Klei Aê Diê Blŭ: Rôm 12:1
Êlan kliăng: “Ơ phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê.” (Rôm 12:1)
Klei êmuh ksiêm mĭn: Si klei čuăn hlăm bruă myơr mnơ̆ng ngă yang hlăm ênuk Klei Bi Mguôp Hđăp? Si mblang kơ klei mtă brei myơr asei mlei pô jing mnơ̆ng ngă yang hdĭp leh anăn doh jăk? Si drei ngă čiăng găn gao klei lông dlăng êjai hdĭp klei đăo ti krah lăn ala?
Bruă myơr mnơ̆ng ngă yang hlăm ênuk Klei Bi Mguôp Hđăp mâo êma mta mnơ̆ng myơr hưn mdah hlăm hdruôm hră Bruă Lêwi kdrêč 1-7. Tlâo mta mnơ̆ng myơr êlâo mâo mnâo ƀâo mngưi, myơr hŏng klei čŏng čiăng jing mnơ̆ng myơr čuh, mnơ̆ng myơr kpŭng ƀhĭ, mnơ̆ng myơr kơ klei êđăp ênang. Dua mta mnơ̆ng myơr tal êdei hĭn amâo mâo mnâo ƀâo mngưi ôh, leh anăn klei myơr bhiăn brei ngă jing mnơ̆ng myơr bi tui klei soh leh anăn mnơ̆ng myơr kyua klei soh. Mnơ̆ng myơr hưn mdah tal êlâo hĭn jing mnơ̆ng myơr čuh amâodah čuh kluôm dhuôm. Hlăm mnơ̆ng myơr anei, arăng čuh jih mnơ̆ng myơr knŏng lui hĕ klĭt, khăt mnơ̆ng myơr bi kdrêč leh anăn čuh jih kluôm dhuôm ti dlông knưl ngă yang hŏng kông. Mnơ̆ng myơr čuh, brei myơr sa drei knô amâo mâo anôk jhat ôh, pô myơr bă kngan ti dlông boh kŏ mnơ̆ng myơr jing klei bi knăl mnơ̆ng myơr anăn tŭ klei soh hrô brei kơ pô. Leh anăn arăng bi mdjiê mnơ̆ng myơr anăn hlăm wăl sang yang, êrah gơ̆ arăng hƀrah jŭm knưl kkuh mpŭ. Klei bhiăn ngă anei jing rup bi hmô kơ Khua Yang Yêsu, Aê Diê Pô Tal dua, Pô kluôm dhuôm amâo mâo klei soh ôh tuh êrah tŭ klei djiê hrô brei kơ mnuih soh sa blư̆ djăp ênŭm leh (Hêbrơ 7:27).
Dôk hdĭp ti krah lăn ala soh jhat amâo mâo mđing uêñ kơ Aê Diê ôh, knŏng hung kơ klei tluh kơ kđeh, klei tluh kơ ală leh anăn klei mgao kơ klei hdĭp (I Y-Yôhan 2:16), phung đăo kơ Krist tuôm nanao hŏng lu snăk klei lông dlăng; ƀiădah lĕ, khua ƀĭng kna Y-Pôl mtă brei drei “myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê.” (êlan 1). Phung anak ƀuôn sang Aê Diê hlăm ênuk Klei Bi Mguôp Mrâo amâo lŏ guôn myơr mnơ̆ng myơr ngă yang msĕ si hlăm ênuk Klei Bi Mguôp Hđăp ôh, knŏng khă bi mâo klei đăo, hŏng ai tiê kpă sĭt jum Khua Yang Yêsu jing Pô Bi Mtlaih leh anăn jing Khua kơ Klei hdĭp pô, snăn sĭt nik dưi mă tŭ klei bi mtlaih (Y-Yôhan 3:16). Ƀiădah lĕ, klei đăo sĭt brei bi êdah hŏng knhuah hdĭp klei đăo (Y-Yakơ 2:26), kyuanăn mnơ̆ng myơr hdĭp leh anăn doh jăk ăt kăn dưi mâo anôk jhat rei, leh anăn myơr asei mlei jing myơr kluôm jih asei mlei mngăt ai tiê kơ Khua Yang. Phung anak Aê Diê sĭt, dôk hdĭp hlăm si mta klei truh dưn, thâodah dôk tlă anăp hŏng lu mta klei lông dlăng hlăm ƀuôn sang, ăt brei bi êdah klei đăo hŏng klei hdĭp mâo klei bi mlih msĕ si sa mnơ̆ng myơr hdĭp, doh jăk mâo mnâo ƀâo mngưi myơr kơ Aê Diê, anăn yơh jing sa klei kkuh mpŭ djŏ Ama khăp. Klei myang Yang Mngăt Jăk yơh srăng đru bi ktang drei dưi găn gao klei lông dlăng, čiăng dôk hdĭp mâo klei dưi hĭn kơ Khua Yang ti krah lăn ala.
Ya klei drei knang kơ Khua Yang bi mlih čiăng kơ klei hdĭp drei jing doh jăk leh anăn lar mnâo ƀâo mngưi nanao, ti krah klei lông dlăng mơ̆ng lăn ala?
Wah lač: Ơ Khua Yang, ti krah lăn ala bi kdơ̆ng hŏng Khua Yang, kâo tlă anăp hŏng klei lông dlăng nanao hlăm klei hdĭp. Akâo Khua Yang brei kâo ăt jih ai tiê myơr kluôm dhuôm asei mlei mngăt ai tiê kơ Khua Yang, msĕ si mnơ̆ng myơr hdĭp leh anăn doh jăk bi mơak kơ Ih. Akâo Khua Yang thiăm kơ kâo ai ktang čiăng dưi găn gao klei lông dlăng leh anăn hdĭp mâo klei dưi hĭn kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
