Klei Aê Diê Blŭ: Klei Kbiă 32:15-20
Êlan kliăng: “Y-Môis mă rup êđai êmô diñu ngă leh anăn čuh hlăm pui, ñu bi ƀhĭ gơ̆ jing ƀhơ̆k, leh anăn tuh ƀhơ̆k anăn ti êa, leh anăn brei phung ƀuôn sang Israel mnăm” (Klei Kbiă 32:20).
Klei êmuh ksiêm mĭn: Ya jing dua pŏk mdhă leh anăn si ênoh yuôm ñu? Ya Y-Môis ngă leh ƀuh phung ƀuôn sang Aê Diê kkuh kơ rup êmô mah? Mơ̆ng klei ngêñ leh anăn klei Y-Môis ngă ya klei mñă kơ drei? Si drei bi mĭn kơ klei ngêñ kpă ênô?
Dua pŏk mdhă hŏng boh tâo anei Aê Diê pô ktur Pluh Mta Klei Bhiăn jing klah čŭn klei bhiăn Aê Diê brei kơ phung ƀuôn sang Israel. Dua pŏk mdhă jing boh tŭ yuôm bhăn leh anăn klei yuôm bhăn snăk mâo khua gĭt gai Y-Môis ba wĭt leh pă pluh hruê mlam Aê Diê bi hriăm ti čư̆ Sinai.
Mơ̆ng kbưi, Y-Môis leh anăn Y-Yôsuê hmư̆ leh asăp phung ƀuôn sang Aê Diê ur driâo, Y-Yôsuê bi mĭn hlăm êpul kahan mâo klei bi blah ƀiădah Y-Môis thâo anăn jing klei kdŏ mmuñ kyua Aê Diê brei ñu thâo ya bruă dôk mâo ti krah phung ƀuôn sang Aê Diê. Bi mguôp hŏng Klei Kbiă 24, drei thâo Y-Yôsuê hrăm mbĭt hŏng nai pô đĭ čư̆ ƀiădah ñu amâo nao hlăm knam bi tuôm hŏng Aê Diê ôh ƀiădah knŏng dôk guôn Y-Môis mơ̆ng kbưi. Snăn hlăm phung Israel knŏng mâo Y-Môis leh anăn Y-Yôsuê sĭt suôr hŏng Aê Diê, amâo čhŭ luă hlăm bruă kkuh kơ rup êmô mah.
Ƀuh phung ƀuôn sang Aê Diê dôk bi ur driâo kkuh kơ rup êmô mah, Y-Môis đĭ ai ngêñ, kbĭr dua pŏk mdhă mơ̆ng kngan pô hlăm jơ̆ng cư̆ mčah jih, klei anei bi hmô kơ klei bi mguôp hŏng Aê Diê luč rai kyua klei soh. Leh anăn ñu mă rup êmô mah čuh hlăm pui, ñu bi ƀhĭ gơ̆ jing ƀhơ̆k, leh anăn tuh ƀhơ̆k anăn ti êa, leh anăn brei phung ƀuôn sang Israel mnăm. Anei jing klei ngêñ kpă ênô, klei ngêñ kyua klei Y-Môis khăp. Ñu ngêñ snăk kơ bruă ngă soh hmăi amâo jăk kơ Aê Diê leh anăn kơ pô mkăn, kyua kkuh kơ rup yang jing klei Aê Diê kăm. Wăt tơdah rup êmô êmah tuh hŏng mah ƀiădah ñu rai jih leh! Rup yang jing mnơ̆ng hơăi mang, amâo dưi răng mgang kơ ñu pô ôh snăn si thâo răng mgang pô mkăn! Phung ƀuôn sang Aê Diê mnăm êa ƀruih êmô mah čiăng hdơr kơ klei hêñ diñu tuôm bi kdơ̆ng leh anăn amâo mpŭ kơ Aê Diê.
Wăt tơdah Y-Môis dưi lač “Y-Môis jing sa čô êkei luă gŭ hĭn kơ jih jang mnuih ti rŏng lăn ala” (Klei Yap 12:3), ƀiădah hlăm klei ñu ngêñ, ñu amâo dưi ư̆ ăn ôh bruă pô ngă anăn kbĭr mčah dua pŏk mdhă klei bhiăn Aê Diê. Hruê anei, năng ai mâo mmông kyua đĭ ai hlăm bruă Aê Diê drei ăt mâo klei ngêñ kpă ênô, khădah snăn, brei jih ai tiê thâo răng, akâo kơ Aê Diê brei klei thâo mĭn, huĭdah drei amâo dưi ư̆ ăn pô, bi kdơ̆ng đei ngă mâo klei amâo jăk. Y-Yakơ mtô: “Ơ phung ayŏng adei kâo khăp, brei diih thâo klei anei: brei jih jang mnuih djăl hmư̆, amâo ruăt blŭ, amâo djăl ăl, kyuadah klei mnuih ăl amâo dưi bi truh ôh klei kpă ênô Aê Diê” (Y-Yakơ 1:19, 20).
Drei mâo klei bi kdơ̆ng êgao hnơ̆ng mơ̆ sĭt tuôm hŏng klei ngêñ kpă ênô?
Wah lač: Ơ Khua Yang! Akâo kơ Ih đru kâo bi êmut kơ klei soh leh anăn lui ñu. Akâo kơ Ih đru kâo thâo mĭn leh anăn thâo răng, blŭ tlao bi djŏ sĭt mâo klei ngêñ kpă ênô, čiăng kơ kâo amâo ngă soh ôh čiăng êdei anăp amâo lŏ hơưi.
Dlăng Klei Aê Diê Blŭ hlăm tlâo thŭn: Y‑ Êsai 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
