Blŭng a 11:10-32
“Ơ! Kră Yang Ih Kră Yang ‘Bok Kei-Dei mă đei rơih iŏk Abram, chông sư lĕch đơ̆ng Ur kon pơlei Kalđê păng krao anăn sư Abraham.” (Nêhêmi 9:7)
Nơ̆r jet tơchĕng pơwao:
– Tơdrong ayơ trŏ kơ bơ̆n tơchĕng hnhoi lăm anăn lu‘bok kơdră mă đe chih hơrĭ đơ̆ng Sem truh tơ Abram?
– ‘Bok Abram, đe rơneh kơ sư tơ yơ, sư arih wơ̆ ’lŏ tơ’bơ̆p tơdrong kiơ, thoi yơ?
– Tơdrong tơdă ‘Bok Kei-Dei đei tơ’bôh pơdah liơ đơ̆ng nơ̆r Sư lăm Hla bơar ‘nâu hei?
Nơ̆r ‘Bok Kei-Dei lăm Hla bơar, chăl, trong mă bơ̆n pơhrăm ‘nâu, đei chih anăn ‘bok kơdră lu kon sâu Nôê đơ̆ng chăl ‘bok Sem dĭng truh tơ chăl ‘bok Abram, pơtrơp tơdrong hơ’mon kơ adrĕch adrung kon bơngai đơ̆ng chăl ‘bok kơdră bơ̆n Ađam truh tơ ‘bok Nôê thoi đei chih bơih lăm Hla bơar Blŭng a 5 noh. Đơ̆ng rŏng kơ kon bơngai pơm yoch păng đơ̆ng rŏng kơ ‘Bok Kei-Dei phak kon bơngai blŭng a noh, ‘Bok Kei-Dei hlôi pơkă khan đei minh ‘nu lăm adrĕch adrung bơngai drŏ-kăn blah Satan gô jei Sư (Blŭng a 3:15), păng nơ̆r Kră Yang pơkă ei rai jê̆ hloh dơ̆ng kơplah bơ̆n ‘bôh đei anăn‘bok Abram lăm tơdrong hơ’mon. Mă tơpă sư, lăm anăn lu ‘bok kơdră mă đe chih hơrĭ hơrĭ ‘nâu, ‘nguaih kơ bre‘bok Sem kon drŏ-nglo ‘bok Nôê păng ‘bok Abram ‘bok kơdră lu kon pơlei ‘Bok Kei-Dei ei oei pă dôm yơ anăn noh, lu bơ̆n bơngai mă đŏk Nơ̆r ‘Bok Kei-Dei lăm Hla bơar Blŭng a chăl 11‘nâu lơ ‘nu lăng hlĭch đĕch, ataih đĕch, oei tam mă băt anăn lu ‘bok kơdră noh păng ưh kơ băt tơdrong arih lu sư thoi yơ. Mă-lei lu anăn mă bơ̆n lăng hmă đĕch ‘nâu, lăng thoi lĕ ataih kơlah kơ kơtơ̆ng băt ’nâu lu sư hlôi pơtrơp iŏk nơ̆r Kră Yang pơkă đơ̆ng jơhnơr ‘nâu truh tơ jơhnơr to, noh sĭt tơpă lu sư gơh jang keh tơdrong tơdă mă ‘Bok Kei-Dei hơmet, pơdăp dan; tơdrong tơdă Kră Yang mơmet noh oei pơtrơp pơtrơp rim kơ jơhnơr tơ anăp dơ̆ng.
Đơ̆ng anăn lu ‘bok kơdră lơ dêh‘nâu “adrĕch drung Sem” (trong 10) đe đei chih hrĕch iŏk rai tŏ sĕt jing “adrĕch adrung ‘bok Thêra” (trong 27). Đơ̆ng ‘bơ̆t dâu bơih, tơdrong đe chih pơpôi tơdrong tơchĕng hnhoi lăng tơ bơngai plơ̆ng, noh ‘bok Abram, akăn sư yă Sarai bơngai hơwŏng ưh kơ đei hơ’lơ̆p. ‘Bok Abram ‘nâu kon ‘bok Thêra. ’Bok Thêra pơjing ‘bok Abram ‘nâu tơ teh Ur, dêh Kalđê. Lăm Hla bơar Jôsuê 24:2 chih roi khan tơ noh anih ‘bok Thêra kơkuh kơ lu yang nai. Lăm Hla bơar Nêhêmi 9:7 roi khan kơdih Kră Yang hlôi rơih iŏk ‘bok Abram păng chông ba sư lĕch đơ̆ng Ur. Đơ̆ng rŏng kơ ‘noh, bre klo kăn Abram, ‘bă sư Thêra păng mon sư Lot weh jăk đơ̆ng Ur năm tơ dêh Kanaan păng tơplih sư jing Abraham. Mă-lei lăp lu sư năm truh tơ dêh Charan, lu sư oei hloi tơ noh. Thoi noh,bơ̆n ‘bôh Abram, đe rơneh sư noh đơ̆ng lăm minh pôm hnam dơnŏ mă đei lơ tơdrong ưh kơ hơđơ̆ng ưh kơ ‘lơ̆ng kơjăp đơ̆ng tơdrong arih gah bơhngol truh tơ tơdrong arih gah akâu akar. ’Bok Abram ‘nâu, Kră Yang rơih iŏk sư jing ‘bok kơdră lu kon pơlei mă Sư rơih noh păng jing thoi ‘bok kơdră đon lui đĭ-đăng adrĕch adrung kon pơlei Kră Yang jơ̆p kơ teh đak ‘nâu ưh kơ trŏ yua kơ Abram‘lơ̆ng ôh mă-lei yua kơ Kră Yang mơnat đĕch.
Hlôi đêl mơn bơih tơ hrĕng hrĕng sơnăm, pơtrơp pơtrơp đơ̆ng jơhnơr ‘nâu truh tơ jơhnơr to, mă khan tơdrong arih hiôk ‘lơ̆ng dah đei tơ’bơ̆p anat thoi yơ, mă khan kon bơngai bơ̆n đei tơplih thoi yơ, mă-lei tơdrong tơdă ‘Bok Kei-Dei hơmet proh dan oei hơnơ̆ng đĕch ưh kơ đei layơ tơplih. Kră Yang ling-lang pơgơ̆r jơhnơr arih kon bơngai đơ̆ng sơ̆ khơ̆ kơ dang ei truh tơ ning mônh păng Kră Yang kư̆m bơ̆ jang lăm jơhngơ̆m kơdih kơdih rim ‘nu lăm kon bơngai bơ̆n noh. Kơdih Kră Yang ‘mơ̆i chơchă păng rơih iŏk lu bơngai bu mă Sư wă yua, mă khan lu bơngai ei đe rơneh kơ lu sư tơ yơ, lu sư arih wơ̆ ‘lŏ tơ’bơ̆p tơdrong kiơ, thoi yơ. Bơ̆n gơh lui gơnang păng hơđơ̆ng jơhngơ̆m kơplah đei Kră Yang Tơ’ngla mă pơkă sĭt noh pơm Yŏng Tơ’ngla chăl arih bơ̆n.
Ơ Kră Yang, inh bơnê kơ Ih yua kơ Ih ling-lang pơm thoi Ih pơkă păng jơhngơ̆m Ih dim găt, băt mơnat noh oei oei ling-lang ưh kơ đei layơ tôch. Apinh Ih tơgŭm inh băt jao chăl arih inh lăm tơpang ti Ih, tơgŭm inh jang tơnăp tơdrong jang đơ̆ng Ih pơjao wă kơ inh jing thoi minh pôm gơwŏk lăm tơlei glang, đei Ih yua lăm tơdrong tơdă Ih hơmet wă pơklaih kon bơngai noh, wă kơ inh pơtrơp bơtho ră roi Anăn Ih păng bơho Nơ̆r Ih đei pơkă ‘noh kơ lu bơngai jih ‘ma mă arih hơdai jơhnơr inh ‘nâu păng bơtho ră roi ăn kơ lơ jơhnơr đơ̆ng rŏng kơ inh noh dơ̆ng. Inh krao khan yua anăn Kră Yang Yêsu Krist, Amen!
Kră Yang ‘Bok Kei-Dei ling-lang pơm thoi Sư pơkă đơ̆ng jơhnơr kră sơ̆ khơ̆ kơ dang ei truh tơ ning-mônh, lei na bơ̆n hăm tơnăp tơnen ưh lăm tơdrong jang mă Kră Yang pơjao wă kơ bơ̆n jing bơngai pơtrơp lăm tơdrong tơdă mă Kră Yang hơmet wă dŏng pơklaih kon bơngai ‘noh nhen thoi minh pôm gơwŏk đe pơtrơp lăm tơlei glang?
Đŏk Sơ̆p Hla bơar ‘Bok Kei-Dei lăm pêng sơnăm: Nêhêmi 10
Kênh Youtube BHKTHN:
