Klei Aê Diê Blŭ: Y-Mathiơ 24:12-13
Êlan kliăng: “Leh anăn kyuadah klei jhat ƀai jing lar, klei khăp hlăm lu mnuih srăng jing êăt” (Y-Mathiơ 24:12)
Klei êmuh ksiêm mĭn: Ya klei bi knăl kơ hruê knhal tuč Khua Yang Yêsu lač hlăm trăn Klei Aê Diê Blŭ anei? Ya klei brei Phung đăo kơ Krist ngă hlăm boh klei soh jhat đĭ lar anăn? Si klei bi knăl anei dôk mâo hlăm ênuk drei?
Klei bi knăl kơ hruê knhal tuč Khua Yang Yêsu lač jing “klei jhat ƀai jing lar, klei khăp hlăm lu mnuih srăng jing êăt” (êlan 12). Klei soh srăng ƀrư̆ hruê đĭ lar leh anăn anak mnuih ƀrư̆ hruê dlăng hơăi mang kơ klei bhiăn Aê Diê. Klei jhat ƀai lar leh anăn klei anak mnuih bi êdah bi mni kơ klei soh, ala ƀuôn tŭ ư leh anăn sa ai, ngă kơ anak mnuih dôk hdĭp hlue si Klei Bhiăn Aê Diê tŭ klei mplư lui kơ klei pô ruah leh, hlue si klei kđeh tluh. Khua Yang Yêsu brei ƀuh ênuk knhal tuč jing klei soh đĭ lar, mklăk hŏng hnơ̆ng čuăn knuih hdĭp Aê Diê. Anak mnuih amâo lŏ bi êmut, mdăp klei soh ôh ƀiădah hưn mdah, mpŭ kơ klei soh, dlăng anăn jing klei bi êdah kơ wưng ênuk. Diñu lač kơ hnơ̆ng čuăn knuih hdĭp Aê Diê jing amâo djŏ hŏng ênuk, bi kgăn klei đĭ kyar mơ̆ng anak mnuih!
Ti anăp boh klei knuih hdĭp anak mnuih toh hroh hlăm hruê knhal tuč anăn, Khua Yang Yêsu bi mđĭ ai phung dôk mâo klei đăo sĭt hlăm Ñu brei “gĭr tơl knhal tuč” čiăng mâo klei bi mtlaih kluôm ênŭm (êlan 13). Amâo djŏ kyua “gĭr” ôh diñu mâo klei bi mtlaih ƀiădah kyua klei gĭr hlăm klei đăo leh anăn tŭ klei arăng mưč mač, klei arăng ngă jhat, wăt klei êka hlăm asei mlei kyua hlue ngă klei Khua Yang mtô hưn kơ klei digơ̆ đăo sĭt. Klei bi mni kơ hlei pô “gĭr” truh knhal tuč jing klei bi mtlaih kluôm ênŭm, anăn jing klei pah mni năng djŏ.
Ya klei Khua Yang Yêsu lač hlăk êlâo dôk mâo hlăm ênuk drei, hlăk êjai anak mnuih tŭ ư kơ klei mĭn soh čhuai kơ klei bi dôk êkei mniê, klei khăp ung mô̆ gŏ sang, hnơ̆ng čuăn knuih hdĭp mpŭ kơ anak mnuih leh anăn klei bi mđĭ pô, ai tiê amâo mâo klei khăp, knŏng bi mĭn kơ pô hdĭp kơ pô, hdră kpưn đĭ kơ mdrŏng amâo djŏ, dlăng mnơ̆ng dhơ̆ng ngăn drăp jing klei kñăm kơ klei hdĭp… Boh klei knuih hdĭp toh hroh đĭ lar leh anăn mâo lu mnuih dlăng anăn jing hdră hdĭp mrâo mrang! Phung đăo kơ Krist hdĭp ti krah ala ƀuôn snăn brei kjăp ai tiê đăo kơ Khua Yang, čang guôn hruê Khua Yang lŏ hriê leh anăn hdơr kơ klei Khua Yang mtô: “Leh anăn kyuadah klei jhat ƀai jing lar, klei khăp hlăm lu mnuih srăng jing êăt” (êlan 13). Khua Yang hưn êlâo kơ klei bi knăl hruê knhal tuč amâo brei drei êdu ai ôh ƀiădah mñă kơ drei brei kriăng hriăm Klei Aê Diê Blŭ čiăng hdĭp hlue si Klei Aê Diê Blŭ mtô, hlue ngă knuih hdĭp thâo khăp, mă bruă, leh anăn bi mguôp nanao hŏng êpul êya klei đăo čiăng hdơ̆ng bi mđĭ ai, bi đru krơ̆ng kjăp klei đăo truh hruê bi tuôm hŏng Khua Yang.
Mâo mơ̆ klei soh dôk ngă kơ drei ƀrư̆ hruê ƀrư̆ kbưi hŏng klei đăo hlăm Khua Yang?
Wah lač: Ơ Khua Yang, bi mni kơ Ih brei leh kâo ƀuh êlâo kơ klei bi knăl hruê knhal tuč. Akâo kơ Khua Yang răng kriê kâo hlăm klei đăo sĭt suôr, wăt tơdah lăn ala riêng gah kâo dôk lĕ êlam hlăm klei soh, akâo kơ Ih đru kâo sĭt suôr hŏng Ih truh hruê knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Galati 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
