Klei Aê Diê Blŭ: Klei Bi Hriêng 27:5-6
Êlan kliăng: “Klei ƀuah ti anăp jing yuôm hĭn kơ klei khăp mdăp” (Klei Bi Hriêng 27:5).
Klei êmuh ksiêm mĭn: Si Mtao Salômôn bi msĕ “klei ƀuah ti anăp” hŏng “klei khăp mdăp”? Si ñu bi msĕ mah jiăng sĭt leh anăn mah jiăng luar? Si knuih brei drei mâo tơdah hmư̆ klei ƀuah mơ̆ng Khua Yang leh anăn mơ̆ng phung huĭ mpŭ kơ Khua Yang?
Dua êlan Klei Bi Hriêng hruê anei arăng bi mguôp diñu hŏng dŭm pruê̆ blŭ dăp bi klăk čiăng bi êdah klă klei khăp mah jiăng sĭt, anăn jing “klei ƀuah ti anăp” hŏng “klei khăp mdăp”, “Klei sa čô mah jiăng bi êka jing năng knang hĭn” hŏng “kơ êbâo klei pô roh čŭm”.
Êlan 5 jing klei bi msĕ “klei ƀuah” jing yuôm hĭn kơ “klei khăp mdăp”. Klei khăp brei mâo klei bi êdah, leh anăn tăp năng klei bi êdah klei khăp klă hĭn jing boh blŭ mkra mjuăt hŏng klei sĭt nik, tăp năng wăt hŏng klei khăng mơh. Ƀuah hŏng asăp blŭ êdu leh anăn hŏng klei sĭt nik blŭ čiăng đru, srăng đru bi mlih knuih klei jing leh anăn bi kjăp klei bi mguôp. Klei ƀuah ti anăp leh anăn bŏ hŏng klei khăp srăng mâo klei tŭ; ƀiădah khăp hŏng klei mdăp amâo mâo klei tŭ dưn ôh. Khăp mdăp, wăt tơdah mâo klei mĭn jăk dưn, kăn dưi bi hriăm, răng mgang đru pô ngă soh dưi đĭ hriê kơ prŏng rei. Aê Diê dlăng yuôm kơ klei sĭt nik blŭ hŏng klei khăp hĭn kơ klei khăp dôk ñăt ƀiădah amâo mâo bruă bi êdah ôh. Klei mkra mjuăt hŏng klei sĭt nik ba hriê klei jăk jĭn kơ pô mă tŭ klei đru kčĕ.
Êlan 6 bi msĕ mah jiăng sĭt hŏng mah jiăng luar. Klei bi êka mơ̆ng mah jiăng sĭt suôr jing jăk hĭn kơ klei pô roh čŭm. Anôk êka khăng mâo kyua phung roh bi êka, ƀiădah lĕ tơdah mah jiăng bi êka, klei êka anăn bi hmô kơ klei khăp sĭt suôr leh anăn klei mah jiăng kiêr kơ pô êka. Msĕ snăn mơh, klei čŭm khăng mâo mơ̆ng pô drei khăp hơiêng, ƀiădah tơdah klei čŭm mơ̆ng phung roh, klei čŭm anăn jing klei čŭm mgưt, bi êdah klei mưč, klei amâo sĭt ôh mơ̆ng pô anăn hŏng pô ñu čŭm (Klei Bi Hriêng 7:13; Y-Mathiơ 26:49). Mah jiăng sĭt suôr srăng “bi êka”, amâo djŏ čiăng ngă jhat ôh, ƀiădah čiăng bi hlao hŏng klei blŭ lač ya klei drei čiăng hmư̆. Dŭm anôk êka anăn jing “sĭt suôr”, kyuadah kbiă mơ̆ng klei khăp leh anăn ai tiê sĭt suôr. Ƀiădah lĕ, phung roh srăng ngă klei čŭm lu blư̆, blŭ klei bi mđĭ, klei ênưih hmư̆, amâodah klei ngă jăk duah mgưt, ƀiădah klei diñu kñăm jing čiăng ngă jhat. Drei mpŭ kơ phung mah jiăng sĭt suôr, brei drei thâo kral anôk mdê klei khăp sĭt hŏng klei blŭ myâo hŏng klei luar.
Brei phung anak ƀuôn sang Khua Yang đĭ hriê kơ prŏng hlăm klei hdĭp myang tơdah mă tŭ klei mkra mjuăt mơ̆ng Klei Ñu Blŭ, hŏng Yang Mngăt Jăk, leh anăn hŏng phung huĭ mpŭ kơ Aê Diê. Hrô kơ klei huĭ kơ klei đru kčĕ, brei drei mă tŭ klei đru kčĕ msĕ si sa klei pap. Mbĭt hŏng klei anăn, brei drei akâo kơ Khua Yang brei kơ drei klei thâo mĭn čiăng drei thâo kral klei blŭ atăt ba drei nao giăm kơ Yang Krist, leh anăn klei blŭ knŏng čiăng bi mơak kơ drei.
Hŏng si knuih drei mă tŭ klei đru kčĕ brei hŏng klei sĭt?
Wah lač: Ơ Khua Yang, đru kâo thâo luă gŭ mă tŭ klei mtô mjuăt leh anăn thâo mpŭ kơ phung mah jiăng sĭt suôr Ih dưm leh ti djiêo kâo. Msĕ mơh, akâo Khua Yang brei kâo mâo klei thâo mĭn leh anăn klei khăp čiăng blŭ klei sĭt nik hŏng klei êdu êun. Atăt gai klei hdĭp kâo hŏng klei sĭt nik leh anăn hŏng klei khăp Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nahum 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
