Loos 12:1
Nqe cim:
“Cov kwvtij, Vajtswv hlub peb kawg nkaus li, yog li ntawd kuv thiaj ntuas nej hais tias thaum nej tseem ua neej nyob no, nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam.” (Loos 12:1).
Lus nug rau sawvdaws xav:
– Kevcai fij khoom nyob tiam Vajluskub Qub tau sau tseg licas?
– Lo lus qhuab ntuas muab tus kheej lubcev ua yam khoom fij ciaj sia thiab dawbhuv muaj lub ntsiab licas?
– Yuav ua cas peb thiaj tiv dhau tej kev sim siab thaum ua neej ntseeg hauv ntiajteb no?
Nyob hauv kev fij khoom tiam Vajluskub Qub ces muaj tsib yam khoom fij tau sau tseg nyob hauv Levis Kevcai tshooj 1-7. Peb yam xubthawj yog khoom fij tsw qab los ntawm nplooj siab dawb uas yog khoom fij tsiaj hlawv tagnrho, khoom fij qoobloo thiab khoom fij ua kev sib raug zoo. Ob yam khoom fij tomqab tsis yog khoom fij tsw qab thiab raug yuam ua, ntawd yog khoom fij daws kev txhaum txhob txwm ua thiab tsis txhob txwm ua. Yam khoom fij xubthawj tau hais txog yog khoom fij tsiaj hlawv xyeem lossis hlawv tagnrho. Nyob ntawm yam khoom fij no, tus tsiaj raug laws tawv thiab muab txiav ua tej thooj thiab muab hlawv fij tagnrho rau saum lub thaj. Tus tsiaj uas coj tuaj hlawv fij yuav tsum yog tus txiv uas tsis muaj ib qho phem, tus neeg fij yuav tsum tsa tes rau saum tus tsiaj lub taubhau, tus tsiaj ntawd thiaj yuav ua tau khoom theej txhoj tshem nws lub txim mus. Tomqab ntawd tus tsiaj raug tua rau ntawm lub qhov rooj Tsev ntaub sib ntsib, cov povthawj muab cov ntshav coj mus hliv ywg thoob plaws lub thaj. Kevcai no yog ua yamntxawv txog Tswv Yexus, Lub Zwmtxwv Ob Ntawm Vajtswv Vaj Peb Leeg, Tus tsis muaj txim yeem muab Nws cov ntshav los tuag txhiv tibneeg txhaum tib zaug xwb mas txaus lawm (Henplais 7:27).
Nyob hauv lub ntiajteb uas puv npo kev txhaum, tsis quavntsej Vajtswv, tsuas tig mus rau nqaijtawv kev ntshaw, qhov muag kev nyiam thiab tus kheej kev khavtheeb (I Yauhas 2:16), tus ntseeg Yexus yeej yuav ntsib ntau yam kev sim siab; tiamsis, Timthawj Paulus ntuas peb hais tias: “nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam” (nqe 1). Tus Tswv cov menyuam nyob tiam Vajluskub Tshiab tsis tas yuav tua tsiaj hlawv fij zoo li tiam Vajluskub Qub lawm, tsuas yog los ntawm kev ntseeg, tas siab lees yuav Tswv Yexus ua tus kheej tus Tswv Cawmseej ces yeej yuav tau txais kev cawmdim (Yauhas 3:16). Tiamsis, kev ntseeg tseeb yuav tsum ua qhia tshwm dhau ntawm lubneej ntseeg (Yakaunpaus 2:26), vim li ntawd yam khoom fij ciaj sia thiab dawbhuv kuj yuav tsum yog khoom fij tsis muaj ib qho phem, thiab fij tag nrho lubcev, tus ntsujplig rau tus Tswv. Tus Tswv cov menyuam tseeb txawm yuav ua neej nyob hauv lub tsamthawj twg, txawm yuav ntsib ntau kev sim siab tuaj raug, los yuav tsum qhia tshwm kev ntseeg dhau ntawm lubneej tau pauv hloov zoo li yam khoom fij ciaj sia, dawbhuv uas tsw qab fij rau Vajtswv, ntawd yog kev pehawm uas haum Leej Txiv siab. Vaj Ntsujplig lub hwjchim yuav pab peb muaj zog tiv dhau tej kev sim siab kom muaj yeej rau tus Tswv hauv ntiajteb no.
Thov Vajtswv,
Tus Tswv, nyob hauv lub ntiajteb uas tawmtsam Koj, nyuam yaus yuav ntsib ntau yam kev sim siab hauv lubneej. Thov pab nyuam yaus txaus siab fij tagnrho lubcev, tus ntsujplig rau Koj zoo li yam khoom ciaj sia thiab dawbhuv haum Koj siab. Thov pub nyuam yaus muaj zog hla dhau kev sim siab thiab ua neej muaj yeej pub rau Koj. Nyuam yaus tuav Yexus Khetos lub npe thov, Amees.
Peb yuav tsum vamkhom tus Tswv pab hloov pauv yam dabtsi kom peb lubneej dawbhuv thiab ua tau tej pa ncho tsw qab thaum ntsib kev sim siab hauv lubneej?
Nyeem Vajluskub hauv peb lub xyoos: II Kevcai 5
Kênh Youtube BHKTHN:
