Mathiơ 6:1-6
“Iĕm athei kơchăng, ‘nĕ pơang tơdrong ‘lơ̆ng iĕm pơm kơ đe ‘bôh; dah iĕm pơang tơ’bôh kơ đe tơdrong ‘lơ̆ng iĕm pơm, lei ‘Bă bơ̆n tơ plĕnh ti ưh kơ bơnê kơ iĕm ôh.” (Mathiơ 6:1)
Nơ̆r jet tơchĕng pơwao:
– Tơdrong juăt trŏ tơm sư kơplah tơgŭm ‘noh kiơ?
– Bơngai krao khan ưh kơ tơpă păng krao khan tơpă gô đei yua yă kiơ?
– Tơdrong pơdrŭt pơm tôm tơdrong ‘lơ̆ng ‘noh yă kiơ?
Trong 1 đei bơtho dôm tơdrong juăt tơm sư kơ “pơm tơdrong ‘lơ̆ng tơpăt” ‘noh tơgŭm, krao khan, păng ơ̆t kơ sŏng sa (Mathiơ 6:2-18).
Mă mônh, pơm tơdrong ‘lơ̆ng tơpăt jơ̆ tơdrong athei pŭ iŏk rim ‘nu bơngai mă kiơ̆ Kră Yang. Kơplah pơma “iĕm athei kơchăng ‘nĕ pơang tơdrong ‘lơ̆ng iĕm pơm kơ đe ‘bôh”, Kră Yang Yêsu bơtho tơ’bôh “pơm tơdrong ‘lơ̆ng tơpăt” jơ̆ tơdrong đe ‘bôh nhen lăm chăl arih bơngai kiơ̆ Kră Yang, ‘nĕ kơ pơm tơdrong ‘lơ̆ng tơpăt ưh kơ trŏ.
Mă ‘bar, tơdrong ‘lơ̆ng tơpăt athei pơm lăm tơdrong đei Kră Yang ‘Bok Kei-Dei oei hơdai păng yua kơ tơdrong ư-ang Sư. Lu trong 1, 4, 6, 18 đei tơ’bôh Kră Yang ‘Bok Kei-Dei Sư ‘bôh păng apah kơ lu bơngai “pơm ‘lơ̆ng tơpăt” lu bơngai tơpăt ưh kơsĭ lu bơngai pơang.
Athei kơchăng, yua kơ kon bơngai ngăl ưh kơ tơpă păng hơlĕnh pơdăr kon bơngai, mălei ưh kơ gơh ưh kơ tơpă păng gơh hơlĕnh kơ Kră Yang ‘Bok Kei-Dei ôh (I Samuel 16:7), Kră Yang ling lang ‘bôh lăm jơhngơ̆m păng pơdrŭt kơplah lu bơ̆n “pơm ‘lơ̆ng tơpăt”, pơyơ̆r, tơgŭm lu bơngai pơmat tat, tơdah kơplah bơ̆n bơ̆jang lăm tơdrong akŭm kơkuh, thoi kơ krao khan, ơ̆t kơ sŏng sa, năm tơ hnam akŭm. Kăl kơ lăng hơmet jơhngơ̆m bơ̆n kơdih, dôm tơdrong kiơ bơ̆n đei pơm mă wă kơ đe ‘bôh dah tơdrong wă ư-ang kơ ‘Bok Kei-Dei.
Mă pêng, chang gô tơdrong đơ̆ng Kră Yang ‘Bok Kei-Dei jơ̆ tơdrong trŏ tơpă. Sơ̆p Hla ar Pah ‘Nao lơ ‘măng đei bơtho, chang gô Kră Yang apah ưh kơ đei glăi ôh (I Kôrintô 15:58; Hêbrơ 6:10…) Mălei athei ‘blŏk tơdrong apah tơ ala teh, noh tơdrong đe ư-ang, đe pơyom, păng đei tôm tơmam (Markôs 12:38-40), sư phara kơ tơdrong apah đơ̆ng Kră Yang ‘Bok Kei-Dei. Tơdrong apah đơ̆ng Kră Yang đei ‘bar tơdrong: Nơ̆r pơkă pơ’ngam tơdrong apah đơ̆ng Kră Yang ‘Bok Kei-Dei lăm Pah ‘Nao ưh kơ đei pŭn hiôk gah sĕch akar, mơdrŏng dah đe pơyom, mălei pơma gah tơdrong pŭn hiôk gah bơhngol kơplah bơ̆n băt kơ Kră Yang lăp đon păng mơn đei lăm chăl arih gơh đei yua. ‘Nguaih kơ ‘noh, nơ̆r pơkă gah tơdrong apah đơ̆ng Kră Yang ‘Bok Kei-Dei kang ăn thim, ưh kơsĭ đei tơmam lăm chăl arih dang ei, mălei gô jao ăn tơdrong jang tih hloh dơ̆ng (Mathiơ 25:21).
Kră Yang khan, “lu bơngai thoi noh tơdrong apah lu sư jơ̆ lu đe mă ư-ang kơ sư noh đĕch.” (trong 2) lăm nơ̆r Grĕk nơ̆r ‘noh wă khan “đe ăn tôm đĭ bơih” dah “đei iŏk tôm đĭ bơih sô̆ jên păng đei hla ar pơsĭt”. Kơplah minh ‘nu ‘bơ̆r đak klak ŭnh pơm tơdrong ‘lơ̆ng wă kơ đe ‘bôh lei lu sư đei tơdrong apah đơ̆ng kon bơngai, noh nơ̆r bơnê, pơư, kơkuh jơ̆ lăp dôm noh đĕch! Ưh kơ đei phara kiơ ôh, păng ưh kơ đei đơ̆ng Kră Yang ‘Bok Kei-Dei. Mălei kơplah minh ‘nu pơm tơdrong ‘lơ̆ng hăm đĭ jơhngơ̆m mă tơpă, na tơdrong ư-ang kơ Kră Yang lei bơngai noh ưh kơ đei tơdrong bơnê đơ̆ng kon bơngai mălei gô đei tơdrong apah bơnê đơ̆ng Kră Yang ‘Bok Kei-Dei. Tơdrong pơm ‘noh đơ̆ng lăm bơ̆n rơih iŏk wă pơm thoi yơ noh.
Lu bơ̆n wă iŏk tơdrong apah păng đei nơ̆r bơnê đơ̆ng yơ păng đơ̆ng bu?
Ơ Kră Yang, apinh Ih ăn kơ inh krao khan păng pơm tơdrong ‘lơ̆ng ‘noh yua kơ Ih păng đĭ jơhngơ̆m mă tơpăt tơpă. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 2
Kênh Youtube BHKTHN:
