Loos 9:1-5
Nqe cim:
“Kuv nyuaj siab kawg li, rau qhov kuv txhawj kuv haivneeg heev. Txawm yog Vajtswv foom tsis zoo rau kuv thiab muab kuv cais tawm ntawm Yexus Khetos mus los kuv yeej txaus siab, tsuav yog kuv haivneeg tau los nrog Vajtswv sib raug zoo xwb.” (Loos- 9:2-3)
Lus nug rau sawvdaws xav:
– Timthawj Paulus piav nws kev nyuaj siab zoo li cas?
– Qhov vimchiv twg ua rau Paulus nyuaj siab li ntawd?
– Peb kawm tau dabtsi thaum xav txog yus cov txheebze thiab cov neeg tsis tau dim?
Timthawj Paulus tiv kev mob kev nyuaj hauv lub siab ntev loo. Qhov kev mob no loj heev, heev dua qhov kev mob uas raug Vajtswv tso tseg thiab foom tsis zoo, txhais tau tias yuav tsum raug txim hauv ntuj tawg mus ibtxhis! Paulus xav kom nws tus kheej tiv hloov nws cov kwvtij Yixalayees sab nqaij tawv. Paulus nyuaj siab txog qhov uas tsis totaub yog vim li cas cov Yixalayees tsis lees yuav Yexus Khetos.
Saib rau keebkwm, cov yawgkoob uas yog Anplahas, Ixaj thiab Yakhauj tau tus Tswv hu thiab foom koob hmoov tshwjxeeb. Los ntawm lawv cajces, Vajtswv xaiv cov Yixalayees los ua Nws haivneeg. Lawv tau txais ntau yam koob hmoov ntawm Vajtswv, tau txais lub meejmom ua Nws haivneeg, tau txais Vajtswv tej lus cogtseg (nqe 4). Qhov zoo tshaj plaws yog Vajtswv siv haivneeg no tso Nws tus Tub uas yog Tswv Yexus los yug hauv ntiajteb, ua txojkev cawm dim rau neeg ntiajteb. Nws yog Vajtswv, kuj yog neeg nrog Nws haivneeg nyob (nqe 5). Nws yog tus Xibhwb uas muaj hwjchim thiab yog tus uas ua timkhawv rau neeg, qhia tibneeg paub txog Vajtswv tus dej siab thiab txojkev tau txais kev cawm dim. Tus Tswv ua ntau yam txujci tseemceeb rau Nws haivneeg pom yog qhia Nws txojkev hlub thiab Vajtswv lub hwjchim. Nws tuag saum ntoo khaublig cawm tibneeg ntiajteb. Los tseem muaj ntau tus neeg Yixalayees tsis kam lees yuav Yexus.
Tseeb tiag Timthawj Paulus muaj lub siab zoo ib yam li Tswv Yexus lub. Nws yeej mob siab tiag, Paulus thiaj qhia tshwm nws lub siab tabmeeg Vaj Ntsujplig tus uas paub neeg lub siab xav (nqe 1). Paulus ua tabpov qhov uas nws hlub cov neeg Yixalayees tawm ntawm tes haujlwm. Txawm yog Vaj Ntsujplig tshwj Paulus tshwjxeeb mus qhia Txojmoo Zoo rau lwm haivneeg, los Paulus mus txog chaw qhov twg nws yeej mus rau hauv tej tsev sablaj qhia Moo Zoo rau nws haivneeg ua ntej. Txawm yog nws haivneeg tsimtxom, ntxub, npaj tswvyim tua Paulus povtseg los nws yeej tseem hlub lawv.
Nimno, Vajtswv kom peb mus qhia cov neeg twg? Peb cov txheebze muaj ntau leej thiab cov neeg uas nyob ibncig ntawm peb tsis tau dim. Thov Vajtswv pub rau peb muaj lub siab kub lug zoo ib yam li Timthawj Paulus, siv zog thov Vajtswv pab thiab tawm mus qhia txojkev cawm dim rau ntau leej.
Thov Vajtswv,
Tswv Yexus! Koj hlub nyuam yaus los ntawm txojkev hlub loj tshaj thiab tiv kev txomnyem hloov nyuam yaus saum ntoo khaublig. Ua Koj tsaug kawg nkaus li! Thov Koj pab kom nyuam yaus txaus siab fij lub sijhawm, nyiaj txiag, dag zog, tej uas nyuam yaus muaj mus coj lwm tus los ntseeg Koj. Nyuam yaus tuav Tswv Yexus lub npe thov, Amees.
Peb ua dabtsi kom qhia tshwm txojkev hlub rau yus cov txheebze, thiab lwm tus?
Nyeem Vajluskub hauv peb lub xyoo: Yauhas 13
Kênh Youtube BHKTHN:
