Klei Aê Diê Blŭ: Klei Kbiă 30:1-10
Êlan kliăng: “Brei Ih yap klei kâo wah lač jing msĕ si mnơ̆ng ƀâo mngưi ti anăp Ih; leh anăn klei kâo yơr kngan phă Ih jing msĕ si mnơ̆ng myơr tlam.” (Klei Mmuñ Hđăp 141:2)
Klei êmuh ksiêm mĭn: Si hdră Aê Diê bi hriăm Y-Môis mkra knưl čuh mnơ̆ng ƀâo mngưi leh anăn ti anôk dưi dưm hlăm Sang yang? Ya klei phung khua ngă yang mđing hlăm bruă myơr mnơ̆ng ƀâo mngưi? Si klei yuôm bhăn mơ̆ng bruă myơr mnơ̆ng bâo mngưi anei hlăm klei hdĭp phung anak Aê Diê kkuh mpŭ kơ Ñu? Ya klei hriăm hruê anei mñă kơ drei?
Aê Diê mtô kơ bruă mkra knưl čuh mnơ̆ng bâo mngưi msĕ si knưl mơ̆ng myơr čuh ƀiădah điêt hĭn, hŏng kyâo akasi leh anăn mah doh. Knưl mâo rup mta dhar, awan ñu mâo sa heh (ênoh mkă jing cubit, bi knar hŏng hlăm brô 45cm). Boh dlông dua heh (hlăm brô 90cm), pă ƀĕ ki ti srăng jing sa đrông hŏng ñu. Mah doh luôm anôk tĭng dlông, tĭng djiêu jŭm dar, leh anăn ti pă ƀĕ ki; ngă sa griŏ hŏng mah jŭm dar. Ngă ti gŭ griŏ dua kwang mah tĭng dua nah djiêu leh anăn dưm kwang anăn ti dua nah djiêu čiăng dưi hrô giê hŏng kyâo akasi pioh kkung ñu. Arăng dưm knưl čuh mnơ̆ng ƀâo mngưi ti anăp čhiăm păng dôk giăm hip klei bi mguôp, ti anăp kđhăp klei pap brei dôk ti dlông hip anăn (êlan 6). Sa blư̆ grăp thŭn Khua ngă yang prŏng srăng ngă klei bi doh klei soh kơ pô leh anăn jih djuê ana; êrah mnơ̆ng myơr čuh ăt srăng dưi mmia ti kơ knưl čuh mnơ̆ng ƀâo mngưi leh anăn kyua anăn knưl dưi jing mnơ̆ng doh jăk (êlan 10).
Sĭt phung khua ngă yang myơr mnơ̆ng ƀâo mngưi ti knưl, phung ƀuôn sang kƀĭn ti êngao wah lač (Y-Luk 1:9-10). Mnâo ƀâo mngưi leh anăn asăp ƀâo mngưi đung jing bi hmô kơ klei phung ƀuôn sang Aê Diê wah lač (Klei Mmuñ Hđăp 141:2; Klei Bi Êdah 5:8). Myơr mnơ̆ng ƀâo mngưi ti knưl dua blư̆ hlăm sa hruê jing bruă phung khua ngă yang ngă hlăm jih jang ênuk. Grăp aguah ưm sĭt Y-Arôn mdjiê pui leh anăn kih waih snăn srăng čuh mnơ̆ng ƀâo mngưi, leh anăn grăp tlam mmăt ñu čuh pui anôk doh jăk snăn ăt čuh mnơ̆ng ƀâo mngưi. Klei anei msĕ si klei phung ƀuôn sang Aê Diê wah lač myơr kơ Ñu hlăm grăp aguah ưm leh anăn wĭt mmăt truh.
Y-Arôn čuh mnơ̆ng ƀâo mngưi mdê hjăn Aê Diê ktrâo leh, amâo dưi čuh mnơ̆ng ƀâo mngưi mkăn ôh. Knưl čuh mnơ̆ng ƀâo mngưi brei yua djŏ bruă, amâo yua ôh kơ bruă mkăn msĕ si mnơ̆ng myơr čuh, mnơ̆ng myơr kpŭng ƀhĭ, amâodah mnơ̆ng myơr tuh (êlan 8-9). Đưm dih, Aê Diê amâo brei ôh phung khua ngă yang myơr mnơ̆ng mkăn, hruê anei Ñu ăt kăn mơak mơh hŏng dŭm klei wah lač amâo djŏ guôp hŏng klei Aê Diê jing doh jăk leh anăn bŏ hŏng klei khăp.
Mơ̆ng bruă myơr ƀâo mngưi hlăm ênuk Klei Bi Mguôp Hđăp brei ƀuh Aê Diê mpŭ kơ klei bi mguôp plah wah phung ƀuôn sang Aê Diê hŏng Ñu. Ñu dưm klei wah lač leh anăn wah lač brei kơ drei hlăm giêt mah. Mơ̆ng klei wah lač, klei bi hgŭm drei hŏng Aê Diê ƀrư̆ hruê ƀrư̆ jing sĭt suôr hĭn, drei ăt thâo săng hĭn klei Aê Diê čiăng hdĭp bi mơak kơ Ñu leh anăn bi guh kơang kơ Anăn Ñu.
Si ngă klei hdĭp drei kkuh mpŭ kơ Aê Diê hlăm klei wah lač?
Wah lač: Ơ Aê Diê doh jăk, Pô kiă kriê jih jang mnơ̆ng! Bi mni lač jăk kơ Aê Diê kyua Ih khăp kơ klei kâo wah lač! Akâo kơ Khua Yang hmư̆ klei kâo wah lač grăp aguah ưm leh anăn klei bi mni lač jăk kơ Ih hlăm grăp mlam truh, msĕ si mnơ̆ng myơr mâo mnâo ƀâo mngưi kơ Aê Diê.
Dlăng Klei Aê Diê Blŭ hlăm tlâo thŭn: Y-Yôp 38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
