Klei Aê Diê Blŭ: Klei Bi Hriêng 18:14; II Kôrantô 12:5‑10
Êlan kliăng: “Ai tiê mĭn čiăng hdĭp krơ̆ng mnuih êjai ñu ruă duam, ƀiădah tơdah ñu luč klei anăn amâo lŏ mâo klei čang hmăng ôh? (Klei Bi Hriêng 18:14).
Klei êmuh ksiêm mĭn: Si mtao Salômôn bi hriăm anak ñu klei djŏ tuôm plah wah ai tiê leh anăn kđeh asăr? Mơ̆ng ya klei Khua ƀĭng kna Y‑Pôl hơ̆k mơak leh anăn ktưn hưn kơ klei êdu awăt pô? Si ngă čiăng hriăm mjuăt ai tiê kjăp hlăm djăp boh klei?
Mtao Salômôn bi hriăm anak hdĭp thâo mĭn mơ̆ng bruă krơ̆ng ai tiê hơ̆k mơak. Ñu bi êdah klei djŏ tuôm plah wah klei hdĭp ai tiê leh anăn klei suaih pral asei mlei: “Ai tiê mĭn čiăng hdĭp krơ̆ng mnuih êjai ñu ruă duam, ƀiădah tơdah ñu luč klei anăn amâo lŏ mâo klei čang hmăng ôh?” (êlan 14). Sĭt mâo klei ruă, ai tiê hơ̆k mơak srăng đru klei ruă pral hrŏ. Ƀiădah ai tiê êdu ai, asei mlei amâo lŏ mâo ya klei čiăng čang hmăng ôh anăn dleh dưi hlao.
Knuih drei bi mklă klei suaih pral asei mlei wăt ai tiê, leh anăn klei mĭn hmaĭ kơ kđeh asăr. Sĭt ai tiê mơak, ƀô̆ mta anak mnuih ăt mơak mơh, ƀiădah ai tiê ênguôt hnĭng ngă kơ klei mĭn ai tiê êdu ai (Klei Bi Hriêng 15 :13). Ai tiê mơak ăt jing sa mta êa drao jăk đru bi hlao klei ruă, bi ai tiê êdu ai ngă thu krô klang (Klei Bi Hriêng 17 :22). Kyua anăn, phung thâo mĭn, brei knang kơ Aê Diê mtô bi hriăm čiăng mâo ai tiê hơ̆k mơak, kjăp hlăm djăp boh klei.
Khua ƀĭng kna Y‑Pôl lač kơ klei ruă duam hlăm asei mlei ñu, ñu bi hmô msĕ si sa aruăt êruê tlŏ hlăm kđeh (II Kôrantô 12 :5‑10). Ƀiădah hlăm klei ruă anăn, Aê Diê đru ñu thâo klei pap kluôm ênŭm Aê Diê brei kơ ñu. Kyua anăn, ñu mơak leh anăn ktưn hưn kơ klei êdu awăt pô čiăng ƀuh klă klei ktang mơ̆ng Krist hlăm ñu. Kyua anăn ñu lač sĭt ñu êdu awăt, jing hlăk ñu ktang.
Klei hdĭp drei srăng mâo mmông asei mlei êgah êmăn, amâodah klei ruă duam. Brei drei krơ̆ng kjăp ai tiê, đăo kơ klei Aê Diê kiă kriê hlăm klei hdĭp pô leh anăn pioh klei bi mguôp hŏng Ñu. Hŏng klei Aê Diê đru, drei dưi bi mlih knuih pô. Ai tiê drei srăng ktang sĭt knang kơ klei ktang yuôm bhăn Aê Diê. Ăt kăn huĭ hưn kơ Ñu kơ klei drei êgah êmăn hlăm ai tiê, ruă duam hlăm asei mlei, kyua hlăk êdu awăt snăn, drei srăng thâo klei pap prŏng prĭn Aê Diê brei kơ drei. Akâo kơ Aê Diê brei kơ drei thâo klei êdu awăt pô leh anăn jih ai tiê knang kơ Ñu msĕ si Khua ƀĭng kna Y‑Pôl lač leh: “Kâo dưi ngă jih jang klei hlăm Krist, Pô bi ktang kâo.” (Philip 4:13).
Ya klei brei drei ngă čiăng đru kơ ai tiê kjăp nanao leh anăn asei mlei suaih pral?
Wah lač: Ơ Khua Yang Doh Jăk, kâo bi mni kơ Ih brei leh kơ kâo ai ktang. Akâo kơ Ih đru kâo thâo kral klei êdu kƀah kâo čiăng knang hlăm klei myang Aê Diê. Akâo kơ Ih đru kâo đăo kơ klei Aê Diê kiă kriê, knang kơ Ih krơ̆ng kjăp ai tiê hlăm djăp boh klei.
Dlăng klei Aê Diê Blŭ hlăm tlâo thŭn: Y‑Êsai 47
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
