Klei Aê Diê Blŭ: Rôm 9:1-5
Êlan kliăng: “…ai tiê kâo ênguôt êdimi leh anăn rŭng răng nanao. Kyuadah tơdah dưi kâo čiăng jing mnuih Aê Diê tăm pah tơl ktlah mơ̆ng Krist dưn kyua phung ayŏng adei kâo, phung găp djuê kâo tui si kđeh êrah” (Rôm 9:2-3)
Klei êmuh ksiêm mĭn: Si ngă Khua ƀĭng kna Y‑Pôl bi êdah kơ klei ñu ênguôt? Ya mnơ̆ng bi ênguôt kơ ñu msĕ snăn lĕ? Ya klei hriăm drei mâo tơdah mĭn kơ phung drei khăp leh anăn phung găp djuê drei ka mâo klei bi mtlaih ôh?
Khua ƀĭng kna Y‑Pôl mâo klei ênguôt mơ̆ng sui, ai tiê ñu rŭng răng nanao. Klei ênguôt anei prŏng snăk, prŏng êgao hĭn kơ klei Aê Diê hngah leh anăn tăm pah, čiăng lač tŭ klei Aê Diê bi kmhal hlăm war pui nanao hlŏng lar! Ñu čiăng snăk tơdah dưi srăng tŭ klei bi kmhal hrô brei kơ phung ayŏng adei, phung găp djuê ñu tui si kđeh êrah jing phung Israel. Ñu ênguôt êdimi kyuadah amâo dưi mblang ôh ya ngă lu phung Israel hngah kơ Yang Krist.
Lŏ wĭt kơ ênuk mphŭn dô, Aê Diê iêô leh anăn brei leh klei jăk jĭn mdê kơ phung aê diñu jing Y‑Abraham, Y‑Isăk leh anăn Y‑Yakôp. Mơ̆ng phung anak čô digơ̆, Aê Diê ruah leh phung Israel jing sa phung ƀuôn sang Ñu. Diñu mă tŭ lu klei brei mdê mơ̆ng Aê Diê, dưi dưn klei jing anak, klei guh kơang, dưi dôk hlăm klei bi mguôp hŏng Aê Diê, Aê Diê brei klei bhiăn, dưi kkuh mpŭ kơ Aê Diê leh anăn Aê Diê brei kơ diñu mâo lu klei ƀuăn (êlan 4). Klei yuôm bhăn hĭn jing Aê Diê yua phung găp djuê anei čiăng kơ Anak Ñu pô mâo knŏng Sa Čô jing Yêsu Krist kkiêng ti lăn ala, ngă hdră bi mtlaih kơ jih jang mnuih. Ñu jing Aê Diê, wăt jing anak mnuih hdĭp ti krah phung găp djuê Aê Diê ruah (êlan 5). Ñu jing dĭng ktang prŏng hĭn leh anăn jing sa čô Pô hưn bi sĭt jăk klă hĭn dôk leh ti krah phung mnuih, mtô kơ digơ̆ klei Aê Diê čiăng leh anăn êlan dưi mă tŭ klei bi mtlaih. Ñu ngă leh lu klei myang leh anăn klei bi knăl mdê ti krah phung ƀuôn sang Aê Diê ruah čiăng bi êdah klei khăp leh anăn klei myang Aê Diê. Ñu tuh leh êrah ti kyâo bi kal čiăng bi mtlaih jih jang mnuih. Wăt snăn dưn, mâo lu snăk phung Israel hngah kơ Khua Yang Yêsu.
Klei anăn bi êdah klă kơ Khua ƀĭng kna Y‑Pôl mâo klei mĭn msĕ si Yêsu Krist mâo leh. Klei ñu ênguôt jing sĭt, ñu bi êdah klei ñu ênguôt kơ Yang Mngăt Jăk jing Pô ƀuh jih ai tiê mnuih (êlan 1). Ñu bi sĭt leh mơh klei ñu khăp kơ phung Israel hŏng bruă ngă. Wăt tơdah Yang Mngăt Jăk pioh ñu mdê čiăng hưn Klei Mrâo Mrang Jăk kơ phung tue, ƀiădah ti anôk ñu nao, ñu mŭt hlăm sang bi kƀĭn mtô Klei Mrâo Mrang Jăk kơ phung găp djuê ñu êlâo hĭn. Wăt tơdah phung ƀuôn sang ñu amâo mdei ôh ngă jhat, bi êmut, duah mnêč čiăng bi mdjiê ñu, ƀiădah ai tiê ñu ăt khăp nanao kơ digơ̆.
Hruê anei, hlei mngăt Khua Yang dưm hlăm ai tiê drei? Ăt dôk lu phung găp djuê drei leh anăn phung riêng gah drei ka mâo klei bi mtlaih ôh, akâo Khua Yang brei kơ drei mâo klei mĭn thâo uêñ msĕ si Khua ƀĭng kna Y‑Pôl, đru wah lač brei leh anăn hưn klei bi mtlaih kơ lu mnuih.
Ya drei srăng ngă čiăng bi êdah klei khăp kơ phung găp djuê drei, leh anăn kơ lu mnuih mkăn?
Wah lač: Ơ Khua Yang Yêsu! Knŏng hjăn Ih yơh khăp leh kơ kâo hŏng klei khăp prŏng leh anăn tŭ klei djiê hrô kâo ti kyâo bi kal. Kâo lač jăk kơ Ih lu êdimi! Đru kâo jhŏng yua mnĭt mmông, prăk kăk, ai tiê, mnơ̆ng jăk kâo mâo čiăng atăt phung ayŏng adei kâo leh anăn phung riêng gah kâo hriê kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
