Klei Aê Diê Blŭ: II Klei Yăl Dliê 30:15-16
Êlan kliăng: “Brei diih hur har, đăm alah ôh. Brei diih mă bruă kơ Khua Yang hŏng jih ai tiê” (Rôm 12:11).
Klei êmuh ksiêm mĭn: Ya ngă phung khua ngă yang leh anăn phung Lêwi mâo klei hêñ? Ya klei diñu ngă mtam? Ya drei srăng ngă tơdah drei mâo klei hêñ tơdah ƀuh kơ drei pô jing êăt êjai phung ayŏng adei hdĭp ênuah ênô, thâo khăp leh anăn kmah?
Trăn Klei Aê Diê Blŭ anei čih yăl dliê kơ Knăm Klei Găn ênuk Mtao Hêsêkia leh sui thŭn amâo tuôm lŏ ngă ôh hlăm čar Israel leh anăn čar Yuđa. Diñu bi mdjiê biăp Klei Găn ti hruê pluh pă mlan tal dua tui si lơ phung Yuđa. Tui si klei čih hlăm Klei Kbiă kdrêč 12, Yêhôwa yơh jing Pô mjing leh Knăm Klei Găn, leh anăn mtă brei phung Israel hdơr pioh grăp thŭn čiăng bi hdơr kơ jih bruă Ñu ngă leh tơdah bi kbiă digơ̆ mơ̆ng čar Êjip, kyuanăn Mtao Hêsêkia čiăng phung ƀuôn sang ngă tui si Klei Aê Diê Blŭ mtă leh (Klei Yap 9:13). Tui si djŏ, Knăm Klei Găn srăng ngă ti hruê pluh pă mlan sa, ƀiădah hlăk anăn ka ênŭm ôh phung khua ngă yang bi doh diñu pô (II Klei Yăl Dliê 30:3), leh anăn kăn phung ƀuôn sang bi kƀĭn leh hlăm ƀuôn Yêrusalem rei, kyuanăn mtao, phung khua leh anăn jih jang phung bi kƀĭn bi trông čhai leh anăn bi tŭ ư srăng hdơr mpŭ kơ Knăm Klei Găn hlăm mlan dua. Snăn yơh, diñu ăt ngă djŏ tui si klei Aê Diê mtă leh kơ klei hdơr mpŭ kơ Knăm Klei Găn hnui pioh kơ phung mâo klei bi kpăk hŏng klei năng (Klei Yap 9:11).
Tơdah ƀuh phung ƀuôn sang mâo ai tiê hur har, čiăng hdơr mpŭ kơ Knăm Klei Găn tui si klei Aê Diê mtă leh, jih jang phung khua ngă yang leh anăn phung Lêwi dôk ngă kĭ kơ̆ ka bi doh ôh diñu pô tui si klei mtă leh, diñu mâo klei hêñ. Snăn diñu bi doh diñu pô mtam leh anăn djă ba mnơ̆ng myơr čuh kơ sang Yêhôwa. Diñu djă bruă arăng jao leh kơ diñu tui si klei mtă leh, diñu mă tŭ êrah mơ̆ng kngan phung Lêwi leh anăn nao hƀrah. Mâo lu mnuih hlăm phung bi kƀĭn ka bi doh ôh diñu pô snăn diñu pô amâo dưi ôh bi mdjiê biăp Klei Găn, kyuanăn yơh, phung Lêwi bi mdjiê biăp Klei Găn wăt tơdah bruă anăn amâo djŏ bruă klam kơ digơ̆ ôh.
Mmông anăn, klei phung ƀuôn sang hur har bi luč jih klei êăt, klei amâo uêñ mĭn hlăm ai tiê phung khua ngă yang leh anăn phung Lêwi. Mơ̆ng anôk mâo klei hêñ, diñu kmhal kơ klei soh leh anăn lŏ hur har mă bruă kơ Khua Yang. Amâo djŏ diñu knŏng bi leh bruă arăng jao kơ diñu ôh, ƀiădah wăt ngă hŏng jih ai tiê leh anăn ngă êgao hĭn kơ bruă klam diñu mơh, kyuanăn diñu dưi bi leh lu bruă hlăm hruê knăm yuôm bhăn anăn. Mâo lu blư̆ drei ăt mâo klei awăt leh anăn klei êăt mơh hlăm klei mă bruă kơ Khua Yang, amâodah amâo čiăng hưn Anăn Khua Yang ôh. Tơdah ƀuh phung ayŏng adei hur har hưn Klei Mrâo Mrang Jăk snăn drei mâo klei nač, amâodah kăn uêñ mĭn rei kyuadah lač anăn amâo djŏ bruă drei ôh. Khua Yang čiăng drei “mâo klei hêñ” msĕ si phung khua ngă yang leh anăn phung Lêwi anăn, leh anăn kmhal hĕ kơ klei soh, bi mlih jing hur har ngă Klei Mtă Prŏng Khua Yang leh anăn mă bruă kơ Ñu hŏng jih ai tiê.
Si ngă drei mâo klei hêñ mơ̆ tơdah ƀuh klei pô mkăn hur har?
Wah lač: Ơ Khua Yang, đru kâo lui hĕ klei awăt, klei êăt, brei kâo mâo ai tiê hur har mă bruă kơ Ih leh anăn hưn Anăn Ih. Đru kâo tui knuih phung mâo klei hur har hlăm Phung Sang Aê Diê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
