Klei Aê Diê Blŭ: II Klei Yăl Dliê 29:25-30
Êlan kliăng: “Bi blŭ bĕ hdơ̆ng diih hŏng klei mmuñ hđăp, hŏng klei mmuñ hơêč hmưi, leh anăn hŏng klei mmuñ doh jăk, mmuñ bi mni kơ Khua Yang hŏng jih ai tiê” (Êphêsô 5:19)
Klei êmuh ksiêm mĭn: Si Mtao Hêsêkia dăp klei kkuh mpŭ kơ Aê Diê hŏng klei mmuñ? Si ngă phung ƀuôn sang ƀuh tơdah diñu mmuñ bi mni kơ Aê Diê hŏng jih ai tiê? Si ngă grăp čô drei dôk kkuh mpŭ kơ Aê Diê hŏng klei mmuñ?
Mtao Hêsêkia thâo săng kơ klei kkuh mpŭ mâo klei Aê Diê tŭ jing klei kkuh mpŭ tui si klei Aê Diê bi ƀuh, kyuanăn, ñu brei phung Lêwi djă mnơ̆ng kưt mmuñ dôk dơ̆ng ti Sang Aê Diê, bi phung khua ngă yang djă ki tui si klei Y‑Đawit leh anăn phung khua pô hưn êlâo Aê Diê mtă leh, “Kyuadah klei mtă anăn kbiă hriê mơ̆ng Yêhôwa hŏng ƀăng êgei phung khua pô hưn êlâo Ñu” (êlan 25). Kkuh mpŭ hŏng klei kưt mmuñ jing klei Aê Diê čiăng mơ̆ng đưm Mtao Đawit ngă leh. Mtao Hêsêkia bi mbha tui si klei mtă leh phung khua ngă yang yơh srăng ayŭ ki. Hlăm dŭm mnơ̆ng kưt mmuñ anei knŏng ki yơh jing mnơ̆ng Aê Diê mtă brei Y‑Môis ngă leh anăn yua (Klei Yap 10:1-10), dŭm mnơ̆ng kưt mmuñ mkăn Mtao Đawit yơh ngă leh anăn yua, kyuanăn arăng pia “mnơ̆ng kưt mmuñ Y‑Đawit”.
Kčưm kơ mmông kkuh mpŭ, mtao mtă brei myơr mnơ̆ng čuh wăt tơdah mnơ̆ng myơr arăng bi mdjiê leh êlâo tinăn. Êjai arăng myơr mnơ̆ng myơr, êpul mmuñ phung Lêwi mmuñ bi mni kơ Aê Diê, ênai ki leh anăn ênai mnơ̆ng kưt mmuñ Mtao Đawit hlue mbĭt. Mnâo ƀâo mngưi mơ̆ng mnơ̆ng myơr čuh hŏng asăp mmuñ, ênai đĭng brô̆ kwang truh kơ Aê Diê. Jih jang phung bi kƀĭn kkuh mpŭ leh anăn arăng ngă klei kưt mmuñ tơl ruê̆ bruă myơr mnơ̆ng myơr čuh. Tơdah pui ƀơ̆ng jih leh mnơ̆ng ngă yang, Mtao Hêsêkia mbĭt hŏng jih jang phung dôk tinăn kkui kŏ kkuh mpŭ. Hlăm klei bi kƀĭn bŏ hŏng klei mpŭ anei, Mtao Hêsêkia leh anăn phung khua mtă kơ phung Lêwi brei mmuñ bi mni kơ Aê Diê hŏng boh blŭ Klei Mmuñ Hđăp Mtao Đawit leh anăn Y‑Asap pô thâo bi ƀuh čih leh. Snăn yơh digơ̆ mmuñ hơêč hmưi kơ Aê Diê hŏng klei hơ̆k mơak leh anăn kkui kŏ kkuh mpŭ kơ Ñu.
Kkuh mpŭ kơ Aê Diê hŏng klei kưt mmuñ hŏng jih ai tiê ba hriê kơ phung ƀuôn sang klei hơ̆k mơak (êlan 30; I Klei Yăl Dliê 15:16; II Klei Yăl Dliê 23:18). Hŏng klei kưt mmuñ digơ̆ bi êdah ai tiê mpŭ kơ Aê Diê, klei kmhal kơ klei soh, klei gưt asăp leh anăn klei hdơr knga…čiăng nao ti anăp Aê Diê. Ti Ƀuôn Jăk srăng mâo mơh klei kkuh mpŭ kơ Khua Yang hŏng klei kưt mmuñ mơ̆ng phung Ñu bi tui leh (Klei Bi Êdah 14:1-5).
Mơ̆ng ênuk đưm hlŏng kơ ară anei hin, klei kkuh mpŭ hŏng klei kưt mmuñ jing klei bi mơak kơ Aê Diê nanao. Jing amĭ ama brei drei brei phung anak drei hriăm gư̆ đĭng, pĕ brô̆ leh anăn hriăm kưt mmuñ. Jing phung thâo kưt mmuñ, brei drei đru bruă kưt mmuñ. Brei phung bi đru đăo mŭt êpul mmuñ Phung Sang Aê Diê ti ƀuôn pô. Phung mâo bruă klam, wăt pô gai hdră klei bi kƀĭn, brei mprăp hĕ bi jăk kơ klei mmuñ bi mni kơ Aê Diê. Brei Phung Sang Aê Diê mmuñ bi mni kơ Aê Diê hŏng jih ai tiê hlăm mmông kkuh mpŭ. Khua Yang srăng brei klei hơ̆k mơak tơdah drei kkuh mpŭ kơ Ñu hŏng klei mmuñ hŏng jih ai tiê.
Si ngă drei đru bi mguôp leh hlăm klei kkuh mpŭ kơ Khua Yang hŏng klei kưt mmuñ?
Wah lač: Ơ Khua Yang, đru kâo kkuh mpŭ leh anăn mă bruă kơ Ih hŏng klei mmuñ čiăng mpŭ mni kơ Ih hŏng jih ai tiê, leh anăn ngă tui si klei Ih čiăng, čiăng kơ pô mkăn thâo kral Ih leh anăn mmuñ mpŭ mni kơ Ih msĕ mơh. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 13
Kênh Youtube BHKTHN:
