Hơriso 89:14
“Tơdrong ‘lơ̆ng tơpăt păng tơdrong tơpăt hơnơ̆ng jing hơnă tăng dŏ pơtao Ih. Tơdrong ‘mêm, tơdrong ‘lơ̆ng tơpăt năm ‘bơ̆t anăp Ih.” (Hơriso 89:14)
Nơ̆r jet tơchĕng pơwao:
– Hơriso 89:14 tơ’bôh thoi yơ gah tơdrong ‘lơ̆ng tơpăt tơdrong ‘mêm ‘Bok Kei-Dei?
– Đei râu krao athei Khul Bơngai Lui pơjing hơnă noh thoi yơ?
– Lu bơ̆n athei đei arih hơnơ̆ng kơ pơm ‘lơ̆ng tơpăt păng tơdrong ‘mêm mơnat thoi yơ?
Hơriso 89:14 khan hơđăl “Tơdrong ‘lơ̆ng tơpăt păng tơdrong tơpăt hơnơ̆ng jing hơnă tangdŏ pơtao Ih” wă khan tôm tơdrong Kră Yang ‘Bok Kei-Dei pơgơ̆r tă kơ dan hơmet trŏ păng ‘lơ̆ng rơgoh. Kră Yang ưh kơ bơ̆jang kiơ̆ kơ jơhngơ̆m mơn dah pơdê kơ bu ôh, mălei ling lang tơpăt păng kiơ̆ tơdrong trŏ, kư̆m lei lăi thoi noh mơ̆n. Nơ̆r ‘Bok Kei-Dei bơtho dơ̆ng thoi âu: “Tơdrong ‘mêm, tơdrong ‘lơ̆ng tơpăt năm ‘bơ̆t anăp Ih”. Tơ’bôh tôm tơdrong Kră Yang pơm tă kơ đơ̆ng tơdrong ‘mêm chông anhăk păng tơdrong tơpăt ngăl wă ba ăn tơdrong arih kơ kon bơngai. Bơngai hŏk pơhrăm anăn sư Spence Jones pơma hơđăl thoi âu: “Mă tôm tơdrong kiơ ‘Bok Kei-Dei pơm gô pơm keh lăm tơdrong tơpă păng tơpăt”. Tơdrong âu tơ’bôh tơdrong Kră Yang pơgơ̆r tơpăt sek tơlang tơdrong yoch, mălei Tơ’ngla ‘mêm mơnat kư̆m lei lăi thoi noh mơ̆n ăn tơdrong ‘mêm mơnat wă dŏng pơklaih bơngai yoch băt tơbral. Jơ̆ Tơ’ngla tơ jê̆ lăm tơdrong ‘mêm, ‘bar tơdrong ‘nâu ưh kơ gơh tơklah băl mălei thei tơguăt dih băl.
Kư̆m athei khul bơngai lui pơjing tơ kơpal hơnă ‘noh, arih kiơ̆ tơdrong tơpăt Nơ̆r Kră Yang păng wei tơdrong arih tơpăt ‘bơ̆t anăp Sư. Dah rim ‘nu bơngai lui arih tơpăt lăm tơdrong tơchĕng, nơ̆r pơma păng tơdrong jang, khul bơngai lui gô dơ̆ng kơjăp păng pơm tơ’bôh tơdrong ‘lơ̆ng rơgoh ‘Bok Kei-Dei. Mă khan lei ră, ‘Bok Kei-Dei ưh kơ sĭ khan Tơ’ngla ‘lơ̆ng tơpăt đĕch na kư̆m tơ’ngla ‘bĕnh tơdrong ‘mêm păng tơdrong tơpăt. Kơlih kơ thoi noh, Khul bơngai lui ưh kơ sĭ lăp wei răk, tơdrong tơpăt đĕch na kư̆m athei arih ‘mêm mơnat: Băt mơnat, kĕ chơ̆n păng tơiung dih băl. Tơdrong ‘mêm pơm ăn kơ tơdrong tơpăt jing pran păng ba ăn tơdrong pơjing tơiung lăm đon lui khul tơpôl.
Hơriso 89:14 pơma hơđăl ‘bar tơdrong kăl ‘Bok Kei-Dei pơm hơnă kơ tơdrong arih Khul Bơngai Lui kơ Kră Yang. Dah tơdrong ‘lơ̆ng tơpăt păng tơdrong ‘mêm mơnat pơgơ̆p hơdai. Khul bơngai lui gô pơm tơ’bôh tôm rup pơma kơ ‘Bok Kei-Dei. Tơdrong ‘lơ̆ng tơpăt ba ăn hơnă kơjăp, bơwei tơdrong ‘mêm huay kơ glăi, na tơdrong ‘mêm ba ăn tơdrong pôm jơhngơ̆m đon păng rơngơp hiôk, bơwei wă kơ tơpăt wă kơ huay kơ mah dêh hnang arăng kơ̆l. Kơlih kơ thoi noh, rim bơngai lui athei arih pơm ‘bar tơdrong noh hơnơ̆ng, wă kơ Khul Bơngai Lui jing nơ̆r pơm kơdranh pran gah tơdrong ‘lơ̆ng rŏ Kră Yang.
Ơ Kră Yang, apinh Ih pơjing tơdrong arih inh lăm tơdrong tơpăt Ih păng ‘bĕnh blai lăm jơhngơ̆m inh hăm tơdrong ‘mêm tơpăt Ih. Apinh Ih tơgŭm inh arih lăm tơdrong tơpăt păng ‘mêm kơ bơngai nai kiơ̆ kơ tơdrong tơpăt Ih wă kơ Khul Bơngai Lui gơh pơm tơ’bôh tơdrong ‘lơ̆ng rŏ Ih. Krao khan yua anăn Kră Yang Yêsu Krist, Amen.
Bơ̆n đei arih sa ‘lơ̆ng tơpăt păng ‘mêm mơnat hăm ‘nhŏng oh bơ̆n lăm Khul Bơngai Lui thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 132-133
Kênh Youtube BHKTHN:
