Klei Aê Diê Blŭ: I Y‑Pêtrôs 4:10-11
Êlan kliăng: “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap.” (I Y‑Pêtrôs 4:10)
Klei êmuh ksiêm mĭn: Khua ƀĭng kna Y‑Pêtrôs mtă mtăn kơ phung đăo yua klei brei diñu mă tŭ leh ya pioh ngă? Ya jing klei kñăm knhal tuč hĭn kơ bruă yua klei brei? Ya klei brei myang drei mă tŭ leh? Si diih dôk yua klei brei mơ̆ng Aê Diê čiăng mă bruă kơ Sang Aê Diê?
Grăp čô phung đăo tơdah tŭ jum leh Khua Yang leh anăn mâo Yang Mngăt Jăk dôk hlăm ai tiê mâo leh sơăi sa amâodah lu klei brei myang, amâo mâo ôh pô amâo mâo. Khua Yang brei klei pap kơ grăp čô pioh bi mguôp kdrêč rŭ mdơ̆ng Phung Sang Aê Diê leh anăn mpŭ mni kơ Aê Diê (I Kôrantô 14:12; Êphêsô 4:11-12). Ƀiădah lĕ, lu phung đăo amâo uêñ ôh kơ bruă tui duah leh anăn lŏ bi mđĭ klei brei myang Khua Yang bi mbha pioh ngă bruă. Kyuanăn, diñu ka thâo amâodah ka yua klei brei bi djŏ tui si klei kñăm Khua Yang čiăng leh anăn amâo ba boh tŭ dưn kơ Sang Aê Diê ôh.
Hlăm trăn Klei Aê Diê Blŭ anei, khua ƀĭng kna Y‑Pêtrôs iêô mthưr phung anak ƀuôn sang Aê Diê “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp” (êlan 10). Hlue si khua ƀĭng kna Y‑Pêtrôs, klei brei myang jing klei pap mơ̆ng Aê Diê bi mbha kơ phung anak Ñu. Grăp čô drei knŏng jing phung kiă kriê đơ mta klei pap Khua Yang brei leh anăn thâo yua bi jăk klei brei anăn pioh mă bruă kơ Khua Yang leh anăn kơ arăng. Tơdah grăp čô anak ƀuôn sang Aê Diê thâo tui duah leh anăn lŏ bi mđĭ hĭn klei brei myang Aê Diê bi mbha, snăn srăng lŏ mtrŭt hĭn jih jang mnuih mă bruă bi đru hdơ̆ng găp leh anăn bi êdah klei pap Aê Diê hlăm klei hdĭp grăp hruê.
Khua ƀĭng kna Y‑Pêtrôs lŏ mblang thiăm: “Hlei pô blŭ brei ñu blŭ msĕ si pô hưn Klei Aê Diê Blŭ. Hlei pô đru bruă arăng brei ñu mă bruă anăn hŏng klei ktang Aê Diê brei; čiăng kơ hlăm jih jang klei Aê Diê dưi mâo klei guh kơang hlăm Yêsu Krist ” (êlan 11). Tinei, ñu knŏng hưn mdah klei bi hmô kơ dua mta klei brei phŭn drei khăng ƀuh hlăm Phung Sang Aê Diê jing “mtô mblang” leh anăn “mă bruă”. Ƀiădah, adôk mâo lu mta klei brei myang mkăn khua ƀĭng kna Y‑Pôl răk leh mơh hlăm hră ñu čih mơĭt (Rôm 12:6-8; I Kôrantô 12:8-11; Êphêsô 4:11).
Mta klei drei mđing mĭn tinei jing, jih dua klei brei mtô mblang leh anăn mă bruă khua ƀĭng kna Y‑Pêtrôs hưn mdah jing mơ̆ng Khua Yang jao brei sơăi, kyuanăn pô ngă bruă brei knang kơ klei ktang Khua Yang “čiăng kơ hlăm jih jang klei Aê Diê dưi mâo klei guh kơang hlăm Yêsu Krist” (êlan 11). Tơdah drei thâo kral klei pap Khua Yang brei leh anăn hmiêt mkăp yua klei anăn pioh mă bruă kơ Sang Aê Diê snăn Ñu srăng thiăm brei klei pap leh anăn thiăm brei klei ktang, čiăng kơ drei dưi mă bruă mâo boh tŭ dưn. Ƀiădah bi mklăk wĭt, tơdah drei yua klei brei myang msĕ si sa mta klei thâo knhâo kơ hjăn pô leh anăn knŏng pioh mă bruă kơ hjăn pô snăn Khua Yang dưi lŏ sua mă wĭt klei brei anăn hbĭl Ñu čiăng.
Si ngă drei thâo kral leh anăn hmiêt mkăp yua jih jang klei pap Khua Yang brei pioh mă bruă kơ Khua Yang leh anăn kơ ayŏng adei drei mơ̆?
Wah lač: Ơ Khua Yang kâo khăp, bi mni kơ Khua Yang brei leh klei pap myang kơ kâo. Akâo kơ Khua Yang đru kâo thâo lŏ bi mđĭ hĭn klei brei anăn hlăm klei mă bruă kơ Khua Yang leh anăn kơ arăng pioh bi guh kơang anăn Ih leh anăn ba boh tŭ dưn kơ Sang Aê Diê.
Dlăng Klei Aê Diê Blŭ hlăm tlâo thŭn: Y‑Mika 2:6-4:2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
