Klei Aê Diê Blŭ: Klei Mtô Mñă Klei Bhiăn 20:1-9.
Êlan kliăng: “Tơdah diih nao kơ klei bi blah hŏng phung roh diih, tơdah diih ƀuh aseh, êdeh aseh, leh anăn sa phung kahan lu hĭn kơ diih dê, đăm huĭ kơ diñu ôh, kyuadah Yêhôwa Aê Diê diih, Pô atăt diih kbiă leh mơ̆ng čar Êjip, dôk mbĭt hŏng diih.” (Klei Mtô Mñă Klei Bhiăn 20:1)
Klei êmuh ksiêm mĭn: Ya klei Y-Môis mtă mtăn kơ phung ƀuôn sang Israel tơdah digơ̆ dơ̆ng nao kơ klei bi blah amâo bi knar ai? Hlei phung arăng phưi lui amâo nao bi blah? Ya klei anei čiăng lač? Ya klei bi knal drei mâo tơdah găn lu klei bi blah myang êgao kơ ai ktang drei?
Phung Israel jing sa djuê ana amâo mưng hŏng klei bi blah ôh, kăn diñu jing sa phung kahan klă klơ̆ng msĕ si phung kahan Mtao Y-Salômôn ruah bi kƀĭn leh anăn mjing êdei tinăn rei (I Bruă Mtao 10:26). Boh sĭt gơ̆, diñu jing knŏng sa êpul phung mnuih ƀuôn sang amâo mâo klei mprăp bi djăp ôh kơ klei bi blah hŏng dŭm phung kahan mâo klei bi hriăm mjuăt klă klơ̆ng. Kyuanăn yơh, êlâo bi tlă anăp hŏng jih klei bi blah anăn, Y-Môis leh anăn phung khua ngă yang bi mđĭ ai phung ƀuôn sang Israel čiăng đăm digơ̆ huĭ leh anăn ktư̆ yơ̆ng ôh, hrô kơ klei anăn, brei digơ̆ dlăng kơ Aê Diê jing Pô bi mtlaih leh digơ̆ mơ̆ng čar jing hlŭn, leh anăn jing Pô ăt srăng dôk mbĭt hŏng digơ̆ mơh hlăm jih klei bi blah anăp truh (êlan 1-4).
Boh nik gơ̆, amâo djŏ ôh jih jang phung ƀuôn sang čiăng nao sơăi kơ klei bi blah anăn, kyuadah mâo đa đa mnuih mâo bruă čiăng bi msir mkra hĕ. Kyuanăn trăn anei čih yăl dliê klă snăk kơ tlâo phung arăng phưi lui amâo nao kơ klei bi blah. Anăn jing phung mrâo mdơ̆ng sang ka đĭ dôk ôh; phung pla đang boh kriăk ƀâo ka pĕ ôh boh hlâo hlang; phung mâo klei bi čuôp leh ƀiădah ka bi dôk ung mô̆ ôh, digơ̆ srăng bi kdung hĕ êjai klei nao bi blah, digơ̆ dôk ti sang čiăng bi leh hĕ bruă jing kơ sa čô ung, sa cô ama hlăm gŏ sang mrâo (êlan 5-7). Êngao tinăn, bi phung huĭ leh anăn blao ăt brei wĭt kơ sang mơh, amâo brei nao bi blah ôh. Kyuadah klei blao sa čô mnuih srăng bi êdu ai jih sa phung kahan, bi hmăi jhat kơ ai tiê bi blah (êlan 8) Klei bhiăn phưi lui nao bi blah kơ đa đa mnuih bi êdah kơ Aê Diê jing Pô thâo mđing mĭn čêč kdrêč kơ klei hdĭp phung ƀuôn sang Ñu.
Klei Aê Diê Blŭ mtă kơ drei knang nanao kơ Aê Diê Pô Myang leh anăn đăm huĭ ôh kơ klei bi blah myang amâo bi knar ai hlăm klei hdĭp drei. Ƀiădah boh klă gơ̆, drei khăng huĭ lu hĭn kơ drei knang kơ Khua Yang. Sĭt nik, klei mĭn huĭ jing klei bhiăn mâo tơdah tlă anăp hŏng bruă êgao kơ klei ktang pô. Ƀiădah tơdah drei lui klei huĭ anăn dôk hlăm ai tiê drei, klei drei knang kơ Khua Yang srăng hrŏ. Brei drei hdơr, klei huĭ srăng hrŏ ƀrư̆ ƀrư̆ leh anăn luč mliêt tơdah sa čô knang kơ Aê Diê kluôm dhuôm. Klei knang kơ Aê Diê yơh jing kliăng đru drei dưi hŏng jih kdrăn blah myang hlăm klei hdĭp drei.
Si ngă drei knang kơ Khua Yang hlăm djăp mta klei mơ̆?
Ơ Khua Yang, jing Aê Diê Pô Myang, mă mđuê̆ hĕ klei huĭ mơ̆ng kâo, leh anăn brei kơ kâo ai tiê jhŏng čiăng kơ kâo knang kơ Ih nanao, wăt tơdah Satan wang jŭm dar čiăng bi huĭ kâo.
Dlăng Klei Aê Diê Blŭ hlăm tlâo thŭn: Y-Êskiêl 32:29-33:20.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
