Klei Aê Diê Blŭ: Y‑Mathiơ 19:10-12
Êlan kliăng: “Knŏng brei grăp čô dôk hdĭp tui si klei Khua Yang brei kơ ñu leh, tui si ñu jing hlăk Aê Diê iêô ñu. Snăn jing klei kâo mtă leh kơ jih jang Phung Sang Aê Diê” (I Kôrantô 7:17)
Klei êmuh ksiêm mĭn: Leh hmư̆ Khua Yang Yêsu mtô kơ klei bi dôk ung mô̆ ya klei phung ƀĭng kna lač kơ Ñu? Ya ngă? Si ngă Khua Yang lŏ wĭt lač leh? Ya klei hriăm drei mâo kơ klei dôk hliê?
Leh hmư̆ klei Khua Yang Yêsu lŏ wĭt lač kơ phung Pharisi, phung ƀĭng kna lač kơ Ñu snei, “Tơdah mâo klei snăn sa čô êkei hŏng mô̆ ñu, jăk hĭn ñu amâo dôk mô̆ ôh” (êlan 10). Phung ƀĭng kna dôk hdĭp anôk mâo lu klei bi lui ung mô̆ arăng amâo phat kđi ôh. Diñu ƀuh jing dleh sĭt tơdah ung mô̆ dưi bi lui mă knŏng hjăn hlăm klei tlĕ piu đuč, kyuanăn hŏng klei čoh čuăn kơ klei bi lui ung mô̆ dleh dlan msĕ snăn jăk hĭn dôk hliê mơh.
Drei dưi săng tui si klei mĭn jăk jing – phung ƀĭng kna huĭ kơ diñu amâo dưi djă pioh ôh klei bi mguôp hdơ̆ng ung mô̆, diñu huĭ kơ klei soh ngă klei knhông amâodah tlĕ piu. Klei Khua Yang Yêsu lŏ wĭt lač brei digơ̆ thâo klei dôk hliê amâo djŏ digơ̆ pô dưi čuăn ngă mă ôh “Amâo djŏ jih jang mnuih ôh dưi tŭ klei anei, ƀiădah knŏng kơ phung arăng brei leh klei anăn” (êlan 11). Klei dôk hliê jing klei Aê Diê brei. Khua Yang Yêsu bi êdah tlâo mta klei. Tal sa, phung jing kriâo mơ̆ng hruê amĭ kkiêng kơ diñu amâodah diñu amâo mâo klei čiăng kơ klei êkei mniê ôh. Tal dua, phung tŭ klei pô mkăn bi kriâo kyua sa mta klei đăo amâodah kyua sa mta klei kñăm čiăng. Tal tlâo, phung bi kriâo diñu pô kyua Ƀuôn ala mtao Aê Diê, tinei Khua Yang Yêsu čiăng lač kơ klei čŏng čiăng dôk hliê mơ̆ng phung mâo sĭt klei Aê Diê brei dôk hliê msĕ snăn pioh mă bruă kơ Aê Diê. Khua Yang Yêsu čiăng phung ƀĭng kna thâo săng djŏ kơ klei dôk hliê čiăng đăm mâo klei blŭ amâodah bruă ngă čhuai ôh hlăk mmông kƀah klei mĭn.
Tơdah dlăng kơ hnơ̆ng čuăn kơ klei bi dôk ung mô̆ hlăm lăn ala anei amâo mâo klei arăng dlăng yuôm ôh, mâo lu phung đăo ăt mâo klei mĭn jhat mơh kơ klei bi dôk ung mô̆. Hlăm Klei Mphŭn Dơ̆ng 2:18 Aê Diê lač snei, “Amâo jăk ôh êkei anăn dôk hjăn”, leh anăn Khua ƀĭng kna Y‑Pôl msĕ mơh mtă kơ phung đăo: “Ƀiădah tơdah diñu amâo dưi ư̆ ôh, brei diñu bi dôk ung mô̆. Kyuadah tơdah huĭ mâo klei tluh snăk, jăk hĭn bi dôk ung mô̆” (I Kôrantô 7:9). Brei drei bi klă hĕ drei pô sĭt mơ̆ drei mâo klei brei dôk hliê amâodah hơăi. Tơdah knŏng kyua klei jing anôk drei dôk hdĭp, kyua klei luč klei čang hmăng kơ asei pô amâodah mâo pô mkăn ngă kơ drei mĭn drei amâo dưi mâo sa klei khăp sĭt leh anăn sa boh gŏ huă mơak mñai ôh, snăn răng bĕ, huĭdah drei dlăng hơăi mang kơ klei khăp leh anăn klei bi dôk ung mô̆ Aê Diê brei. Tơdah ară anei hin Khua Yang brei drei dôk hliê čiăng kơ êdei anăp drei srăng mâo klei khăp leh anăn klei bi dôk ung mô̆ klă ênŭm, snăn gưt bĕ kơ klei Khua Yang čiăng.
Si ngă drei thâo kral mơ̆ klei Khua Yang čiăng hlăm klei drei bi khăp leh anăn bi dôk ung mô̆?
Wah lač: Ơ Khua Yang, đru kâo thâo kral klei Ih čiăng hlăm djăp mta klei Ih brei truh kơ kâo, đru kâo gưt kơ klei Ih čiăng hlăm klei dôk hliê amâodah bi dôk ung mô̆. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 15
Kênh Youtube BHKTHN: