I Pô Kiă Jăk
Êlan kliăng: “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap” (I Y-Pêtrôs 4:10)
Klei êmuh ksiêm mĭn: Dĭng buăl kiă Aê Diê kiă klei brei mơ̆ng Aê Diê ya pioh ngă? Si ngă pô anăn srăng bi êdah klei sĭt suôr, ai tiê mă bruă leh anăn klei ñu kñăm čiăng yuôm hĭn? Si drei jing dĭng buăl kiă jăk kơ Khua Yang?
Aê Diê brei kơ phung đăo kơ Krist lu klei brei, amâo mâo pô amâo mâo ôh. Klei brei Aê Diê brei amâo djŏ pioh yua knŏng hjăn kơ drei pô, amâodah yua tui si drei pô čiăng ôh. Ƀiădah Klei Aê Diê Blŭ lač, “grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp” (êlan 10). Brei grăp čô phung đăo knang kơ Yang Mngăt Jăk mtrang mngač leh anăn klei ktrâo atăt mơ̆ng phung đăo êlam leh čiăng thâo kral klei brei Aê Diê brei čiăng mă bruă kơ jih jang mnuih, đru bi mđĭ hdơ̆ng găp, đru bi mguôp hưn Anăn Khua Yang ti anôk Ñu dưm drei.
Brei pô kiă klei Aê Diê brei mâo klei sĭt suôr, mă bruă hŏng jih ai tiê, jih ai ktang hlăm jih jang bruă Aê Diê jao. Aê Diê brei kơ grăp čô klei brei mdê mdê. Ti anăp Aê Diê, mnuih mtô Klei Aê Diê Blŭ jing yuôm msĕ mnuih mă bruă mkăn mơh. Aê Diê amâo mâo ksiêm mkă bruă prŏng amâodah bruă điêt ôh, kăn Ñu ksiêm mkă bruă ngă hŏng klei bi êdah leh anăn bruă ngă hŏng klei hgăm rei, ƀiădah Ñu ksiêm mkă mnuih mă bruă hŏng klei sĭt suôr leh anăn amâo sĭt suôr ôh. Kyuanăn, tơdah drei dơ̆ng ngă jih jang bruă brei drei knang nanao kơ klei ktang Khua Yang ngă hŏng jih ai tiê leh anăn jih ai ktang: “Hlei pô blŭ, brei ñu blŭ msĕ si pô hưn klei Aê Diê blŭ. Hlei pô đru bruă arăng, brei ñu mă bruă anăn hŏng klei ktang Aê Diê brei…” (êlan 11).
Pô kiă jăk kơ Aê Diê amâo srăng ngă mkrah dưh, ngă khă bi leh klei, amâodah ngă bruă hdjŭl dêč kơ bruă ktrŏ ôh. Ƀiădah kčưm mă bruă hŏng klei wah lač, akâo kơ Khua Yang brei klei thâo mĭn čiăng mâo hdră leh anăn mâo klei mprăp bi jăk čiăng dưi bi leh hŏng klei jăk hĭn bruă Khua Yang jao leh. Hdơr bĕ Aê Diê yơh jing Pô kiă leh anăn kăp ksiêm dlăng jih jang bruă drei ngă amâo djŏ mnuih ôh. Leh anăn klei Aê Diê kñăm čiăng yuôm hĭn kơ pô kiă jăk jing jih jang klei mtô Klei Aê Diê Blŭ, jih jang klei mă bruă amâo djŏ pioh bi mni kơ ñu pô ôh ƀiădah čiăng “kơ hlăm jih jang klei Aê Diê dưi mâo klei guh kơang hlăm Yêsu Krist” (êlan 11).
Aê Diê brei klei brei čiăng kơ drei mă bruă, bi đru hdơ̆ng drei đĭ hriê kơ prŏng hlăm klei đăo, mkŏ mjing leh anăn bi mđĭ kyar Phung Sang Aê Diê ti lăn ala anei, leh anăn êgao hĭn kơ jih jang jing bi guh kơang kơ Anăn Khua Yang. Đăm bi msĕ hdơ̆ng drei ôh, ƀiădah akâo bĕ kơ Khua Yang đru drei jing pô kiă jăk kơ Ñu dơ̆ng mơ̆ng bruă điêt hĭn. Bi êdah nanao klei mĭn jăk, klei mơai mơ̆ng Khua Yang brei. Leh anăn ya bruă drei ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23). Mbĭt hŏng klei anăn, hdơr pioh klei Khua Yang mtă leh hlăm hră Philip 4:13 snei: “Kâo dưi ngă jih jang klei hlăm Krist, Pô bi ktang kâo.”
Si ngă drei mă bruă hŏng jih ai tiê msĕ si pô kiă jăk kơ Aê Diê leh mơ̆?
Wah lač: Ơ Khua Yang, kâo bi mni kơ Ih kyuadah Ih brei leh kơ kâo klei brei myang. Akâo Yang Mngăt Jăk bi ktang kâo čiăng kơ kâo dưi bi leh jih jang bruă Ih jao leh čiăng kơ Anăn Ih mâo klei guh kơang mơ̆ng klei kâo sĭt suôr mă bruă. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
