Klei Ngă Jăk Kơ Y-Jônathan – 6/6/2021

913

                                                   

 

Klei Aê Diê Blŭ: II Y-Samuel 9:1-13

 

Êlan kliăng: “Y-Đawit lač, Ăt dôk mơ̆ sa čô hlăm sang Y-Sôl čiăng kơ kâo dưi bi êdah kơ ñu klei ngă jăk kyua Y-Jônathan?” (II Y-Samuel 9:1).

 

Klei êmuh ksiêm mĭn: Tui si hdruôm hră Klei Aê Diê Blŭ, si mblang klei jăk, jing? Ya ngă Mtao Y-Đawit lŏ hdơr wĭt leh anăn ngă klei jăk kơ Y-Jônathan, anak êkei mtao? Ya klei Mtao Y-Đawit ngă leh čiăng bi êdah klei jăk hŏng mah jiăng ñu? Ya klei hriăm drei mă tŭ mơ̆ng ai tiê Mtao Y-Đawit?

Tui si klei mblang hlăm Klei Aê Diê Blŭ, ai tiê jăk [chesed (Hêbrơ); chrestotes (Grek)] kbiă mơ̆ng klei khăp sĭt (I Kôrantô 13:4) bi êdah hŏng bruă ngă čiăng ba klei tŭ dưn kơ pô mkăn, khă klei bhiăn amâo čuăn mgô̆ brei ngă ôh dưn, leh anăn ăt kăn hmăng hmưi mâo klei lŏ hdơr knga ba wĭt rei. Sa klei bi hmô hlăm Klei Bi Mguôp Hđăp jing klei yăl dliê kơ Mtao Y-Đawit bi êdah klei ngă jăk kơ Y-Jônathan anak mtao, čih yăl dliê hlăm hdruôm hră II Y-Samuel 9:1-13.

Hlăk êlâo dih, êkei dam Y-Đawit leh anăn Y-Jônathan anak mtao jing dua čô mah jiăng sĭt suôr thâo bi khăp snăk. Y-Jônathan anak mtao thâo kơ mah jiăng ñu Y-Đawit, Aê Diê trôč leh êa ƀâo mngưi brei jing mtao hrô kơ ama ñu pô, leh anăn ăt ñu thâo klă mơh Mtao Y-Sôl duah êlan čiăng bi djiê Y-Đawit kyua klei nač iăng (I Y-Samuel 18:6-9), kyuanăn yơh ñu đru Y-Đawit nao đuê̆ dăp. Êlâo kơ diñu dua bi ktlah, Y-Đawit kat sei ƀuăn, sa hruê êdei srăng ngă jăk kơ Y-Jônathan anak mtao leh anăn kơ phung anak čô gơ̆ (I Y-Samuel 20:14-17). Dơ̆ng mơ̆ng năn yơh, Mtao Y-Sôl knhur knhar tui tiŏ Y-Đawit, ngă kơ gơ̆ hiu hdĭp rah rưng lu anôk mdê mdê, tui đuê̆ dăp nanao đrông msĕ si sa čô mnuih hdĭp ti êngao klei bhiăn. Êdei tinăn, hlăm klei bi blah hŏng phung Philistin, Mtao Y-Sôl mbĭt hŏng Y-Jônathan anak ñu, djiê sơăi. Leh anăn, Y-Đawit dưi trôč êa ƀâo mgưi brei jing mtao kluôm jih čar Israel (II Y-Samuel 5:3), mjing Yêrusalem jing ƀuôn phŭn kơ ala čar, bi buôn mŭt phung čar riêng gah, leh anăn ala čar Israel jing ktang mdrŏng sah.

Hlăk anăn, Mtao Y-Đawit hdơr kơ mah jiăng ñu Y-Jônathan anak mtao leh anăn čiăng ngă jăk kơ găp djuê gơ̆, wăt tơdah Mtao ama Y-Jônathan tui tiŏ duah čiăng bi mdjiê Mtao Y-Đawit pô, ngă kơ klei hdĭp ñu lu thŭn dleh knap snăk. Mtao Y-Đawit ăt amâo đuôm ai ăl čôñ ôh, hrô kơ klei anăn, ñu bi êdah klei ngă jăk kơ Y-Jônathan msĕ si klei ñu tuôm ƀuăn leh hŏng gơ̆, kyua ƀĭng găp ñu Y-Jônathan, snăn Mtao Y-Đawit ngă jăk kơ anak gơ̆ êwiên anăn gơ̆ Y-Mêphibôset hjăn păn gơ̆ adôk hdĭp mơ̆ng găp djuê Mtao Y-Sôl. Mtao Y-Đawit lač kơ Y-Mêphibôset: “Đăm huĭ ôh; kyuadah kâo srăng bi êdah kơ ih klei jăk kyua ama ih Y-Jônathan, leh anăn kâo srăng lŏ bi wĭt kơ ih jih lăn Y-Sôl aê ih. Leh anăn ih srăng huă ƀơ̆ng ti jhưng huă kâo nanao.” (êlan 7).

Mtao Y-Đawit mâo mmông găl dưi rŭ ênua, ƀiădah ñu amâo đuôm ai djă pioh klei ăl čôñ hlăm ai tiê ôh, kyuadah ñu thâo tơdah ngă jhat kơ pô mkăn knŏng bi jhat kơ pô đuč yơh, ƀiădah ngă jăk kơ pô mkăn jing tŭ dưn kơ drei pô wăt kơ mngăt drei pô mơh, msĕ si Klei Aê Diê Blŭ mtô leh hlăm Klei Bi Hriêng 11:17: “Mnuih jăk ngă jăk kơ mngăt ñu pô, ƀiădah mnuih jhŏng ƀai bi rŭng kđeh ñu pô.” Jing anak Aê Diê Pô Jăk, brei drei ngă jăk hŏng jih jang mnuih wăt kơ phung ngă roh hŏng drei.

 

Si ngă drei tuôm bi knal leh mơ̆ klei hdĭp mâo klei mơak tơdah drei ngă jăk kơ pô mkăn?

 

Ơ Khua Yang, bi mni kơ Ih yua leh klei bi hmô mơ̆ng klei hdĭp ngă jăk Mtao Y-Đawit čiăng mtô bi hriăm kâo. Akâo kơ Ih brei kâo dôk hdĭp ngă jăk kơ jih jang mnuih, čiăng kơ diñu thâo kral klei jăk Khua Yang mơ̆ng klei hdĭp kâo.

 

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: Klei Yap 26:1-37

Kênh Youtube BHKTHN:

https://www.youtube.com/channel/UCaSY8ebjVfMKhPups5jZ9yw

Bài trướcUBYTXH – Thư Kêu Gọi Dự Phần Vào Quĩ Mua Vaccine
Bài tiếp theoĐối Xử Nhân Từ Với Giô-na-than – 6/6/2021