ênuk kâo leh anăn kơ lu ênuk êdei msĕ mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
