Loos 9:24-29
Nqe cim:
“Cov neeg uas tsis yog kuv cov, kuv yuav hu ua ‘kuv cov, thiab haivneeg uas kuv tsis hlub, kuv yuav hu ua ‘Haivneeg uas kuv hlub” (Loos 9:25b).
Lus nug rau sawvdaws xav:
– Vajtswv tau hu txhua tus twg los ua Vajtswv haivneeg?
– Timthawj Paulus qiv tej lus cev hauv Hauxeyas thiab Yaxayas los rau lub homphiaj twg?
– Vajtswv hais dab tsi rau peb dhau zaj kawm no?
Hauv nqe 24, Timthawj Paulus rov hais txog ib yam tseemceeb uas yog Vajtswv tau qhib qhov rooj xaiv ib haiv neeg los rau Vajtswv tsis yog los ntawm haivneeg Yixalayees. Tswv Yexus twb tsoo phab ntsa uas quas cov Yixayees thiab lwm haiv neeg lawm. Tswv Yexus tau mus cuag ib tug pojniam Xamalis ntawm ib lub qhov tshij, thiab qhia rau tus pojniam ntawd txog cov dej uas cawm txojsia, thiab qhia Nws rau tus pojniam ntawd paub. Dhau los ntawm tus pojniam Xamalis no tej lus ua timkhawv muaj coob tug neeg Xamalis tuaj cuag Yexus thiab ntseeg txais Nws ua lawv tus Tswv Cawmseej (Yauhas 4:1–42). Tswv Yexus lolus samhwm rau nws cov thwjtim hais tias: “Yog li ntawd, nej cia li tawm mus qhia txhua haivneeg hauv qab ntuj no, kom lawv los ua kuv cov thwjtim: Nej yuav tsum tuav Vaj Leej Txiv, Vaj Leej Tub thiab Vaj Ntsujplig tus Dawbhuv lub npe, muab lawv ua kevcai raus dej” (Mathais 28:19).
Hauv Loos 9:25-26 yog Timthawj Paulus qiv hauv Hauxeyas 2:23 thiab 1:10 los. Yog lub sihawm uas haivneeg Yixalayees tsis ncaj ncees rau Vajtswv thiab mus pe lwm haivneeg tej mlom, lawv thiaj raug Vajtswv rau txim. Lawv tsis tau hu ua Vajtswv haiv neeg lawm, tiamsis thaum txog lub sijhawm uas Vajtswv hlub tshua lawv, Nws yuav kho lawv sab ntsujplig thiab pub rau lawv rov tau ua Nws haivneeg dua. Vajtswv haivneeg tshiab yog tagnrho txhua tus uas ntseeg Tswv Yexus, yog li ntawd, nqe cev lus no tus nrim xaiv ua Vajtswv haivneeg tsis yog kawg rau cov Yixlayees xwb. Timthawj Paulus tau ntuas txhua tus ntseeg hais tias Vajtswv yog tus muaj kev hlub, zam txim thiab muaj txaus hwjchim hloov txhua tus uas muaj lub siab tawv kom tig rov qab los cuag Vajtswv txais yuav kev cawmdim thiab ua Nws menyuam.
Timthawj Paulus rov hais txog tej lus Yaxayas tau hais lawm, yog ib qhov uas tsimnyog tu siab: “Txawm yog cov Yixalayees coob heev npaum li tej suabzeb ntawm ntug hiavtxwv los tsuas muaj qee leej thiaj yuav dim xwb” Ntawd yog cov Yixayee uas ntseeg Tswv Yexus. Vajtswv yuav ua kom tiav Nws tej lus sai sai (nqe 27-28; Yaxayas 10:20-23). Thiab qhov no kuj siv rau txhua haivneeg, li Yexus qhia: “Nej yuav tsum mus lub qhovrooj nqaim, rau qhov lub qhovrooj loj thiab txojkev dav coj mus rau ntujtawg thiab muaj coob leej taug txojkev ntawd, tiamsis lub qhovrooj nqaim thiab txojkev me uas mus nyuaj yuav coj mus tau txojsia, cov neeg uas taug txojkev ntawd tsis muaj coob leej.” (Mathais 7:13-14). Timthawj Paulus tau hais tias Vajtswv tseem ua siab ntev thiab hlub tshua txog nws haivneeg. Yog Vajtswv tsis hlub ces Nws twb rhuav puastsuaj zoo li lub nroog Xaudoos thiab lub nroog Kaumaulas lawm (nqe 29; Yaxayas 1:9). Tseeb tiag, yog Vajtswv tsis hlub tshua, ces txhua tus puavleej yuav raug hluav taws kub tas huv tibsi!
Yog li ntawd, Vajtswv kev hlub muaj pub rau txhua haivneeg, rau cov Yixlayees thiab txhua haivneeg hauv lub ntiajteb no uas yog txhua tus uas los ntseeg txais yuav Tswv Yexus ua lawv tus cawmseej lawm.
Thov Vajtswv:
Vajtswv, Tus uas muaj lub siab ntev,hlub tshua, tsis chim sai thiab muaj lub siab dawb siab zoo rau nyuam yaus! Thov Koj coj tibneeg ntiajteb rov los cuag Koj, thov tshoov nyuan yaus lub siab mus ua timkhawv rau txhua tus uas muaj lub siab tawv kom dhau los muaj lub siab mos muag thiab txais yuav Txoj Moo Zoo. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb txiav txim siab yuav ua dab tsi thaum uas kawm paub txog Vajtswv txoj kev hlub uas tsis muaj nrim?
Nyeem Vajluskub hauv peb lub xyoos: Yausuas 22
Kênh Youtube BHKTHN:
