Klei Aê Diê Blŭ: Y-Mathiơ 15:21-28
Êlan kliăng: “Leh anăn Yêsu lŏ wĭt lač kơ gơ̆, “Ơ mniê, klei đăo ih prŏng snăk! Brei klei anăn truh tui si klei ih čiăng.” Leh anăn mông anăn mơh anak mniê gơ̆ hlao mtam.” (Y-Mathiơ 15:28)
Klei êmuh ksiêm mĭn: Ti anôk Khua Yang Yêsu nao leh anăn hlei pô ñu tuôm? Klei yăl dliê kơ mniê tue duah leh anăn akâo kơ Khua Yang brei ƀuh kơ klei đăo kơ ñu? Ya klei mñă kơ diih mơ̆ng klei yăl dliê anei?
Leh mtô phung ƀĭng kna kơ boh klei anak mnuih hlăm lam čiăng mđing răng kriê ai tiê, Khua Yang Yêsu leh anăn phung ƀĭng kna nao truh kơ ƀuôn Tir leh anăn Sidôn hlăm phung ƀuôn sang tue čiăng ñĕ kơ klei bi kdơ̆ng leh anăn mâo mmông mtô lač thiăm kơ phung Khua ƀĭng kna Ñu (Y-Markôs 7:24; 9:30-31). Sa čô Kanaan duah Khua Yang leh anăn akâo kơ Ñu mtlaih kơ anak mniê ñu “yang jhat ngă, knap mñai snăk”. Anei jing sa klei mdê amâo tuôm ƀuh, kyua phung ƀuôn sang tue mâo klei đăo, kơ yang diñu pô dê. Klei yăl dliê brei ƀuh tlâo mta klei mdê prŏng prĭn mơ̆ng mniê Kanaan anei.
Tal sa, ñu mâo sa klei čuăn ngă prŏng snăk. Ñu lač Khua Yang Yêsu jing “anak čô Mtao Y-Đawit”, mblang jing ñu mpŭ leh anăn thâo kral Khua Yang Yêsu jing Yang Mêsi srăng hriê. Kyua anăn ñu mâo sa klei čuăn ngă prŏng snăk jing “nao klăm ti jơ̆ng Ñu mtam” (Y-Markôs 7:25) čiăng akâo leh anăn kwưh akâo hŏng ai tiê kkuh mpŭ.
Tal dua, ñu tuôm hŏng klei lông dlăng prŏng. Khua Yang Yêsu dôk ñăt kriêp amâo wĭt lač ôh, phung ƀĭng kna knŏng čiăng kơ Khua Yang brei gơ̆ wĭt. Leh anăn Khua Yang brei thâo klei Ñu mđing tal êlâo ară anei jing pioh kơ djuê ana Israel (êlan 24). Mniê anei ăt lŏ dơ̆ng akâo “Ơ Khua Yang, đru kâo đa.” Khua Yang Yêsu čiăng bi mklă sa blư̆ dơ̆ng kơ klei mđing tal êlâo hlăm bruă Ñu ngă snăn Ñu lač “Amâo jăk ôh mă kpŭng phung anak leh anăn hwiê kơ asâo” (êlan 26). Klei lông dlăng prŏng êdi ƀiădah mniê anăn ăt gĭr, “Sĭt nik, Ơ Khua Yang, ƀiădah wăt asâo ăt ƀơ̆ng mơh djah lĕ mơ̆ng jhưng khua digơ̆” (êlan 27), ñu tŭ ư klei jing kơ klei hdĭp ñu pô leh anăn knŏng čang hmăng Khua Yang pap brei kơ amĭ anak ñu ƀiă djah kpŭng lĕ mơ̆ng jhưng huă đuč!
Tal tlâo, ñu mă tŭ boh tŭ prŏng prĭn. Khua Yang Yêsu mni kơ ñu jing mnuih mâo “klei đăo prŏng” leh anăn Ñu bi hlao kơ anak mniê anăn mơ̆ng hlăk anăn mtam (êlan 28).
Sa blư̆ dơ̆ng, Khua Yang Yêsu brei ƀuh Aê Diê amâo djŏ knŏng brei klei hơêč hmưi kơ phung Yuđa ôh ƀiădah klei pap Ñu pioh kơ jih jang phung hriê hŏng khua Yang kyua klei đăo, thâodah phung Yuđa amâodah phung tue. Leh anăn anei ăt jing mmông găl Khua Yang mtô kơ phung ƀĭng kna klei bi mtlaih amâo mâo kyua bruă mă, klei bhiăn kkuh mpŭ amâodah djă pioh klei bhiăn ôh ƀiădah knŏng kyua klei đăo. Klei hriăm mñă kơ drei brei nao kơ Khua Yang kyua klei đăo leh anăn jhŏng hưn kơ Ñu djăp klei mâo hlăm klei hdĭp. Čang hmăng Khua Yang ƀuh nanao klei đăo hlăm grăp čô drei leh anăn Ñu hơêč hmưi tơdah drei đăo kluôm dhuôm kơ Ñu.
Drei mâo klei đăo prŏng msĕ si mniê Kanaan anei mơ̆?
Wah lač: Ơ Khua Yang, akâo kơ Ih brei kâo thâo myơr kơ Ih djăp klei mâo hlăm klei hdĭp kâo. Akâo kơ Khua Yang đru kâo thâo knang kơ Ih hlăm djăp klei truh čiăng kơ klei đăo kâo dưi ƀrư̆ đĭ hriê kơ prŏng hĭn hlăm Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
