Klei Aê Diê Blŭ: Bruă Phung Khua Ƀĭng Kna 15:36-41
Êlan kliăng: “Bi tŭ hdơ̆ng diih, leh anăn tơdah sa čô mâo klei hŏng mnuih mkăn, bi pap brei hdơ̆ng diih. Msĕ si Khua Yang pap brei kơ diih leh, brei diih pap brei msĕ mơh.” (Kôlôs 3:13)
Klei êmuh ksiêm mĭn: Ya klei truh êjai Khua ƀĭng kna Y-Pôl leh anăn Y-Barnabas dôk mă bruă kơ Khua Yang bŏ hŏng klei pap? Si ênhă êlan mgaih mkra klei amâo bi djŏ ti krah diñu dua? Si drei khăng mgaih mkra klei amâo bi djŏ hlăm klei mă bruă kơ Khua Yang?
Y-Yôhan, lŏ mâo anăn iêô jing Y-Markôs, ayŏng adei sa găp djuê hŏng Y-Barnabas (Kôlôs 4:10), jing pô tuôm đru leh Khua ƀĭng kna Y-Pôl leh anăn Y-Barnabas hlăm gưl hiu hưn Klei Mrâo Mrang Jăk tal êlâo hĭn (Bruă Phung Khua Ƀĭng Kna 13:5) kyuanăn Y-Barnabas čiăng jak ba Y-Markôs mbĭt hlăm gưl hiu hưn anei. Khua ƀĭng kna Y-Pôl amâo ư ai ôh kyuadah Y-Markôs tuôm lui leh diñu krah wah êlan hlăk gưl hiu hưn Klei Mrâo Mrang Jăk tal êlâo anăn (Bruă Phung Khua Ƀĭng Kna 13:13). Klei anăn ngă kơ ti krah Khua ƀĭng kna Y-Pôl leh anăn Y-Barnabas bi tăng mgăl kơ bruă Aê Diê, Y-Luk čih hưn “ktang snăk”. Tơl truh kơ klei diñu bi ktlah, Khua ƀĭng kna Y-Pôl ruah Y-Silas nao mbĭt, bi Y-Barnabas jak ba Y-Markôs nao mbĭt kơ plao êa Čiprơ.
Klei amâo thâo bi djŏ êjai ngă bruă kơ Aê Diê jing klei amâo dưi tlaih ôh. Khua ƀĭng kna Y-Pôl jing sa čô mnuih hur har, hlơr kơ bruă Aê Diê kyuanăn ñu mgaih mkra hŏng klei bi mlih hĕ mnuih čiăng đăm mâo klei bi hmăi kơ bruă Aê Diê msĕ si gưl êlâo anăn. Bi Y-Barnabas mgaih mkra hŏng klei êđăp ênang tui si knuih ñu mơh, ñu jak ba Y-Markôs mbĭt hŏng ñu leh anăn nao hiu hưn kơ anôk mkăn. Klei amâo bi djŏ ti krah diñu dua amâo djŏ ôh kyua klei mĭn kơ diñu pô amâodah mâo klei bi ăl, ƀiădah kyua jih diñu dua hur har kơ bruă Aê Diê sơăi. Diñu bi ktlah, čiăng kơ mơ̆ng sa êpul hiu hưn lŏ jing dua êpul, jing ênhă êlan čiăng đăm tơl mâo klei bi mneh msao. Jih diñu dua amâo djă pioh ôh klei bi tăng mgăl čiăng mâo klei dưi hĭn kơ pô, ƀiădah diñu găn gao leh klei lông dlăng êjai mgaih mkra klei amâo bi djŏ hŏng klei êđăp ênang, dlăng kơ klei tŭ dưn kluôm kơ bruă Aê Diê, amâo djŏ dlăng kơ diñu pô ôh. Wăt tơdah klei mgaih mkra bi mklăk wĭt, ƀiădah jih dua pô hiu mtô Y-Pôl leh anăn Y-Barnabas, ti knhal tuč ăt lui hĕ mơh klei amâo thâo bi djŏ čiăng kăp lŏ ngă bruă Aê Diê! Drei thâo, hruê êdei kơnăn, Khua ƀĭng kna Y-Pôl ƀuh mâo klei bi mlih sĭt hlăm Y-Markôs snăn ñu mơak yua êkei hlăk ai anei msĕ si sa čô mă bruă mbĭt tŭ dưn kơ bruă ñu (II Y-Timôthê 4:11).
Khua ƀĭng kna Y-Pôl mtô leh kơ phung ƀuôn sang Aê Diê ti Kôlôs: “Bi tŭ hdơ̆ng diih, leh anăn tơdah sa čô mâo klei hŏng mnuih mkăn, bi pap brei hdơ̆ng diih. Msĕ si Khua Yang pap brei kơ diih leh, brei diih pap brei msĕ mơh.” (Kôlôs 3:13). Jih jang mnuih tuôm mâo đa blư̆ soh čhuai, amâo ư ai mbĭt, amâo thâo bi djŏ êjai mă bruă kơ Aê Diê. Ênhă êlan mgaih mkra amâo djŏ bi lông hlei dưi hĭn ôh, ƀiădah bi tŭ leh anăn bi pap brei hdơ̆ng pô, kyua klei tŭ dưn kơ bruă Aê Diê leh anăn Phung Sang Aê Diê. Tơdah drei mđrăm mbĭt dlăng phă Khua Yang čiăng mă bruă, snăn jih jang klei amâo thâo bi djŏ, tơdah mâo, ăt srăng mâo hdră êlan dưi găn gao mơh, čiăng amâo bi hmăi kơ bruă Aê Diê.
Si ngă drei khăng dưm drei pô ti dlông hĭn tơdah mgaih mkra ya klei mâo mơ̆?
Wah lač: Ơ Ama Doh Jăk! Brei kâo dưm klei tŭ dưn kơ Phung Sang Aê Diê leh anăn bruă Aê Diê ti dlông hĭn, čiăng kơ tơdah mâo klei truh ti krah phung hmei, srăng mgaih mkra pral djăl, amâo bi hmăi ôh kơ bruă hưn Klei Mrâo Mrang Jăk Khua Yang jao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
