Rôm 14:13-23
“Yua kơ thoi noh na bơ̆n athei adrin ‘biơ̆ tơdrong pơm hiôk kơ bôl buăl hăm ‘nhŏng oh bơ̆n kơdih, rai băt tơgŭm băl lui kơjăp.” (Rôm 14:19)
Nơ̆r jet tơchĕng pơwao:
– ‘Bok Pôl pơma tơpăt tơdrong kiơ gah tơmam sa?
– Hăm đei trong ayơ Khul Bơngai Lui rok kiơ̆ tơdrong hiôk hian păng pơm kơmĭl ‘lơ̆ng dih băl?
– Bơ̆n kăl kơ tơplih tơdrong kiơ wă kơ huay kơ pơm kơ bơngai nai pơm yoch?
Tơdrong sa ‘nhĕm sem dơrong ưh kơ ‘lơ̆ng rơgoh păng tơmam sa pơyơ̆r kơ rup yang ‘noh jing kơ̆l tơm kơ tơdrong pơjah lăm tơ pôl Khul Bơngai Lui. Kơlih ‘bok Pôl juăt bơwei tơdrong juăt ĕnh kơ sa tơmam ưh kơ ‘lơ̆ng rơgoh, jơ ‘nâu sư pơma phơ̆t khan: “Yua kơ inh lui kơ Yêsu Krist păng inh gơnang kơ Sư tơpă, na inh băt tôm tơdrong tơmam sa, ưh kơ đei tơmam sa ayơ bơ̆n sa khan yoch. Đơ̆ng đon bơ̆n tơchĕng khan yoch đĕch na jing yoch.” (trong 14). Kră Yang Yêsu kư̆m ling lang bơtho lu bơngai pơhrăm păng Sư thoi noh mơ̆n, (Markôs 7:15-23). ‘Bok Pôl tơbăt: “Na bơ̆n bơngai mă ‘Bok Kei-Dei pơgơ̆r boih, mah kăl kiơ kơ sa ‘nhĕm ‘nhot thoi noh, mah ‘nhĕng kiơ kơ đe sa et tơdrong ‘noh. Tơdrong bơ̆n pơm ‘lơ̆ng kơ ‘Bok Kei-Dei, tơdrong bơ̆n pơm ‘lơ̆ng kơ bôl buăl, tơdrong bơ̆n chơt ngă ‘nă hal yua kơ đei Yang Bơhngol ‘Lơ̆ng, tơdrong noh bơ̆n kăl.” (trong 17). Yua thoi noh, tơdah pơm kơ ‘nhŏng oh bơ̆n ơh sơ’ngon yua kơ tơmam sa đĕch ‘noh bơ̆n pơm ưh kơ đei tơdrong ‘mêm mơnat yua kơ pơm kơ bơngai ‘noh kơtơih pơ̆k (trong 15-16). Kơplah bơ̆n tơchĕng wă rok kiơ̆ tơdrong ‘lơ̆ng tơpăt, hiôk hơđơ̆ng, hiôk chơt lăm Yang Bơhngol ‘Lơ̆ng lei dôm tơdrong noh nai nhen thoi ưh kơ gan kăl thoi kơ: Bơwei khôi juăt sŏng sa, bơwei năr sa’bat, dah bơwei dôm tơdrong giĕng nai dơ̆ng. Rim ‘nu bơ̆n athei rok kiơ̆ dôm tơdrong kiơ ba ăn tơdrong gơh pơhiôk dih băl păng gơh tơiung dih băl (trong 19). Lu bơ̆n ưh kơ gơh tơiung dih băl păng pơm kơmĭl ‘lơ̆ng dih băl dah nŏng kơ pơjah dih băl, sek tơlang dih băl gah dôm tơdrong ưh kơ gan kăl pơma jô̆ jâu yoch yua kơ tăp tơdrong tơchĕng phara.
Wă kơ gơh pơm tơdrong âu, Khul Bơngai Lui athei wei tơdrong juăt tơ ala âu: Mă mônh, athei bơwei đon lui bơ̆n kơdih: “Mă tơdrong sa et, mă tơdrong kiơ, bơ̆n tơchĕng gơh, mă bơ̆n ‘nĕ roi kơ đe, gô mơ̆ng kơ ‘Bok Kei-Dei đĕch bơtho bơ̆n. Dah bơ̆n tơchĕng trŏ lei lăm jơhngơ̆m bơ̆n mơn kơ hiôk ưh kơ hli kơ yoch ôh.” (trong 22). Tơdah bu lui khan ưh kơ gơh sa ‘nhĕm sem dơrong ưh kơ rơgoh păng tơmam sa đe pơm yang lei ưh kơ sa. Tơdah bu lui khan tôm tơdrong tơmam sa ‘noh ưh kơ ‘mê̆ ôh athei krao khan bơnê ‘mơ̆i na sa “Na inh tơl iĕm thoi âu: Mă tôm tơdrong bơ̆n sŏng sa nhă đak, mă tôm tơdrong bơ̆n jang pơm tơdrong kiơ, bơ̆n athei băt pơư pơang anăn ‘Bok Kei-Dei lăm tôm tơdrong noh” (I Kôrintô 10:31).
Mă ‘bar, ưh kơ sek tơlang păng pơm kơ đe kơtơih pơ̆k (trong 13). Athei ‘blŏk Kră Yang sek tơlang kiơ̆ kơ đon lui rim ‘nu. Bơngai bu ‘noh gô pŭ iŏk dôm tơdrong đêl sư pơm. Tơplih kơ sek tơlang đe nai, bơ̆n athei lăng hơlen bơ̆n kơdih. Kơchăng kơ tơdrong bơ̆n pơm kơ đe pơm yoch. Tơdah yua kơ tơmam sa na pơm kơ đe pơm yoch lei ‘nĕ kơ pơm, “Đe khan: Bơngai lui gơh pơm tôm tơdrong kư̆m bưh, ưh kơ đei kơ̆m ôh. Mălei kư̆m ưh đei tơdrong ưh kơ pơyua kơ bôl buăl, wă kơ sư kiơ̆ kơ ‘Bok Kei-Dei.” (I Kôrintô 10:23).
Ơ Kră Yang, apinh Ih mơnat kơ inh yua kơ inh ngăl pơm kơ đe pơm yoch păng chă sek tơlang đe nai. Apinh Ih ăn kơ inh đei jơhngơ̆m ‘mêm mơnat, gơh hơgei, arih pơm kiơ̆ nơ̆r Ih bơtho, băt tơchĕng tơdrong kiơ gơh, ưh kơ gơh, wă kơ tơiung đon lui inh păng lu ‘nhŏng oh lăm Ih. Yua anăn Kră Yang Yêsu Krsit, Amen.
Tơdrong lu bơ̆n pơm păng nơ̆r lu bơ̆n pơma hăm tơiung đon lui păng pơm kơmĭl ‘lơ̆ng dih băl ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 9
Kênh Youtube BHKTHN:
