Klei Aê Diê Blŭ: Y-Yôsuê 24:14-15
Êlan kliăng: “Bi kâo leh anăn phung hlăm sang kâo, hmei srăng mă bruă kơ Yêhôwa” (Y-Yôsuê 24:15b)
Klei êmuh ksiêm mĭn: Hlăk hbĭl boh klei truh hlăm klei yăl dliê anei? Ya mta klei Y-Yôsuê hưn bi êdah klei ñu ƀuăn, leh anăn si klei ƀuăn anăn bi hmăi kơ phung ƀuôn sang? Si drei dưi ƀuăn msĕ si Y-Yôsuê?
Boh klei truh hlăm klei yăl dliê anei hlăk phung ƀuôn sang mŭt leh hlăm Čar Aê Diê Ƀuăn, Y-Yôsuê mduôn khua, giăm djiê leh. Ñu iêô bi kƀĭn jih jang găp djuê phung Israel, čiăng lŏ bi êdah klei ñu ƀuăn kat asei bi mguôp sĭt suôr hŏng Yêhôwa (Y-Yôsuê 24:1). Êlâo kơnăn, hlăk gưl tal êlâo klei bi blah, Y-Yôsuê bi kƀĭn leh jih jang phung ƀuôn sang hriê ti krĭng anei, mkŏ mjing knưl ngă yang kơ Yêhôwa ti čư̆ Êbal leh anăn myơr mnơ̆ng myơr čuh mbĭt hŏng mnơ̆ng myơr kơ klei êđăp ênang. Ñu ktuê răk jih boh blŭ hlăm hdruôm hră klei bhiăn, mâo hlăm anăn wăt klei hơêč hmưi tơdah diñu gưt asăp leh anăn klei tăm pah tơdah diñu amâo dôk sĭt suôr (Y-Yôsuê 8:30-35).
Hlăm klei bi tuôm hŏng phung ƀuôn sang tal êdei hĭn anei, Y-Yôsuê hưn êlâo brei phung ƀuôn sang Israel răng bĕ, khut khat lui hĕ phung rup yang phung aê đưm diñu kkuh mpŭ, ƀiădah “ară anei huĭ mpŭ bĕ kơ Yêhôwa, leh anăn mă bruă kơ Ñu hŏng klei ênuah leh anăn hŏng klei sĭt suôr”. Ñu hưn klă, wăt tơdah diñu kkuh kơ phung rup yang msĕ si phung aê đưm diñu, amâodah rup yang mơ̆ng čar Êjip dưn, bi ñu leh anăn phung hlăm sang ñu ăt kkuh mpŭ knŏng hjăn kơ Aê Diê Yêhôwa: “Bi kâo leh anăn phung hlăm sang kâo, hmei srăng mă bruă kơ Yêhôwa” (êlan 14-15). Phung ƀuôn sang Israel đăo kơ jih klei Y-Yôsuê leh anăn phung hlăm sang ñu ƀuăn knŏng mă bruă hjăn kơ Aê Diê Yêhôwa jing sĭt klă snăk, kyua ktuê jih thŭn mlan êgao nao mbĭt hŏng ñu, dơ̆ng mơ̆ng kbiă mơ̆ng čar Êjip leh anăn ksŭng mŭt hlăm čar Aê Diê Ƀuăn, phung ƀuôn sang leh anăn phung khua mduôn ƀuh klă sĭt knuih ñu sĭt suôr hŏng Aê Diê leh anăn khut khat gưt ngă hlue Klei Aê Diê mtă, “Tui si Yêhôwa mtă leh kơ Y-Môis dĭng buăl Ñu, snăn Y-Môis mtă kơ Y-Yôsuê, leh anăn Y-Yôsuê ngă snăn. Ñu amâo kƀah ôh ngă sa mta mơ̆ng jih jang klei Yêhôwa mtă leh kơ Y-Môis.” (Y-Yôsuê 11:15). Êlâo kơ djiê, Y-Yôsuê hưn klă leh klei ñu ƀuăn dôk sĭt suôr, amâo djŏ knŏng kơ hjăn păn ñu ƀiădah wăt mbĭt hŏng phung hlăm sang ñu msĕ mơh, “Kâo leh anăn phung hlăm sang kâo, hmei srăng mă bruă kơ Yêhôwa”.
Klei bi hmô dôk sĭt suôr mơ̆ng phung hlăm sang Y-Yôsuê bi hmăi jăk kơ jih jang gưl ênuk hlăm phung ƀuôn sang, “Phung Israel mă bruă kơ Yêhôwa jih ênuk Y-Yôsuê leh anăn jih ênuk phung khua mduôn dôk hdĭp sui hĭn kơ Y-Yôsuê, thâo leh jih klei Yêhôwa ngă leh kơ phung Israel.” (Y-Yôsuê 24:31). Klei yăl dliê kơ phung hlăm sang Y-Yôsuê đru brei kơ drei klei hriăm, sa gŏ sang hur har khăp kơ Khua Yang leh anăn dôk sĭt suôr hŏng Ñu srăng bi hmăi jăk kơ jih jang phung ƀuôn sang.
Čiăng kơ drei dưi jhŏng bi êdah klei drei ƀuăn ti anăp jih jang mnuih snei, “Kâo leh anăn phung hlăm sang kâo, hmei srăng mă bruă kơ Yêhôwa”, êlâo hĭn brei drei pô yơh jing pô dôk sĭt suôr hŏng Khua Yang, leh anăn jih ai tiê mă bruă kơ Khua Yang. Êngao kơnăn, brei drei mâo bruă klam kăp dlăng ba klei hdĭp myang kơ phung anak čô drei, čiăng kơ jih jang phung hlăm sang drei lŏ čuê nanao klei bhiăn mơ̆ng phung aê drei, dôk sĭt suôr leh anăn hŏng jih ai tiê mă bruă kơ Khua Yang.
Si ngă drei jih ai tiê uêñ mĭn dlăng ba klei hdĭp myang kơ phung anak čô drei pô mơ̆?
Wah lač: Ơ Ama hmei khăp, akâo Ih đru čiăng kơ kâo pô leh anăn anak čô kâo hur har nanao dôk sĭt suôr kkuh mpŭ leh anăn mă bruă kơ Khua Yang, bi hmô jăk kơ Phung Sang Aê Diê Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
