II Kevcai 20:1-9
Nqe cim:
“Thaum nej mus tua nej cov yeebncuab, yog nej pom lawv muaj tsheb nees, nees thiab tubrog coob tshaj nej los nej tsis txhob ntshai lawv. Tus Tswv uas yog nej tus Vajtswv, tus uas cawm nej dim nram tebchaws Iziv los yuav nrog nraim nej” (II Kevcai 20:1).
Lus nug rau sawvdaws xav:
- Mauxes ntuas cov Yixalayees licas thaum mus ua rog nrog ib haivneeg uas muaj tubrog coob dua lawv?
- Cov neeg twg tsis raug mus ntaus rog?
- Qhov uas tsis cia ib txhia neeg mus ntaus rog muaj lub ntsiab licas?
- Peb tau saj yam dabtsi thaum ua rog ntawm sab ntsujplig nrog cov uas muaj zog dua yus?
Haivneeg Yixalayees tsis yog haivneeg uas txawj ua rog thiab lawv kuj tsis muaj tubrog txawj ua rog li uas tiam Vajntxwv Xalumoos txhim muaj (I Vajntxwv 10:26). Cov Yixalayees tsuas yog ib pab neeg coob uas tsis npaj muaj tej cuabyeej ua rog dabtsi li. Yog li ntawd, ua ntej yuav mus ua rog, Mauxes thiab cov Povthawj thiaj txhawb cov Yixalayees txhua tus, tsis txhob txhawj, txhob ntshai, tiamsis yuav tsum saib ntsoov Vajtswv tus uas cawm lawv tawm hauv lub tebchaws ua qhev los lawm thiab tseem yuav nrog nraim lawv nyob txhua lub sijhawm uas lawv mus ntaus rog (nqe 1-4).
Tshwjxeeb, tsis yog txhua tus neeg Yixalayees puavleej npaj nroos tawm mus ua rog, vim muaj qee leej tshuav haujlwm cheemtsum ua hauv lubneej. Yog li ntawd, ntu Vajluskub no thiaj sau meej txog peb hom neeg uas tsis raug mus ntaus rog. Ib yog cov uas nyuam qhuav ua tau tsev tsis tau fij rau Vajtswv thiab mus nyob hauv, ob yog cov uas nyuam qhuav mus cog txiv hmab tsis tau de thiab peb yog cov uas nyuam qhuav qhaib tau pojniam lawm, npaj yuav yuav pojniam, lawv yog cov uas tsis raug mus ua rog kom lawv tau ua tiav lawv tes haujlwm hauv tsev (nqe 5-7). Dhau ntawd, cov uas muaj lub siab ntshai kuj raug yuam rov mus tsev, tsis tau mus ntaus rog. Vim cia cov neeg ntshai mus ntaus rog, nws yuav ua rau ntau leej ntshai thiab qaug zog tsis tas siab ua rog (nqe 8). Qhov uas tsis pub ib txhia mus ntaus rog no qhia tau hais tias, tus Tswv txhawj txog txhua yam me tshaj nyob hauv Nws haivneeg lubneej.
Peb yeej tau tus Tswv qhia kom tso siab rau Nws lub fwjchim thiab tsis txhob ntshai thaum ua rog ntawm sab ntsujplig nrog yam muaj zog tshaj peb hauv peb lubneej. Tiamsis tseeb tiag peb yeej muaj kev txhawj ntshai ntau dua li qhov uas tso siab rau tus Tswv. Kev txhawj ntshai yeej yog yam uas tibneeg muaj thaum ntsib ib yam uas hla dhau yus lub zog lawm. Tiamsis yog peb pheej cia tej kev txhawj ntshai kav peb lub siab, ces peb kev tso siab rau Vajtswv yuav tsawg zus mus. Peb yuav tsum nco hais tias, kev txhawj ntshai yuav xam zuj zus mus thaum peb tso siab plhuav rau Vajtswv. Kev cia siab rau tus Tswv yog yaumsij pab peb muaj yeej ntawm txhua pluav rog sab ntsujplig hauv peb lubneej.
Thov Vajtswv,
Tus Tswv, Koj yog Vajtswv tus muaj fwjchim, thov pab tshem nyuam yaus tej kev txhawj ntshai hauv lub siab mus thiab pab kom nyuam yaus muaj lub siab tawv, nco ntsoov cia siab rau Koj, txawm ib ncig nyuam yaus Ntxwgnyoog yuav siv ntau yam los hem nyuam yaus los xij. Amees.
Peb puas tso siab plhuav rau tus Tswv txhua lub sijhawm lawm tau?
Nyeem Vajluskub hauv peb lub xyoo: Exekees 32:29-33:20
Kênh Youtube BHKTHN:
