Mathiơ 24:12-13
“Kơplah noh kon bơngai rai đunh rai kơnê̆ dêh. Lu sư chă pơtuah lu bơngai lui, na lu bơngai lui rai pă gan ‘mêm kơ ‘Bok Kei-Dei hăm bôl buăl boih.” (Mathiơ 24:12)
Nơ̆r jet tơchĕng pơwao:
- Tơdrong tơdra ayơ lăm năr tuch luch mă Kră Yang Yêsu đei bơ tho lăm Sơ̆p hla bơar Nơ̆r ‘Bok Kei-Dei ‘nâu?
- Bơngai lui kăl kơ pơm kiơ kơplah lăm tơdrong arih rai đunh rai kơnê̆?
Tơdrong tơdra lăm năr wă jê̆ tôch Kră Yang bơtho pơtrơp dơ̆ng “Kơplah noh kon bơngai rai đunh rai kơnê̆ dêh. Lu sư chă pơtuah lu bơngai lui, na lu bơngai lui rai pă gan ‘mêm kơ ‘Bok Kei-Dei hăm bôl buăl boih.” (trong 12). Tơdrong yoch rai đunh rai dêh păng kon bơngai kư̆m rai lăng Khôi Juăt Kră Yang rai ưh kơ bơngơ̆t. Tơdrong yoch wơ̆ pran rai dêh păng kon bơngai roi pơm ‘bôh pơdah lăm đon tơdrong yoch, tơ ala teh dah sơng iŏk lăp đon păng mơnat, pơm kơ lơ bơngai arih ‘maih pơm kiơ̆ Khôi Juăt Kră Yang chu iŏk tơdrong pơhlŭ achăng tơdrong tơchĕng kơdih. Chu kiơ̆ tơdrong ‘maih wă kơdih. Kră Yang Yêsu đei bơtho tơ’bôh tơdrong arih kon bơngai lăm jơhnơr kơplah Kră Yang wă jê̆ jur tơdrong yoch rai đunh rai dêh, năm tơplơ̆ kơ Nơ̆r Kră Yang ‘Bok Kei-Dei đei bơtho. Kon bơngai ưh pă ôn tơdrong kơnê̆ krưp lăm tơdrong yoch lăm lei pơma pơdah rơđah, pơ ư kơ tơdrong yoch lăng tơdrong yoch ‘noh kiơ̆ thoi kơ jơhnơr hmă đĕch. Lu sư pơma chrih tơdrong ‘Bok Kei-Dei hơgăt ‘noh ưh pă trŏ kơ jơhnơr bơih, pơgăn lê̆ tơdrong hơgei kon bơngai!
Kơplah kon bơngai arih rai đunh rai kơnê̆ lăm jơnăr wă tôch ‘noh, Kră Yang Yêsu pơtrŭt lu bơngai đei đon lui tơpă “lui kơjăp truh năr tôch”, Na bơngai noh gơh klaih (trong 13) ưh kơ trŏ yua kơ “kơjăp” mă lei yua kơ gơh klaih sư adrin lăm đon lui păng pŭ iŏk đe pơchê pơjăm, đe pơm kơnê̆, mă khan lu sư ơh sơ’ngon gah sĕch akar yua kơ wă pơm kiơ̆ tơdrong Kră Yang bơtho pơsĭt đon lui lu sư. Tơmam apah ‘măn kơ đe bu mă “kơjăp” truh năr tôch sư gơh klaih. Tơmam apah noh trŏ tơpă.
Dôm tơdrong Kră Yang Yêsu bơtho đơ̆ng sơ̆ đei ‘bơm truh kơ jơhnơr lu bơ̆n dang ei hrei âu, kơplah kon bơngai drơ̆ng pơm kiơ̆ tơdrong ưh kơ trŏ gah pơm pơyô kư̆ kă, tơdrong ‘mêm lăm hnam dơnŏ, lu tơdrong hơgăt pơm ‘lơ̆ng kon bơngai păng pơm kiơ̆ kơ jơ-hngơ̆m kơdih, băt arih kiơ̆ kơdih đĕch. Lu tơdrong jang sa chă mơdrŏng chă pơgâm, lăng mŭk tơmam noh tơdrong kiơ nhăm v.v….tơdrong yoch rai đunh rai dêh păng lơ bơngai lăng arih thoi noh khan trŏ! Bơngai lui arih tơ ala teh thoi noh athei mă kơjăp lăm đon lui kơ Kră Yang, chang gô năr Kră Yang wă jur păng chih răk nơ̆r Kră Yang bơtho: “Mă-lei dah bu adrin lui kơ Inh truh năr tôch, bơngai ‘noh gô klaih.” (trong 13). Kră Yang tơbăt hơdrol wă tơdra lăm năr tuch luch wă kơ lu bơ̆n huay kơ bơ̆l hăl mă lei tơ’blŏk kơ lu kăl kơ pơnam pơhrăm nơ̆r Kră Yang wă arih kiơ̆ nơ̆r Kră Yang bơtho pơm tơ’bôh tơdrong ‘mêm bơ̆jang, păng tơ’bưh hăm tơpôl đon lui wă pơtrŭt dih băl, tơiung dih băl kơjăp đon lui ding truh năr tơbơ̆p Kră Yang.
Ơ Kră Yang, inh bơnê kơ Ih đei tơ’bôh kơ inh băt tơdra năr tuch luch. Apinh Ih wei inh lăm đon lui kơjăp, mă khan teh đak jum dăr inh ‘bĕnh tơdrong yoch, apinh Ih tơgŭm inh tơnăp hăm Ih truh năr tôch.Yua anăn Kră Yang Yêsu Krist. Amen
Đei tơdrong yoch kiơ pơm kơ lu bơ̆n rai đunh rai ataih đon lui kơ Kră Yang?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Galati 6
Kênh Youtube BHKTHN:
