Klei Kđeh Tluh Dưi Ksiêm Răng – 9/10/2021

1013

Klei Aê Diê Blŭ: Klei Bi Hriêng 6:24-35

Êlan kliăng: “Hlăm ai tiê ih đăm tluh kơ klei siam ñu ôh, leh anăn đăm brei pŭk ală ñu mplư ih ôh.” (Klei Bi Hriêng 6:25).

Klei êmuh ksiêm mĭn: Hŏng ya êlan mniê knhông mplư arăng? Si ngă čiăng dưi hŏng klei mplư anei? Ya boh mnuih ngă klei soh knhông srăng mă tŭ? Ya mta klei mñă brei drei hdơr mơ̆ng klei hưn êlâo brei răng anei?

Klei Bi Hriêng kdrêč 1‑9, mâo pă bliư̆ hưn lač kơ klei mplư mơ̆ng “mniê knhông” (2:16‑19; 5:1‑23; 6:20‑35; 7:1‑27), brei ƀuh anei jing klei mplư ktang tĭt, ñu amâo phưi tha hlei pô ôh, leh anăn dleh snăk thâo kral. Tinei, mtao Y‑Salômôn pia “mniê knhông” jing “mniê soh jhat”, čiăng lač klei mplư mơ̆ng klei tluh ƀô jing soh jhat, leh anăn pô mplư arăng jing mnuih jhat.

Mnơ̆ng bi blah tal sa mniê soh jhat yua kăp mplư arăng jing “êlah blŭ klei myâo mă” mblang jing “klei blŭ mmih msĕ êa hnuê” (êlan 24). Klei blŭ mniê knhông khăng mmih msĕ si “êa hnuê” leh anăn “êdu êbhơr hĭn kơ êa prăi” ƀiădah ti knhal tuč srăng jing “phĭ snăk” leh anăn “ƀơ̆ng msĕ si đao gưm dua nah mta” ngă kơ mnuih tŭ klei jhat čhuang nao kơ Ƀuôn Phung Djiê (Klei Bi Hriêng 5:3‑5), kyuadah mnuih tŭ klei jhat jưh leh hŏng “mniê knhông” hmư̆ klei ñu blŭ hrô kơ klei mđing klei Aê Diê mtô lač. Mnơ̆ng bi blah tal dua jing klei siam. Tơdah amâo răng ksiêm ai tiê phưi lui klei tluh ktŭng đoh, sĭt nik srăng “pŭk ală ñu mplư” (êlan 25). Klei mtă mtăn anei amâo djŏ ôh knŏng kăm ghă klei ngă ti êngao, ƀiădah dơ̆ng mơ̆ng klei tluh hlăm ai tiê, kyuadah mơ̆ng klei mĭn yơh atăt truh kơ klei ngă. Đăm mâo ôh pô mgang klei anăn jing klei bluh ai amâo dưi mkhư̆ mgang ôh, boh nik tơdah mniê siam čŏng čiăng plah mă drei. Klei mtă mơ̆ng ama brei ƀuh klei tluh jing klei mplư sĭt, ƀiădah anak ăt dưi răng ksiêm leh anăn kiă kriê klei tluh čiăng anăn.

Leh anăn čiăng bi kjăp klei ñu mtô mtă, mtao Y‑Salômôn kñăm ktang kơ boh mơ̆ng pô tlĕ piu srăng tŭ (êlan 27‑29). Pui dôk hlăm kpur mâo klei tŭ dưn, ƀiădah tơdah mdăp hlăm čhiăm ao amâodah juă hŏng jơ̆ng jing klei huĭ hyưt. Msĕ snăn mơh, klei tluh ƀô jing msĕ si pui trơ̆ng, pioh hjăn kơ klei hdĭp ung mô̆ ba klei jăk jĭn, ƀiădah dưm ti êngao klei hdĭp ung mô̆ snăn klei bi rai srăng truh. Ti djiêu anăn, mniê tlĕ piu arăng dưm tăp mđơr hŏng mniê knhông. Pô tlĕ piu hŏng mniê mâo ung leh, leh anăn dôk hŏng mniê knhông jing soh msĕ sơăi. Êgao hĭn mơh, pô ngă soh tlĕ piu srăng tŭ klei mưč klei hêñ, leh anăn jing jhat kjham hĭn kơ mnuih knĕ, kyuadah mnuih knĕ arăng dưi pap brei tơdah ñu tlĕ mnơ̆ng kyua êpa tian, bi pô tlĕ piu jing mnuih “amâo mâo klei thâo mĭn ôh”, phưi lui klei tluh ƀô bi mluk leh anăn luč klei mĭn (êlan 30‑33), Kjham hĭn mơh, boh mơ̆ng pô tlĕ piu mă tŭ srăng ktrŏ leh anăn bi hmăi sui snăk (êlan 34‑35).

Phung đăo brei mâo Klei Aê Diê Blŭ leh anăn Yang Mngăt Jăk kiă kriê gai gĭt ai tiê klei mĭn, čiăng kơ mnga boh mơ̆ng Yang Mngăt Jăk blang ƀhư hlăm klei hdĭp. Hŏng klei anăn, knuih thâo kiă kriê asei pô, dôk djŏ hnơ̆ng srăng atăt gai klei hdĭp, răng ksiêm klei kđeh tluh, čiăng đăm ngă soh hŏng Aê Diê leh anăn hŏng mnuih ôh.

Si ngă drei đup gưt mơ̆ kơ Yang Mngăt Jăk leh anăn mă tŭ mơ̆ klei ktang myang čiăng dưi răng ksiêm klei kđeh tluh hlăm klei hdĭp?

Wah lač: Ơ Khua Yang, akâo Ih brei ai tiê klei mĭn kâo mđing mĭn nanao kơ Klei Ih Blŭ, akâo Ih brei ală leh anăn knga kâo weh đuĕ mơ̆ng klei mplư jŭm dar kâo, čiăng kơ kâo dôk hdĭp doh jăk leh anăn bi guh kơang kơ Anăn Ih.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: I Y‑Samuel 30:21-31:13

Kênh Youtube BHKTHN:

https://www.youtube.com/c/bhkthn

Bài trướcKhi Nào Hết Dịch Covid-19?
Bài tiếp theoDục Vọng Được Kiểm Soát – 9/10/2021