I Yôhan 3:7-10
“Bơngai bu ưh kơ pơm ‘lơ̆ng tơpăt păng ưh kơ ‘mêm kơ ‘nhŏng oh sư, bơngai ‘noh ưh kơ sĭ kon ‘Bok Kei-Dei ôh.” (I Yôhan 3:10b)
Nơ̆r jet tơchĕng pơwao:
– Yôhan pơma hơđăl tơdrong ayơ gah Kră Yang lăm chăl nơ̆r ‘Bok Kei-Dei ‘nâu?
– Sư pơgơ̆p tơdrong tơpăt păng tơdrong ‘mêm thoi yơ?
– Bơ̆n tơ’bôh tơdrong pơm ‘lơ̆ng tơpăt lăm tơdrong arih bơ̆n thoi yơ?
Pơih blŭng a, Yôhan athei kon Kră Yang “’Nĕ lui kơ đe hơlĕnh kơ iĕm” lăm tơdrong pơjing kon Kră Yang păng kon yang satan. Sư pơma hơđăl bu pơm ‘lơ̆ng tơpăt ‘noh bơngai gah ‘Bok Kei-Dei păng bu pơm yoch lei na ‘noh gah yang kơnê̆. Sư kư̆m pơma hơđal ‘Bok Kei-Dei jơ̆ tơ’ngla ‘lơ̆ng tơpăt (trong 7), kơlih kơ thoi noh, lu đe bu gah Kră Yang gô ‘maih wă yak năm lăm tơdrong ‘lơ̆ng tơpăt. Tơdrong ‘lơ̆ng tơpăt Kră Yang ‘Bok Kei-Dei tơplih dôm tơdrong bơ̆n hưch ham ‘maih wă mă wă kơ bơ̆n rai ‘bônh kơ băt kơ tơdrong yoch păng pơkă pơkăm arih pơm tơ’bôh tơdrong ‘lơ̆ng tơpăt Sư.
Pơtrơp dơ̆ng, ‘Bok Pôl tơ’blŏk ming dơ̆ng: Kră Yang jur wă pơrăm lê̆ tơdrong jang yang kơnê̆, păng minh ‘nu bơngai sơng iŏk Kră Yang lei na ‘Bok Kei-Dei oei lăm bơngai ‘noh, bơngai ‘noh ưh kơ pơm yoch khŏm khŏm dơ̆ng (trong 8-9). Tơm tơdrong bơtho tơdrong ‘nao ‘lơ̆ng ‘noh jơ̆ nơ̆r chrih khă, kư̆m nơ̆r pơtruh mơ̆n: Tơdrong ưh kơ lăp trŏ hăm tơdrong arih kon ‘Bok Kei-Dei (trong 10a).
Tuch luch, tơdrong ‘lơ̆ng tơpăt păng ‘mêm mơnat noh tơdrong kon ‘Bok Kei-Dei (trong 10b). Yôhan jơ̆ng ‘bang pơgơ̆p tơdrong ‘lơ̆ng tơpăt hăm tơdrong ‘mêm. Sư khă tơbăt mă bu bu ưh kơ ‘mêm kơ ‘nhŏng mŏ oh bơ̆n leI na ưh kơ trŏ kon ‘Bok Kei-Dei. Tơdrong ‘mêm ưh kơ sĭ mơn ‘brơ̆k lăm jơhngơ̆m na pơm tơ’bôh tơdrong ‘lơ̆ng ‘Bok Kei-Dei lăm bơ̆n. Yak năm lăm tơdrong ‘lơ̆ng tơpăt na ưh kơ đei tơdrong ‘mêm gô ưh kơ đei pơm tơ’bôh trŏ gah ‘Bok Kei-Dei, yua kơ tơdrong ‘lơ̆ng tơpăt păng tơdrong ‘mêm ưh kơ layơ tơklah băl. Tơdrong ‘lơ̆ng rơgoh ‘Bok Kei-Dei pơm kơ tơdrong yoch, mălei tơdrong ‘mêm Sư chă tơdrong hơmet ming bơngai pơm yoch. Kră Yang Yêsu pơm tơ’bôh tơdrong ‘nâu ‘lơ̆ng dêh: Sư jur wă pơrăm tơdrong jang yang kơnê̆ păng wă dŏng bơ̆n klaih đơ̆ng tơdrong yoch, đĭ đăng tôm tơdrong ‘noh yua kơ tơdrong ‘mêm tih’Bok Kei-Dei ‘măn kơ bơ̆n.
Tơdrong tơpăt pơtrŭt yua kơ bơ̆n ưh pă jô̆ jâu khan yoch dah ưh pă oei lăm tơdrong yoch dơ̆ng (Rôm 8:1). “Na Sư ưh kơ gơh pơm yoch kư̆m thoi ‘Bă Sư ‘Bok Kei-Dei ưh kơ pơm yoch” (trong 9), wă khan Yang Bơhngol ‘Lơ̆ng gô tơgŭm bơ̆n arih ‘lơ̆ng tơpăt păng ‘mêm mơnat. Mă khan lei ră, ‘nâu kư̆m tơdrong pơlong lăng tih lăm teh đak ‘bĕnh tơdrong yoch ‘nâu. Rim năr lu bơ̆n athei gơnang kơ Yang Bơhngol ‘Lơ̆ng wă hơmet ming tơdrong arih bơ̆n kơdih mă trŏ lăp hăm anăn jing kon tơ’ngla’lơ̆ng tơpăt. Bơ̆n ưh kơ gơh khan tơbăt bơ̆n gah Kră Yang dah tơdrong arih oei blah găn tơdrong ‘lơ̆ng tơpăt Sư păng pơgăn tơdrong ‘mêm Kră Yang ‘măn ăn kơ bơngai nai. Tơdrong arih lu kon Kră Yang athei pơm tơ’bôh tơdrong ‘lơ̆ng tơpăt păng ‘mêm ‘Bok Kei-Dei.
Ơ Kră Yang bơnê kơ Ih yua kơ Ih ăn kơ inh gơh Jing kon Ih. Apinh tơgŭm inh arih pơm tơ’bôh tơdrong ‘lơ̆ng tơpăt Ih lăm tơdrong arih rim năr inh Kraokhan yua Anăn Kră Yang Yêsu Krist, Amen.
Pơm thoi yơ bơ̆n băt bơ̆n jơ̆ kon ‘Bok Kei-Dei?
Đŏk Sơ̆p Hla bơar ‘Bok Kei-Dei lăm pêng sơnăm: Rutơ 2
Kênh Youtube BHKTHN:
