Klei Aê Diê Blŭ: Klei Bi Hriêng 14:1-2
Êlan kliăng: “Mniê thâo mĭn mdơ̆ng sang ñu, ƀiădah hŏng kngan ñu pô mniê mluk ruh sang ñu.” (Klei Bi Hriêng 14:1).
Klei êmuh ksiêm mĭn: Ya klei Mtao Y‑Salômôn bi hriăm kơ phung mniê thâo mĭn? Ya tur knơ̆ng phung mluk mdơ̆ng sang ñu? Čiăng dưi jing sa čô ama, amĭ thâo mĭn hlăm gŏ sang, ya klei brei drei bi mlih?
Mâo sa čô mô̆ thâo mĭn jing klei jăk mơak snăk, kyua anăn Mtao Y‑Salômôn bi hriăm anak ñu thâo săng kơ klei anei hlăm lu mta bruă mdê mdê (dlăng hlăm Klei Bi Hriêng 11:16,22; 12:4; 31:10-31).Mniê thâo mĭn brei mdơ̆ng sang ti dlông tur knơ̆ng kjăp ktang jing klei huĭ mpŭ kơ Aê Diê (êlan 2; 31:30). Boh blŭ “sang” tinei amâo djŏ knŏng jing anôk kơup adiê hjan mđiă mtrang đuč ôh, ƀiădah jing gŏ sang. Hlăm dhar kreh Hêbrơ, “sang” lač kơ sa gŏ sang ăt msĕ mơh sa djuê ana amâodah sa ênuk kiă kriê (Klei Mmuñ Hđăp 115:12; II Y‑Samuel 7:25, 27). Anak čô mơ̆ng mniê huĭ mpŭ ăt srăng mâo klei jăk mơak mơ̆ng amĭ, mơ̆ng aduôn. Mtao Y‑Salômôn mñă klă, “Mnuih kpă ênô êbat hlăm klei ênuah, jăk mơak yơh phung anak čô ñu êdei.!” (Klei Bi Hriêng 20:7). Boh blŭ “mdơ̆ng sang pô” bi êdah klei đru mguôp mơ̆ng mniê thâo mĭn hlăm djăp mta bruă mơ̆ng bruă ngă truh kơ klei khăp hlăm gŏ sang.
Mklăk wĭt, mniê mluk srăng bi rai klei pô mâo amâodah ya klei pô suăi êmăn mdơ̆ng leh. Boh blŭ “mă kngan pô bi rai” mñă klă klei dlưh rai mơ̆ng gŏ sang amâo djŏ hmaĭ mơ̆ng nah êngao ôh ƀiădah kyua ñu pô ngă dlưh rai. Diñu jing phung “ngă klei wê,” jing “amâo êbat êlan kpă ênô” (êlan 2), kƀah klei kpă kƀah klei doh jăk.
Đa đa phung mniê wăt phung êkei kyua kƀah klei thâo mĭn snăn amâo mkŏ mjing gŏ sang hlăm tur knơ̆ng huĭ mpŭ kơ Aê Diê leh anăn klei khăp. Diñu knŏng jing sa gŏ sang kyua khăp kơ ngăn drăp, bruă knuă amâodah kyua klei mniê êkei, anăn ênưih ngă soh, bi rai gŏ sang leh anăn ung mô̆ diñu. Klei năng ênguôt hĭn jing anak čô dŭm gŏ sang snăn amâo djŏ knŏng amâo mâo klei mơak mơ̆ng amĭ ama ôh ƀiădah lŏ tŭ lu boh jhat mơ̆ng klei soh amĭ ama mơh.
Aduôn aê drei khăng bi iêô “sang kâo”. Mô̆ iêô ung “sang kâo”. Ung iêô mô̆ “sang kâo”. Boh blŭ “sang” tinei amâo djŏ knŏng lač kơ sang hŏng kyâo, ƀrĭk ôh ƀiădah čiăng lač kơ anôk diñu bi khăp, bi đru, hrăm mbĭt mkŏ mjing gŏ sang jăk mơak. Mniê thâo mĭn amâo djŏ jing sa čô mniê mâo klei hriăm lu, bruă knuă prŏng amâodah mdrŏng sah ôh, ƀiădah mniê thâo mkŏ mjing gŏ sang jăk mơak, hdĭp leh anăn bi hriăm anak huĭ mpŭ kơ Aê Diê, leh anăn bi bŏ klei hdĭp huĭ mpŭ kơ gŏ sang pô hlăm grăp hruê. Ngăn drăp mnơ̆ng dhơ̆ng čiăng mơh, ƀiădah klei anak mnuih čiăng hĭn anăn jing klei khăp, klei kriê dlăng, klei bi hriăm mơ̆ng amĭ ama thâo mĭn hlăm sa gŏ sang jăk mơak.
Drei jing mnuih thâo mĭn duh kơ bruă “mdơ̆ng sang pô” mơ̆ ?
Wah lač: Ơ Khua Yang, kâo bi mni lač jăk kơ Aê Diê kyua Klei Aê Diê Blŭ brei kâo ƀuh klei mdê hjăn plah wah mniê thâo mĭn leh anăn mniê mluk. Akâo kơ Ih brei kâo thâo huĭ mpŭ Aê Diê hlăm klei hdĭp ung mô̆ leh anăn klei bi hriăm anak čô. Akâo kơ Ih đru kâo thâo mkŏ mjing klei khăp ung mô̆ hlăm klei huĭ mpŭ kơ Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 14
Kênh Youtube BHKTHN:
