Khiavdim 30:1-10
Nqe cim:
“Thov txais kuv tej lus thov ua cov tshuaj tsw qab rau koj, thiab kuv ob txhais tes uas tsa thov koj ua cov khoom fij rau koj thaum yuav tsaus ntuj!” (Ntawv Nkauj141:2).
Lus nug rau sawvdaws xav:
- Vajtswv qhia kom Mauxes yuav tsum ua lub thaj hlawv hmoov tshuaj tsw qab zoo licas? Thiab yuav tsum txawb rau qhov chaw twg hauv lub Tsevntaub?
- Cov povthawj yuav tsum ceevfaj yam dabtsi thaum hlawv hmoov tshuaj tsw qab?
- Hlawv hmoov tshuaj tsw qab muaj lub ntsiab licas nyob hauv tus Tswv haivneeg lubneej pehawm tus Tswv?
- Zaj kawm hnub no qhuab ntuas peb txog yam dabtsi?
Ib tsoom cov uas mloog txhua tus,
Vajtswv qhia kom ua lub thaj hlawv hmoov tshuaj tsw qab kuj zoo ib yam li lub thaj hlawv tsiaj theej txhoj tiamsis me dua, siv ntoo kubtwm thiab tseem kub los ua. Lub thaj ua dav xwm fab xwm meem, ntev ib tshim dav ib tshim siab ob tshim, txua plaub tug kub koom hlo rau plaub ceg kaum thaj. Muab tej tseem kub los vuam rau lub thaj sab saud, plaub fab thiab plaub tug kub. Muab kub los ua plaub lub ntsej tis rau ob sab thiab ob tug nqaj kwv yog muab ntoo kubtwm txua los ua thiab muab kub vuam rau kom yoojyim thaum xav kwv mus rau lwm qhov. Lub thaj hlawv hmoov tshuaj tsw qab tau txawb rau ntawm chav dawbhuv ze daim ntaub uas thaiv chav dawbhuv thiab chav dawbhuv kawg nkaus, ncaj ntawm lub Phijxab sab nraud (nqe 6). Ib xyoos ib zaug, tus povthawj hlob thiaj tau mus hauv chav dawbhuv kawg nkaus ua kevcai tua tsiaj theej txhoj rau nws tus kheej thiab tagnrho cov pejxeem; muab tus tsiaj theej txhoj cov ntshav coj los pleev rau lub thaj hlawv hmoov tshuaj tsw qab plaub tug kub ua kev cai ntxuav ib xyoos ib zaug (nqe 10).
Thaum tus povthawj hlawv hmoov tshuaj tsw qab rau saum lub thaj, cov pejxeem sawvdaws yuavtsum sawv sab nraud thov Vajtswv ua ke (Lu-ca 1:9-10). Tej pa tshuaj tsw qab ya ncho lawm saum ntuj ua pivtxwv rau tus Tswv haivneeg tej lus thov tus Tswv (Ntawv Nkauj 141:2; Tshwmsim 5:8). Hlawv hmoov tshuaj tsw qab ib hnub ob zaug yog tes haujlwm uas cov povthawj yuav tsum ua ib tiam dhau ib tiam. Txhua tagkis Aloos tuaj tu cov teeb, thiab thaum yuav tsaus ntuj uas mus taws cov teeb hauv chav dawbhuv, Aloos yuavtsum hlawv hmoov tshuaj tsw qab rau saum lub thaj. Qhov no kuj zoo ib yam li tus Tswv tej menyuam tej lus taij thov Vajtswv txhua tagkis thiab txhua hmo ntag.
Aloos yuav tsum hlawv tej hmoov tshuaj tsw qab uas tus Tswv qhia kom hlawv xwb, tsis pub hlawv lwm yam hmoov tshuaj uas tsis dawbhuv. Kuj tsis pub muab tsiaj lossis qoobloo hlawv rau saum lub thaj ntawd, thiab tsis pub hliv cawv txiv hmab fij rau saum lub thaj ntawd (nqe 8-9). Hnub thaud, tus Tswv tsis pub cov povthawj hlawv tej hmoov tshuaj tsw qab uas tsis dawbhuv, niaj hnub nimno, Tus Tswv kuj tsis txaus siab rau tej lus taij thov uas tsis phim tus Nws tus cwjpwm dawbhuv thiab puv npo txojkev hlub.
Dhau ntawm tus qauv muab hmoov tshuaj tsw qab hlawv fij rau tus Tswv nyob rau tiam Vajluskub Qub qhia peb pom hais tias Vajtswv saib txojkev sib raug zoo ntawm Nws thiab Nws haivneeg ua qhov tseemceeb. Nws muab peb tej lus taij thov thiab tej lus thov sib pab rau hauv tej lub tais kub. Dhau los ntawm kev thov Vajtswv, ua rau kev sib raug zoo ntawm peb thiab Vajtswv haj yam zoo dua qhov qub, peb kuj hnov tus Tswv tej lus zoo duab qub ua tau lubneej haum tus Tswv siab thiab ua rau Nws tau koobmeej.
Thov Vajtswv,
Tus Tswv uas dawbhuv kawg nkaus, Koj yog tus kav tagnrho txhua tsav yam! Nyuam yaus ua Koj tsaug vim Koj nyiam nyuam yaus tej lus taij thov Koj! Thov Koj teb nyuam yaus tej lus thov Koj txhua tagkis thiab teb nyuam yaus tej lus ua Koj tsaug txhua hmo, zoo ib yam li tej hmoov tshuaj tsw qab ncho tuaj txog Koj. Amees.
Ib tsoom cov uas mloog hmov thiab tshua,
Peb lubneej pehawm dhau los ntawm kev thov Vajtswv zoo licas?
Nyeem Vajluskub hauv peb lub xyoo: Yauj 38
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
