Klei Aê Diê Blŭ: Klei Mphŭn Dơ̆ng 1:26-31
Êlan kliăng: “Arăng čiăng kơ phung kiă kriê brei diñu jing sĭt suôr.” (I Kôrantô 4:2)
Klei êmuh ksiêm mĭn: Ya klei kñăm Aê Diê hrih mjing mnuih? Si Aê Diê hrih mjing mnuih? Ya klei mtă Aê Diê brei kơ phung mnuih? Si ih kiă kriê bi jăk djăp mta klei Aê Diê jao kơ ih pô?
Hlăk leh Aê Diê hrih mjing mnơ̆ng hdĭp hlăm êa, hlăm adiê leh anăn ti rŏng lăn, Ñu ƀuh jih jang mnơ̆ng Ñu hrih mjing brei mâo klei kiă kriê. Kyuanăn, Aê Diê Tlâo Čô Yang čuăn hrih mjing mnuih pioh kiă kriê jih jang mnơ̆ng hrih mjing. Snăn Aê Diê hrih mnuih tui si rup Ñu pô; Ñu hrih digơ̆ êkei leh anăn mniê (êlan 26-27). Aê Diê lač klă mngač snăk klei Ñu kñăm čiăng mơ̆ng mphŭn hrih mnuih pioh kiă kriê jih jang mnơ̆ng. pô čih Klei Mmuñ Hđăp ăt lŏ mñă klei pap Aê Diê brei kơ mnuih, anăn jing klei dưi kiă kriê bruă kngan Aê Diê (Klei Mmuñ Hđăp 8:6-8).
Leh hrih mjing mnuih, Aê Diê hơêč hmưi klei jăk jĭn kơ digơ̆ leh anăn lač kơ digơ̆ “Brei diih mâo anak leh anăn bi lar êngŭm, bi bŏ lăn ala, leh anăn brei diih jing khua kơ lăn ala”. Aê Diê hrih mjing mnuih tui si rup Ñu pô leh anăn dôk hdĭp ti dlông rŏng lăn. Ñu jao bruă klam kiă kriê yuôm bhăn kơ mnuih, “brei diih kiă kriê kan hlăm êa ksĭ, čĭm hlăm adiê, leh anăn jih jang mnơ̆ng hdĭp kpư̆ hiu ti lăn ala”. Mđrăm mbĭt hŏng klei mtă brei jing khua kơ lăn ala leh anăn kiă kriê jih jang mnơ̆ng, Aê Diê wăt brei djăp mta mnơ̆ng ƀơ̆ng êbeh dlai kơ mnuih leh anăn kơ jih jang mnơ̆ng mâo êwa hdĭp (êlan 28-30).
Tơdah Aê Diê jao bruă klam kơ mnuih, Ñu ăt brei wăt klei dưi kiă kriê jih jang mnơ̆ng Ñu jao msĕ mơh. Wăt tơdah Y‑Ađam amâo thâo luê êa, amâo thâo phiơr, kăn êrui mĕ si mnơ̆ng êrui hŏng tian rei, ƀiădah Aê Diê brei kơ ñu mâo klei dưi ti dlông jih jang mnơ̆ng anăn, čiăng dưi kiă kriê digơ̆. Klei Aê Diê čiăng mơ̆ng phung mnuih jing klei gưt asăp leh anăn sĭt suôr. Hlăk êjai Y‑Ađam adôk gưt asăp Khua Yang leh anăn sĭt suôr djă pioh klei bi mguôp hŏng Khua Yang snăn ñu ngă jăk bruă kiă kriê mnơ̆ng Aê Diê hrih mjing. Ƀiădah dơ̆ng mơ̆ng mông amâo lŏ gưt klei Aê Diê mtă leh anăn ƀơ̆ng boh Aê Diê kăm, snăn ñu duah êlan đuĕ dăp kơ Khua Yang, weh đuĕ kơ klei bi mguôp sĭt suôr hŏng Khua Yang (Klei Mphŭn Dơ̆ng 3:8). Kyua klei soh yơh ngă bi kgăn hĕ klei ñu bi mguôp hŏng Khua Yang. Mơ̆ng anăn, ñu bi luč hĕ klei pap leh anăn klei dưi kiă kriê jih jang mnơ̆ng Aê Diê jao. Êdei kơnăn, drei ƀuh mtam hlăm gŏ sang Y‑Ađam leh anăn H’Ewơ, diñu amâo lŏ dưi kiă kriê jăk ôh.
Hruê anei, grăp čô phung đăo kơ Krist jing pô kiă kriê kơ Aê Diê leh anăn Ñu dưm grăp čô drei hlăm grăp boh gŏ sang leh anăn hlăm Phung Sang Aê Diê ti ƀuôn sang mdê mdê. Tơdah drei dôk sĭt suôr djă pioh klei bi mguôp hŏng Khua Yang, gưt hlue Klei Ñu Blŭ snăn Khua Yang brei kơ drei klei ktang myang, klei pap leh anăn klei thâo mĭn čiăng dưi kiă kriê bi jăk jih jang bruă Khua Yang jao. Khua ƀĭng kna Y‑Pôl ăt lŏ mñă mơh kơ knuih yuôm sa čô kiă kriê jing brei sĭt suôr (I Kôrantô 4:2).
Si ngă drei dôk sĭt suôr kiă kriê jăk jih jang bruă Khua Yang jao kơ drei mơ̆?
Wah lač: Ơ Khua Yang, bi mni kơ Ih bi mtlaih leh kâo leh anăn brei kơ kâo bruă klam kiă kriê ya mta klei Khua Yang jao. Akâo Khua Yang đru kâo sĭt suôr gưt asăp leh anăn djă pioh klei bi mguôp hŏng Khua Yang nanao, čiăng kơ kâo dưi mguôp mbĭt kiă kriê Phung Sang Aê Diê leh anăn jih jang mnơ̆ng dhơ̆ng Khua Yang jao hŏng klei jăk hĭn kơ jih jang. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 2:6-3:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
