Khiavdim 32:15-20
Nqe cim:
“Nws coj tus mlom nyuj uas lawv nchuav ntawd mus hlawv, muab zom ua hmoov mos mos, thiab muab tov dej rau cov Yixalayees haus” (Khiavdim 32:20).
Lus nug rau sawvdaws xav: Ob daim txiag zeb yog dabtsi thiab muaj nqis li cas? Mauxes tau ua li cas thaum pom tus Tswv haivneeg pe tus mlom nyuj? Qhov uas Mauxes chim thiab ua li ntawd qhia rau peb yam dabtsi? Peb xav li cas txog qhov kev chim ncaj ncees?
Ob daim txiag zeb yog Vajtswv txhais tes sau Kaum Nqe Kevcai, yog sau zog lub ntsiab lus loj ntawm cov kevcai uas tus Tswv muab rau cov neeg Yixalayees coj. Ob daim txiag zeb yog yam uas muaj nqis thiab tseemceeb heev rau Mauxes, vim nws mus ntsib tus Tswv saum roob Xinaiss tau plaub caug hnub plaub caug hmo.
Tuaj deb, Mauxes thiab Yausuas hnov cov pejxeem qw ua tsuj ua tsaug, Yausuas xav hais tias nram lub yeej muaj kev sib ntaus sib tua, tiamsis Mauxes paub hais tias qhov ntawd yog lub suab hu nkauj, vim tus Tswv twb qhia rau nws paub tej haujlwm uas tabtom tshwmsim nyob hauv cov pejxeem. Saib ntxiv Khiavdim 24, peb pom hais tias Yausuas nrog Mauxes nce mus pem roob tiamsis nws tsis tau mus hauv tauvhuab ntsib Vajtswv, tsuas yog nyob tos Mauxes xwb. Yog li ntawd, nyob hauv cov neeg Yixalayees tsuas tshuav Mauxes thiab Yausuas nkawd thiaj tseem ncaj ncees rau tus Tswv, tsis pe tus mlom nyuj xwb.
Pom lub caij nyoog tus Tswv haivneeg qw ua tsuj ua tsaug pe tus mlom nyuj, Mauxes chim heev, nws thiaj muab ob daim txiag zeb ntawm nws tes ntsawm tawg ntsoog ntxaws, tus duab no qhia paub lawv txojkev sib raug zoo ntawm Vajtswv raug kev txhaum muab rhuav. Mauxes muab tus mlom nyuj uas lawv nchuav ntawd mus hlawv thiab muab zom ua hmoov mos mos, muab tov dej rau cov neeg Yixalayees haus. Qhov no yog kev chim ncaj ncees, Mauxes chim vim yog hlub lawv. Nws chim heev rau tej haujlwm uas lawv ua yuam kev puas tus Tswv lub npe, vim pemlom yog tawmtsam Vajtswv. Txawm yog tus mlom ntawd yog muab kub ua los nws yuav raug kub hnyiab ua hmoov tas! Mlom tsis muaj qabhau, tiv thaiv tsis tau nws tus kheej ces yeej pab tsis tau leejtwg li! Tus Tswv haivneeg yuav tsum haus tus mlom nyuj cov hmoov kom nco ntsoov qhov kev txajmuag uas lawv tau ua tawmtsam thiab tsis hwm tus Tswv.
Txawm yog Mauxes tau muab hu ua tus neeg “txo hwjchim tshaj plaws tej neeg uas nyob hauv qab ntuj no huv tibsi” (Teev Npe 12:3), los thaum nws chim nws tswj tsis taus nws tus kheej, yog li nws thiaj muab daim txiag zeb uas sau tus Tswv Kaum Nqe Kevcai ntsawm tawg ntsoog ntxaws. Nimno, muaj qee lub sijhawm vim kub siab lug ua tus Tswv tes haujlwm peb kuj muaj tej qhov kev chim npautaws ncaj ncees, tiamsis yuav tsum ua tib zoo ceevfaj, thov tus Tswv pub tswvyim rau peb, yog tsis ua li nyob tsam peb tswj tsis tau peb tus kheej, cia ua tej yam uas tsis tsimnyog ua. Yakaunpaus qhia hais tias:“ Cov kwvtij uas kuv hlub, nej yuav tsum nco ntsoov hais tias txhua tus yuav tsum kub siab lug mloog, tiamsis tsis txhob maj hais thiab tsis txhob chim sai. Rau qhov peb tej kev chim yeej pab tsis tau kom peb ua tau neeg ncaj ncees raws li Vajtswv lub siab nyiam” (Yakaunpaus 1:19-20).
Thov Vajtswv,
Tus Tswv! Thov Koj pab kom nyuam yaus ntxub kev txhaum thiab qaij deb. Thov Leej Txiv pub rau nyuam yaus muaj tswvyim thiab ua tib zoo ua thaum muaj kev chim, kom nyuam yaus tsis ua qhov yuam kev. Amees.
Peb puas ua dhau cai thaum yus muaj kev chim siab?
Nyeem Vajluskub hauv peb lub xyoos: Yaxayas 23
Kênh Youtube BHKTHN:
