Chivkeeb 1:26-31
Nqe cim zaj kawm:
“Ib qho ntxiv, tus uas luag tsa los ua tubtxib, tus ntawd yuav tsum ncaj ncees rau nws tus tswv” (I Kauleethaus 4:2).
Lus nug rau sawvdaws xav:
– Lub homphiaj Vajtswv tsim tibneeg los ua dabtsi?
– Vajtswv tsim tibneeg zoo li cas?
– Vajtswv samhwm li cas rau tibneeg?
– Koj tswj saib txhua yam uas Vajtswv muab cob rau koj zoo li cas?
Thaum Vajtswv tsim txhua yam hauv hiavtxwv, saum nruab nqhuab thiab saum nruab ntug tas, Vajtswv pom hais tias, txhua yam uas Vajtswv tsim los ntawd yuavtsum muaj tus tswj tus saib xyuas tej ntawd. Vim li ntawd, Vajtswv Vaj Peb Leeg thiaj txiav txim siab tsim muaj tibneeg los tswj los kav txhua yam uas Vajtswv tsim los ntawd. Vajtswv tsim muaj txivneej, pojniam muaj tus yam ntxwv zoo li Vajtswv (nqe 26-27). Vajtswv yeej qhia meej txog Nws lub homphiaj tsim tibneeg yog tsim los tswj thiab kav ib puas tsav yam uas Vajtswv tsim tseg lawm. Tus sau Phau Ntawv Nkauj thiaj hais tias, Vajtswv tsim tibneeg los, Nws pub hwjchim, meejmom rau tibneeg tswj thiab kav txhua yam uas Nws tsim tseg lawm. (Phau Ntawv Nkauj 8:6-8).
Tom qab uas tsim tau tibneeg lawm, Vajtswv foom koob hmoov rau tibneeg thiab samhwm tseg rau tibneeg hais tias; “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb”. Tibneeg tau Vajtswv tsim los muaj tus yam ntxwv zoo li Vajtswv thiab ua neej nyob rau hauv lub ntiajteb no. Vajtswv muab lub peevxwm tseemceeb uas yog tswj saib ib puas tsav yam uas Vajtswv tsim los cob rau tibneeg, tus Tswv hais tias; “Kuv tsa neb kav tej ntses hauv hiavtxwv, tej noog uas ya saum nruab ntug, thiab txhua tsav yam tsiaj uas nyob hauv ntiajteb no”. Thiab Vajtswv tseem pub rau tibneeg thiab txhua yam tsiaj uas tibneeg tswj kav ntawd muaj noj muaj haus npluamias (nqe 28-30).
Thaum Vajtswv muab lub peevxwm tseemceeb uas tswj thiab saib xyuas rau tibneeg Vajtswv kuj pub kom tibneeg muaj hwjchim tswj thiab kav tau txhua tsav yam uas Vajtswv muab cob rau tibneeg lawm. Txawm yog Adas nws tsis mus taus hauv dej, ya tsis tau rau saum nruab ntug… los Vajtswv pub nws muaj hwjchim tswj thiab kav tau txhua yam ntawd huv tibsi. Qhov uas Vajtswv xav tau ntawm tibneeg yog mloog lus thiab ncaj ncees. Yog hais tias, Adas txeev mloog Vajtswv lus thiab ncaj ncees sib txuas nrog Vajtswv ces, nws yeej tswj thiab saib txhua yam uas Vajtswv cob rau nws lawm zoo kawg nkaus. Tiamsis vim Adas tsis mloog Vajtswv lus, mus noj tsob txiv ntoo uas Vajtswv txwv, nws thiaj khiav nkaum Vajtswv, txajmuag tsis kam los fim Vajtswv lawm (Chivkeeb 3:8). Vim kev txhaum quas Adas txoj kev sib txuas nrog Vajtswv. Txij thaum ntawd los, Adas plam koob hmoov thiab lub hwjchim tswj saib txhua yam uas Vajtswv muab cob lawm. Tom qab no, peb pom hais tias hauv Adas thiab Evas lub cuabyig xwb los nkawm twb tswj tsis tau li lawm thiab.
Niaj hnub nimno, ua ib tus ntseeg yog ib tus tubtxib uas tswj thiab saib xyuas txhua yam rau tus Tswv, Nws tso peb txhua tus nyob rau hauv ib tsev neeg lossis ib lub Pawg Ntseeg twg uas sib txawv. Yog peb ncaj ncees tig los txuas nrog Vajtswv thiab mloog Nws lus, ces Nws yuav pub hwjchim, koob hmoov thiab kev txawjntse rau peb tswj thiab saib xyuas tau txhua yam uas Vajtswv muab cob rau peb lawm raws li Nws siab nyiam. Timthawj Paulus thiaj qhia hais tias, tus cwjpwm tshwjxeeb uas tus tswj thiab saib xyuas yuavtsum muaj yog yuavtsum ncaj ncees ua haujlwm rau tus tswv (I Kauleethaus 4:2).
Thov Vajtswv
Vajtswv, nyuam yaus ua Koj tsaug uas Koj tau cawm nyuam yaus thiab pub nyuam yaus muaj feem xyuam tswj saib tej yam uas koj muab cob rau nyuam yaus. Thov pab nyuam yaus ncaj ncees mloog Koj lus thiab sib txuas nrog Koj tsis tu kom nyuam yaus tswj saib Pawg Ntseeg thiab txhua yam uas Koj muab rau yuam yaus lawm kom zoo kawg nkaus. Nyuam yaus tuav Tswv Yexus Khetos lub npe thov, Amees.
Peb puas ncaj ncees tswj saib txhua yam uas Vajtswv muab cob rau peb lawm?
Nyeem Vajluskub hauv peb lub xyoos: I Kauleethaus 2:6-3:22
Kênh Youtube BHKTHN:
https://www.youtube.com/c/bhkthn
