Klei Aê Diê Blŭ: Rôm 9:24-29
Êlan kliăng: “Phung amâo jing phung ƀuôn sang Kâo ôh, Kâo srăng pia ‘phung ƀuôn sang Kâo,’ leh anăn pô Kâo amâo khăp ôh, Kâo srăng pia ‘pô Kâo khăp’” (Rôm 9:25b)
Klei êmuh ksiêm mĭn: Hlei phung Aê Diê iêô leh brei jing phung ƀuôn sang Ñu? Khua ƀĭng kna Y-Pôl hrêč yua klei hưn êlâo hlăm hdruôm hră Y-Ôsê leh anăn Y-Êsai kơ ya klei kñăm čiăng? Ya klei Aê Diê blŭ mtô kơ drei mơ̆ng klei hriăm hruê anei?
Hlăm êlan 24, Khua ƀĭng kna Y-Pôl lŏ mñă sa klei yuôm bhăn snăk jing Aê Diê pŏk leh ƀăng bhă, ruah sa phung găp djuê kơ Ñu pô êngao ti phung Israel. Khua Yang Yêsu pô bi rai leh mnư̆ bi kgăn plah wah phung Israel hŏng phung găp djuê mkăn. Ñu bi tuôm leh hŏng mniê Samari ti kbăng êa, hưn kơ gơ̆ thâo êa klei hdĭp leh anăn bi êdah Ñu pô kơ gơ̆. Mơ̆ng klei gơ̆ hưn, mâo lu phung Samari hriê kơ Khua Yang Yêsu leh anăn mă tŭ Ñu jing Pô Bi Mtlaih digơ̆ (Y-Yôhan 4:1-42). Klei mtă prŏng Khua Yang Yêsu mtă leh kơ phung ƀĭng kna Ñu snei: “Kyuanăn nao bĕ diih mjing phung ƀĭng kna hlăm jih jang găp djuê mnuih, ngă ƀaptem kơ diñu hlăm anăn Ama, anăn Anak, leh anăn anăn Yang Mngăt Jăk” (Y-Mathiơ 28:19).
Êlan 25 leh anăn êlan 26 Khua ƀĭng kna Y-Pôl hrêč mă yua mơ̆ng hdruôm hră Y-Ôsê 2:23 leh anăn 1:10. Tơdah phung Israel amâo dôk sĭt suôr hŏng Aê Diê, kkuh mpŭ kơ rup yang mkăn, digơ̆ tŭ klei Aê Diê bi kmhal. Aê Diê amâo lŏ pia kơ digơ̆ jing phung ƀuôn sang Aê Diê ôh, ƀiădah truh ti ênuk Aê Diê pap kơ digơ̆, Ñu lŏ bi kơrŭ klei hdĭp myang digơ̆ leh anăn lŏ bi wĭt kơ digơ̆ klei jing phung ƀuôn sang Ñu khăp hơiêng. Kyuadah phung ƀuôn sang Aê Diê ruah mrâo jing jih jang phung đăo kơ Yêsu tar ƀar lăn ala, kyuanăn klei hưn êlâo anei amâo bi kdriêl knŏng hjăn kơ phung Israel ôh. Khua ƀĭng kna Y-Pôl bi hdơr kơ jih jang phung đăo Aê Diê jing Pô bŏ hŏng klei pap, mâo klei myang dưi bi êun ai tiê khăng leh anăn Ñu čiăng jih jang găp djuê mnuih wĭt kơ Ñu mă tŭ klei bi mtlaih, jing phung anak Ñu khăp êdimi.
Msă mơh, Khua ƀĭng kna Y-Pôl lŏ bi hdơr kơ klei Khua pô hưn êlâo Y-Êsai hưn sa klei sĭt nik bŏ hŏng klei ênguôt, anăn jing: Wăt tơdah ênoh yap phung anak Israel jing lu msă si čuah ti êa ksĭ, ƀiădah knŏng sa kdrêč diñu adôk srăng tlaih. Anăn jing phung Israel đăo kơ Yang Krist. Khua Yang srăng bi sĭt Klei Ñu Blŭ djăl leh anăn ênŭm (êlan 27-28; Y-Êsai 10:20-23). Klei anei ăt djŏ kơ jih jang găp djuê mnuih mơh, msă si klei Khua Yang Yêsu lač snei: “Mŭt bĕ ti ƀăng jang kniă; kyuadah ƀăng jang ƀai leh anăn êlan prŏng atăt ba kơ klei rai luč, leh anăn phung mŭt tinăn jing lu. Bi ƀăng jang điêt leh anăn êlan kniă atăt ba kơ klei hdĭp, leh anăn jing ƀiă phung thâo bĭt ƀăng jang leh anăn êlan anăn” (Y-Mathiơ 7:13-14). Khua ƀĭng kna Y-Pôl lŏ mñă klei Aê Diê pap ăt adôk kơ phung găp djuê ñu, tơdah amâo djŏ snăn ôh sĭt nik phung ƀuôn sang Israel ăt srăng tŭ klei bi rai msă si ƀuôn Sôđôm leh anăn ƀuôn Gômôrơ mơh (êlan 29; Y-Êsai 1:9). Sĭt nik, tơdah Aê Diê amâo mâo pap ôh snăn pui boh tâo pui srăng ƀơ̆ng sơăi jih jang mnuih!
Snăn yơh, klei Aê Diê pap brei leh kơ jih jang găp djuê mnuih, kơ phung Yuđa wăt kơ jih jang găp djuê mnuih ti lăn ala jing phung mă tŭ Yêsu Krist jing Pô Bi Mtlaih kơ klei hdĭp digơ̆.
Ya klei drei čuăn ngă tơdah thâo kral klei pap amâo mâo knhal Aê Diê?
Wah lač: Ơ Aê Diê, Pô jăk leh anăn bŏ hŏng klei pap, amâo djăl ăl, pap brei leh anăn gĭr hŏng kâo lu snăk! Akâo Khua Yang mơĭt klei bi êrâo ai tiê kơ grăp čô mnuih tar ƀar lăn ala, đru kâo jing pô hưn hur har atăt ba lu mnuih mâo ai tiê khăng lŏ jing êdu êun, khăp mă tŭ Klei Mrâo Mrang Jăk. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
