Klei Aê Diê Blŭ: Klei Kbiă 31:12-17.
Êlan kliăng: “Blŭ bĕ kơ phung ƀuôn sang Israel, ‘Brei diih hdơr pioh jih jang hruê sabat kâo, kyuadah klei anăn jing klei bi knăl kâo hŏng diih hlăm jih jang ênuk diih, čiăng kơ diih dưi thâo kơ kâo jing Yêhôwa, pô bi doh jăk diih” (Klei Kbiă 31:13).
Klei êmuh ksiêm mĭn: Si klei yuôm bhăn bruă djă pioh hruê sabat hŏng phung ƀuôn sang Israel? Djă pioh hruê sabat jing ya bruă ngă? Si phung đăo kơ Krist hruê anei djă pioh hruê Sabat Aê Diê?
Rŭ mdơ̆ng Sang čhiăm jing sa hdră bruă čiăng mâo lu hruê ai. Wăt tơdah Aê Diê thâo phung ƀuôn sang Aê Diê mâo lu bruă, ƀiădah Ñu ăt mtă mtăn diñu brei djă pioh hruê mdei jing hruê doh jăk. Bruă djă pioh hruê sabat Aê Diê yuôm bhăn snăk hŏng phung Israel, anei jing klei bi knăl čiăng grăp čô mnuih thâo diñu jing mnuih ƀuôn sang Aê Diê, Pô bi doh jăk diñu (êlan 13). Klei bi kmhal kơ phung amâo djă pioh hruê sabat jing klei djiê. Phung ƀuôn sang Israel djă pioh hruê sabat Aê Diê msĕ si klei bi mguôp lă lar diñu hŏng Aê Diê. Diñu srăng mă bruă hlăm năm hruê leh anăn hruê tal kjuh msĕ si Aê Diê hrih mjing leh adiê, lăn ala, jih jang mnơ̆ng hlăm năm hruê leh anăn hruê tal kjuh snăn Ñu mdei.
Aê Diê bi hriăm phung ƀuôn sang Ñu bŏ pă pluh thŭn hlăm kdrăn tač thâo mă bruă leh anăn mdei hlue si wưng Ñu mă bruă. Aê Diê mkăp mnơ̆ng ƀơ̆ng huă kơ diñu ƀiădah Ñu amâo tuh mana sa kăm ôh čiăng kơ diñu ênưih duñ. Mana lĕ hlăm djăp anôk mơ̆ng aguah ưm leh anăn srăng rai sĭt yang hruê ƀlĕ. Mana srăng jhat tơdah pioh kơ hruê êdei; hjăn hruê tal năm phung ƀuôn sang Aê Diê duñ lu hĭn mana čiăng pioh kơ hruê tal kjuh ƀiădah amâo jhat ôh. Phung ƀuôn sang Aê Diê mơ̆ng hđeh truh kơ mduôn kgŭ ưm čiăng nao duñ mana hlăm năm hruê, hruê tal kjuh diñu mdei. Snăn, diñu dưi mdei bruă pô čiăng kơrŭ klei suaih pral leh năm hruê mă bruă leh anăn ăt pioh lu mmông čiăng hdơr kơ bruă Aê Diê ngă kơ pô. Bruă djă pioh hruê sabat lŏ bi êdah klei gưt asăp Aê Diê leh anăn đăo kơ Aê Diê jing Pô mkăp brei djăp mta mnơ̆ng čiăng yua.
Hdră kñăm Aê Diê hrih mjing anak mnuih jing čiăng kriê dlăng lăn ala Ñu hrih mjing leh, brei kơ anak mnuih klei hơ̆k mơak dưi dưn boh mnga mơ̆ng bruă pô ngă, leh anăn boh nik mkŏ mjing klei bi hgŭm siă suôr hŏng Aê Diê. Tơdah amâo mâo hruê mdei, drei srăng hdĭp bi kpleh hŏng hdră kñăm, klei hdĭp luč klei yuôm bhăn leh anăn ƀrư̆ hruê kbưi hĭn hŏng Aê Diê. Khădah, hlăm ênuk drei, lu mnuih amâo ênưih ôh mdei mă bruă hlăm sa hruê. Čiăng dưi ngă klei anei, brei drei kčah djŏ klei mđing tal êlâo Aê Diê jing êlâo hĭn, leh anăn čang hmăng sa klei hdĭp bi mơak kơ Aê Diê.
Hruê anei, phung đăo kơ Krist amâo djă pioh ôh hruê sabat msĕ si phung ƀuôn sang Israel ƀiădah djă pioh ai tiê hruê sabat. Drei mdei mă bruă leh anăn kkuh mpŭ kơ Aê Diê hlăm knăm kjuh jing hruê Khua Yang Yêsu kbiă lŏ hdĭp; anei jing wưng mdei mbĭt anăn mđing tal êlâo kơ klei bi mguôp hŏng Aê Diê, hŏng gŏ sang leh anăn ayŏng amai adei sa klei đăo.
Drei djă pioh djŏ ai tiê Khua Yang čiăng hlăm hruê kjuh mơ̆?
Wah lač: Ơ Khua Yang, kâo bi mni lač jăk kơ Ih brei leh hruê mdei čiăng kâo dưi kơrŭ wĭt klei ktang, nao ti Sang Aê Diê mpŭ leh anăn bi mni Aê Diê, tŭ mă Klei Aê Diê Blŭ jing mnơ̆ng ƀơ̆ng kơ mngăt ai tiê. Bi mni kơ Ih kyua klei bhiăn Ih đru kâo hdĭp giăm Ih, hdĭp yuôm bhăn leh anăn jăk mơak.
Dlăng Klei Aê Diê Blŭ hlăm tlâo thŭn: Klei Bi Hriêng 3:1-34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
