Klei Aê Diê Blŭ: I Kôrantô 14:1-5
Êlan kliăng: “Kyuadah hlei pô blŭ klei blŭ amâo mâo pô thâo, amâo blŭ kơ mnuih ôh, ƀiădah kơ Aê Diê. Kyuadah amâo mâo pô thâo săng klei ñu ôh, ƀiădah ñu blŭ klei hgăm hlăm Mngăt Myang.” (I Kôrantô 14:2)
Klei êmuh ksiêm mĭn: Khua ƀĭng kna Y-Pôl mtă kơ phung đăo Kôrantô čang hmăng kơ ya mta klei? Si ngă ñu mblang Klei brei thâo Blŭ Klei tue? Ya ngă Sang Aê Diê ba yua soh klei brei anei? Si ngă drei srăng ngă tơdah tuôm hŏng mnuih dưi brei thâo blŭ klei tue?
Hlăm kdrêč 13, Khua ƀĭng kna Y-Pôl brei drei ƀuh klei yuôm bhăn lă lar leh anăn yuôm bhăn mơ̆ng klei khăp. Klei anăn amâo djŏ ñu hngah kơ klei yuôm bhăn mơ̆ng dŭm klei hơêč hmưi mkăn, khăgơ̆ klei brei anăn amâo srăng mâo ôh ti hruê Khua Yang lŏ hriê, hlăk êjai klei thâo săng mơ̆ng Phung đăo truh kơ klei kluôm ênŭm. Mklăk hŏng anăn, Khua ƀĭng kna Y-Pôl mphŭn čih kdrêč 14 hŏng klei iêu mthưr kơ phung đăo Kôrantô “Tui duah bĕ klei khăp, leh anăn čiăng snăk kơ klei Yang Mngăt Jăk brei…” Dua klei brei ñu mblang ti anei jing thâo blŭ klei tue leh anăn blŭ hưn êlâo.
Blŭ klei tue jing klei hơêč hmưi djŏ tuôm kơ klei blŭ mdê hĭn, Klei blŭ anăn năng ai jing sa klei blŭ tač êngao mnuih blŭ ka tuôm hriăm ôh, amâo dah jing sa klei blŭ amâo mâo mnuih thâo săng ôh. Klei yuôm bhăn Khua ƀĭng kna Y-Pôl mblang ti anei jing mnuih blŭ klei tue amâo blŭ hŏng anak mnuih ôh, ƀiădah blŭ hŏng Aê Diê kyua mnuih anăn blŭ kơ bruă mâo leh Yang Mngăt Jăk mă bruă hlăm ai tiê kyuanăn “amâo mâo pô thâo săng ôh” (êlan 2). Kyuanăn ñu lač: “Hlei pô blŭ klei blŭ amâo mâo pô thâo, đru ñu pô” (êlan 4a). Kyua anăn, klei brei anei knŏng dưi yua kơ sa čô mnuih plah wah ñu hŏng Aê Diê. Leh anăn hlăm êlan 13, ñu mñă klă sĭt blŭ amâo wah lač hŏng klei tue ti krah Sang Aê Diê, čiăng kơ grăp čô mnuih dưi Amen snăn “Kyua anăn hlei pô blŭ klei blŭ amâo mâo pô thâo, brei ñu wah lač čiăng mâo klei dưi mblang.”
Snăn blŭ klei tue jing sa klei Yang Mngăt Jăk brei, leh anăn drei thâo Sang Aê Diê Kôrantô mđing êdi kơ klei brei thâo blŭ klei tue, khădah mâo lu mnuih ba yua amâo djŏ ôh klei brei anei ti mmông dôk kƀĭn kyua amâo thâo săng klă. Êngao anăn, phung đăo ti Kôrantô mjhua hŏng klei anăn leh anăn yap anăn jing hnơ̆ng mkă kơ klei đaŏ hrô kơ mnơ̆ng yua čiăng mkŏ mjing asei mlei pô. Kyuanăn čiăng êdi klei mtô mơ̆ng Khua ƀĭng kna Y-Pôl truh kơ phung đăo ti Kôrantô leh anăn phung drei ară anei. Dưm ti dlông hĭn klei mpŭ kơ klei blŭ klei tue jing klei soh, tơdah drei hngah kơ klei brei thâo blŭ klei tue srăng amâo mpŭ kơ klei brei mơ̆ng Yang Mngăt Jăk, kyuanăn tơdah tuôm hŏng phung thâo blŭ klei tue, brei drei akâo klei knhâo knhăk mơ̆ng Aê Diê thâo kơ klei soh, klei djŏ, đăm lĕ ôh hlăm klei soh msĕ si Sang Aê Diê Kôrantô êlâo dih.
Si ngă drei tuôm bi mĭn kơ klei brei thâo blŭ klei tue hlăm sang Aê Diê?
Ơ Yang Mngăt Jăk Aê Diê, Pô brei djăp klei yuôm bhăn kơ Sang Aê Diê, akâo kơ Ih brei kơ kâo klei thâo mĭn čiăng thâo kral bruă mơ̆ng Ih hlăm Sang Aê Diê leh anăn dŭm klei Ih brei kơ kâo srăng ba yua tŭ dưn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 13:17-14:10
Kênh Youtube BHKTHN:
