Klei Aê Diê Blŭ: Y‑Yêrêmi 31:35-40
Êlan kliăng: “Snei Yêhôwa lač: ‘Knŏng tơdah arăng dưi mkă phung adiê ti dlông, leh anăn knŏng tơdah arăng dưi ksiêm atur lăn ala ti gŭ, hlăk anăn Kâo srăng bi luč hĕ jih jang phung anak čô Israelkyua jih jang klei diñu ngă leh,’ Yêhôwa lač” (Y‑Yêrêmi 31:37).
Klei êmuh ksiêm mĭn: Ya klei drei thâo kơ Aê Diê hlăm trăn Klei Aê Diê Blŭ hruê anei? Ya klei Yêhôwa čiăng lač kơ bruă “mkă phung adiê ti dlông, ksiêm atur lăn ala ti gŭ”? Ya klei hriăm drei mâo leh hriăm kơ klei Aê Diê khăp brei kơ drei?
Anăn iêô Aê Diê jing Yêhôwa kơ phung kahan, sa anăn iêô lač kơ klei dưi kluôm dhuôm, bŏ hŏng klei myang mơ̆ng Aê Diê, klei anei bi êdah hlăm mnơ̆ng dhơ̆ng hlăm êngĭt adiê leh anăn klei bhiăn Ñu kčah kơ yang hruê, mtŭ mlan… msĕ si Khua pô hưn êlâo Y‑Yêrêmi čih leh: “Pô brei yang hruê mtrang êjai hruê leh anăn bi kčah leh kơ mlan leh anăn kơ mtŭ mtrang êjai mlam, pô bi kpư̆ êa ksĭ brei gơ̆ poh yă…” (êlan 35). Ñu ƀuăn hŏng phung ƀuôn sang Israel hlăm êlan 36 jing hbĭl klei bhiăn anei hlăm mtŭ mlan amâo lŏ mâo ôh snăn hlăk anăn kơh digơ̆ amâo lŏ jing ôh phung ƀuôn sang pioh hjăn kơ Ñu. Anei jing klei blŭ bi mklă Aê Diê amâo srăng lui ôh phung djuê ana Ñu ruah leh, “Kyuadah Kâo gơ̆ Yêhôwa amâo thâo mlih ôh; kyuanăn diih, Ơ phung anak êkei Y‑Yakôp amâo rai tuč ôh” (Y‑Malaki 3:6).
Hlăm êlan 37, Yêhôwa lač thiăm hlăm lăn ala anei hlei pô dưi mkă adiê ti dlông leh anăn ksiêm atur lăn ala ti gŭ? Sĭt nik amâo mâo pô ôh. Kyua anăn Yêhôwa ăt srăng kăn lui rei phung ƀuôn sang Ñu kyua klei soh digơ̆ ngă. Yêhôwa srăng brei kơ phung ƀuôn sang Ñu mông găl kmhal klei soh leh anăn Ñu srăng bi mrâo digơ̆, leh anăn Ñu srăng brei klei kčah mrâo hlăm wang Sang Yang “…dơ̆ng mơ̆ng sang tum Hananel truh kơ Ƀăng Jang Kiêng. Klei arăng mkă srăng truh kbưi hĭn, kpă phă kbuôn Garep, leh anăn mơ̆ng anăn srăng wir phă Gôa. Kluôm jih tlung atâo leh anăn hbâo, wăt jih jang hma kbưi hĭn hlue êa hnoh Kidrôn, truh kơ kiêng Ƀăng Jang Aseh phă ngŏ, srăng jing anôk pioh brei kơ Yêhôwa. Hlŏng lar arăng amâo srăng lŏ buč ñu ôh kăn srăng lŏ mdlưh ñu rei.” (êlan 38-40). Wăt tơdah mâo dŭm anôk hlăm klei Aê Diê ƀuăn drei amâo bi mklă ôh ƀiădah Klei Aê Diê Blŭ brei thâo srăng mâo sa anôk Yêhôwa pioh jing doh jăk – jing anôk kơ phung ƀuôn sang huĭ mpŭ Aê Diê dưi êngiê kkuh mpŭ kơ Ñu.
“Yêsu Krist ăt jing msĕ mbruê, hruê anei, leh anăn hlŏng lar” (Hêbrơ 13:8). Klei khăp yuôm bhăn Aê Diê yua čiăng khăp kơ ƀuôn sang Ñu ruah leh ăt jing klei khăp Ñu yua čiăng khăp kơ drei (Y‑Yôhan 3:16, Rôm 5:8). Drei hriê bĕ kơ Aê Diê wăt hlăk êjai drei dôk êdu awăt, soh jhat čiăng klei Ñu khăp mđĭ ai drei hgao jih, hdĭp hlăm klei mguôp mrâo hŏng Ñu.
Ya klei jăk ngă kơ drei čiăng nao giăm Aê Diê nanao?
Wah lač: Ơ Aê Diê pô khăp! Kâo bi mni lač jăk kơ Ih kyua Ih khăp kơ kâo hŏng klei khăp lă lar amâo mlih, akâo kơ Ih đru kâo amâo đuĕ kbưi hŏng Aê Diê ƀiădah dôk hlăm kngan klei khăp Ih čiăng dưi mgang, kiă kriê leh anăn bi mrâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 13:6-31
Kênh Youtube BHKTHN:
