Klei Aê Diê Blŭ: Galati 5:22
Êlan kliăng: “Mơak bĕ nanao hlăm Khua Yang. Kâo lŏ mñă mơh, mơak bĕ” (Philip 4:4)
Klei êmuh ksiêm mĭn: Ya gru knăl knuih “hơ̆k mơak” mơ̆ng boh Yang Mngăt Jăk mâo? Si klei bi hmaĭ mơ̆ng klei hơ̆k mơak anăn kơ klei hdĭp phung đaŏ kơ Krist? Si drei bi êdah klei hdĭp hơ̆k mơak nanao hlăm Khua Yang?
Êdei kơ knuih “klei khăp”, snăn knuih “klei hơ̆k mơak” jing knuih tui tluôn kơ Boh Yang Mngăt Jăk. Anei ăt jing sa knuih yuôm bhăn snăk hlăm klei hdĭp phung đaŏ kơ Krist. Knuih anei lač kơ knhuah hdĭp bi êdah brei mâo nanao klei hơ̆k mơak nanao thâodah tuôm hŏng ya mta klei truh hlăm klei hdĭp pô dưn. Knuih “klei hơ̆k mơak” jing klei mơak kluôm dhuôm hlăm Khua Yang Yêsu Krist, leh drei mă tŭ klei bi mtlaih mơ̆ng Khua Yang brei hŏng klei đaŏ. Klei mơak anăn amâo mâo ya mta klei ti êngao dưi hmaĭ ôh kyua jing klei mơak hlăm lam ai tiê tơl bŏ dlai truh ti êngao. Klei hơ̆k mơak anăn jing klei pap mơ̆ng Yang Mngăt Jăk Aê Diê thiê brei kơ phung anak Ñu. Knuih “hơ̆k mơak” dưi bi êdah hŏng dŭm gru knăl msĕ ti tluôn anei:
Tal sa, klei bi mguôp hlŏng lar hŏng Aê Diê: klei hdĭp phung anak Aê Diê srăng bi êdah nanao klei hơ̆k mơak tơdah pô anăn dôk nanao hlăm klei bi mguôp sĭt suôr hŏng Pô Hrih Mjing, Pô Bi Mtlaih, Ñu ăt jing Pô khăp, Pô răng kriê klei hdĭp phung drei. Anăn jing klei mơak dưi krơ̆ng klei bi mtlaih, klei hơ̆k mơak hlăm klei khăp, klei hơ̆k mơak dưi bi grăng hŏng Aê Diê. Anăn jing klei mơak kluôm dhuôm leh anăn amâo mlih ôh tơdah mâo klei bi mguôp nanao hŏng klei “Hơ̆k Mơak Prŏng” hlăm Khua Yang Yêsu Pô Bi Mtlaih lăn ala (Y-Luk 2:10).
Tal dua, ai tiê mơak hlăm djăp klei truh hlăm klei hdĭp: ai tiê mơak jing gru knăl, knuih mâo hlăm lam ai tiê bi êdah hlăm knhuah hdĭp hơ̆k mơak wăt tuôm hŏng ya mta klei truh hlăm klei hdĭp dưn. Hlăk khua ƀĭng kna Y-Pôl mtă “mơak bĕ nanao hlăm Khua Yang” (Philip 4:4), êjai anăn ñu dôk tŭ klei arăng krư̆ kđăl. Khădah, hlăm ai tiê ñu ăt bŏ hŏng klei hơ̆k leh anăn ai tiê mơak hlăm Khua Yang. Boh blŭ “hơ̆k mơak” anăn jing “klei mơak mñai” wăt tơdah hlăm klei rŭng răng. Khua ƀĭng kna Y-Pôl ăt blŭ klă hŏng Y-Timôthê snei “Mâo lu klei tŭ dưn mơ̆ng klei mpŭ kơ Aê Diê mbĭt hŏng ai tiê mơak” (Y-Timôthê 6:6). Sa čô mâo knuih “hơ̆k mơak” mơ̆ng Boh Yang Mngăt Jăk srăng mâo nanao klei hơ̆k mơak hlăm klei hdĭp pô.
Tal tlâo, klei čang hmăng dôk guôn Ƀuôn Ala Mtao guh kơang: phung đaŏ kơ Aê Diê mâo klei čang guôn Ƀuôn Ala Mtao mơ̆ng Klei Aê Diê ƀuăn (Y-Yôhan 14:1-3). Klei čang hmăng anăn ba klei ktang kơ phung anak Aê Diê dưi hdĭp mơak nanao ti krah lăn ala bŏ hŏng klei dleh dlan knap mñai anei. Knuih “hơ̆k mơak” hlăm phung đaŏ kơ Ñu đru bi lar pral hĭn klei đaŏ leh anăn klei čang hmăng dưi mŭt hlăm Ƀuôn Ala Mtao.
Phung đaŏ kơ Krist brei bi êdah klei hơ̆k mơak sĭt hlăm klei hdĭp grăp hruê wăt tơdah tuôm hŏng klei rŭng răng amâo dah lông dlăng. Klei hơ̆k mơak anăn bi hmaĭ prŏng snăk kơ phung riêng gah, đru digơ̆ êpa hmao čiăng dưi mâo klei mơak msĕ si drei.
Drei mâo leh mơ̆ leh anăn bi êdah knuih “klei hơ̆k mơak” hlăm klei hdĭp drei grăp hruê mơ̆?
Ơ Khua Yang, akâo kơ klei hơ̆k mơak mơ̆ng Yang Mngăt Jăk Aê Diê gĭt gai ai tiê kâo, đru kâo bi êdah truh ti êngao čiăng bi lar mnâo ƀâo mngưi mơ̆ng knuih hơ̆k mơak kơ pô mkăn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
