Klei Aê Diê Blŭ: Rôm 3:1-8
Êlan kliăng: “Mâo lu klei yuôm mơh. Êlâo hĭn, Aê Diê jao leh klei blŭ Ñu kơ phung Yuđa” (Rôm 3:2)
Klei êmuh ksiêm mĭn: Ya klei brei jăk mdê phung ƀuôn sang Aê Diê ruah mâo? Ya klei brei phung Israel thâo kơ knuih leh anăn hdră êlan Aê Diê mă bruă? Mâo mơ̆ klei mtă brei phung ƀuôn sang Aê Diê ruah wăt phung đăo kơ Krist hruê anei răng?
Hlăm kdrêč 2, Khua ƀĭng kna Y‑Pôl lač klei Aê Diê phat kđi bruă grăp čô mnuih ngă tui si klei thâo săng kơ klei djŏ amâodah soh Aê Diê bi êdah leh hlăm klei bhiăn amâodah ai tiê kpă. Tơdah phung Israel thâo săng klă leh kơ klei soh, klei djŏ hŏng klei bhiăn ƀiădah diñu kăn gưt kơ klei bhiăn lei, Aê Diê srăng bi kmhal diñu hŏng klei kpă msĕ si Aê Diê bi kmhal phung tue mơh. Snăn ya klei yuôm mâo tơdah jing phung ƀuôn sang Aê Diê? Khua ƀĭng kna Y‑Pôl lač, phung ƀuôn sang Aê Diê ruah mâo klei brei jăk jĭn hĭn kơ phung găp djuê mkăn hlăm djăp mta. Klei brei jăk prŏng hĭn jing Aê Diê jao leh klei Ñu blŭ kơ digơ̆ (êlan 2). Hŏng Klei Aê Diê blŭ, phung Israel thâo klă kơ knuih leh anăn êlan hdră Aê Diê mă bruă. Diñu mă tŭ klei bhiăn mjing atur kơ klei hdĭp êbeh dlai wăt kơ mngăt, ai tiê leh anăn asei mlei (Klei Kbiă 19-20). Phung Israel jing sa phung găp djuê mâo klei jăk jĭn kyua phung aê diñu Y‑Abraham, Y‑Isăk leh anăn Y‑Yakôp khăp leh anăn gưt asăp kơ Aê Diê hŏng jih ai tiê (Klei Kbiă 20:6). Msĕ mơh, mơ̆ng găp djuê Y‑Abraham Aê Diê ƀuăn srăng brei klei jăk jĭn kơ lăn ala. Mơ̆ng phung ƀuôn sang Aê Diê ruah, Pô Bi Mtlaih srăng kbiă hriê leh anăn ngă bruă Ñu bi mtlaih ti krah digơ̆ (Y‑Êsai 11:1-10).
Lŏ čuê, Khua ƀĭng kna Y‑Pôl lač Aê Diê jing Pô sĭt suôr leh anăn kpă ênô. Aê Diê ăt djă pioh klei Ñu bi mguôp hŏng phung ƀuôn sang Ñu ruah leh wăt tơdah ti krah digơ̆ mâo đa đa mnuih gao klei bi mguôp leh anăn blŭ luar. Hlăm jih jang ênuk, phung Israel mâo klei bi knal kơ klei jăk leh anăn klei pap prŏng Aê Diê. Klei diñu ngă soh leh anăn klei awăt diñu bi êdah klă hĭn êjai klei kpă ênô leh anăn klei pap Aê Diê amâo mâo knhal ôh. Wăt snăn dưn mơh, Khua ƀĭng kna Y‑Pôl ăt mtă mơh kơ diñu răng kơ klei kpă ênô Aê Diê hlăm klei phat kđi lăn ala. Aê Diê amâo yap mnuih mdê mdê ôh, kyuanăn phung Yuđa gao klei bi mguôp ăt srăng tŭ klei Aê Diê bi kmhal mơh.
Hruê anei, mâo lu phung đăo kơ Krist dôk pĭt wơr hlăm klei Aê Diê khăp snăn amâo tlă anăp sĭt ôh hŏng klei doh jăk Ñu. Phung anei lač Aê Diê jing Pô pap brei nanao leh anăn klei pap Ñu prŏng êbeh dlai. Kyuanăn diñu amâo dlăng yuôm ôh leh anăn bi mjhua klei khăp Aê Diê, bi wê klei bhiăn, čŏng čiăng ngă klei bi hrăp kơ klei kđeh diñu čiăng leh anăn mĭn Aê Diê bŏ hŏng klei jăk amâo srăng bi kmhal diñu ôh. Khua ƀĭng kna Y‑Pôl lač, “Klei bi kmhal kơ diñu jing kpă” (êlan 8b). Brei grăp čô drei răng kyuadah klei brei jăk mdê nao mbĭt hŏng bruă klam nanao.
Si drei srăng hdĭp čiăng năng hŏng klei brei jăk mdê Aê Diê brei?
Wah lač: Ơ Aê Diê Tlâo Čô Yang, kâo lač jăk kơ Ih ruah leh anăn bi mtlaih leh kâo mơ̆ng klei bi kmhal hlŏng lar, brei kơ kâo klei brei jăk mdê kdlưn hĭn. Đru kâo huĭ mpŭ kơ Ih nanao, mpŭ leh anăn djă pioh Klei Ih Blŭ hlăm hdruôm hră Klei Aê Diê Blŭ. Brei klei hdĭp kâo grăp hruê bi êdah boh mơ̆ng Yang Mngăt Jăk leh anăn bi guh kơang kơ anăn Ih. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 5:1-6:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
