I Petus 4:10-11
Nqe cim:
“Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus” (I Petus 4:10).
Lus nug rau sawvdaws xav:
– Timthawj Petus ntuas cov ntseeg siv tej koob hmoov lawv tau los ua dabtsi?
– Lub homphiaj kawg ntawm kev siv koob hmoov yog dabtsi?
– Peb txais tau tej koob hmoov sab ntsujplig twg lawm?
– Peb tabtom siv koob hmoov tus Tswv pub los ua haujlwm hauv tus Tswv tsev neeg licas?
Txhua tus ntseeg thaum txais yuav Tswv Yexus thiab tau Vaj Ntsujplig los kav lub siab puavleej tau pub muaj ib lossis ntau txoj koob hmoov sab ntsujplig, tsis muaj ib tug twg tsis tau dabtsi hlo li. Tus Tswv pub koob hmoov rau txhua tus lub homphiaj yog sib pab txhim kho Pawg Ntseeg thiab txhawb nqa Vajtswv (I Kauleethaus 14:12; Efexus 4:11-12). Tiamsis, muaj coob tug ntseeg tsis nrhiav thiab tsis nthuav dav tej koob hmoov tus Tswv pub los ua tus Tswv haujlwm. Vim li ntawd, lawv thiaj tsis paub lossis tsis siv tej koob hmoov sab ntsujplig kom raws tus Tswv lub homphiaj thiab tsis ua muaj nqis rau tus Tswv Pawg Ntseeg.
Nyob hauv ntu Vajluskub no, Timthawj Petus nqua hu tus Tswv cov menyuam hais tias “yuav tsum siv tej koob hmoov uas nej tau ntawd kom muaj nqis rau lwm tus” (nqe 10). Raws li Timthawj Petus, koob hmoov sab ntsujplig yog Vajtswv txoj koob hmoov pub dawb rau Nws cov menyuam. Peb txhua tus tsuas yog tus tub txib saibxyuas thiab siv tej koob hmoov ntawd los ua tus Tswv tes haujlwm thiab ua kom muaj nqis rau lwm tus xwb. Thaum tus Tswv cov menyuam txhua tus zeem paub thiab nthuav dav tej koob hmoov sab ntsujplig lawm, ces yuav txhawb tau sawvdaws txawj sib pab thiab qhia tshwm Vajtswv txoj koob hmoov nyob hauv lub neej txhua hnub.
Timthawj Petus hais ntxiv hais tias: “Tus uas qhia Vajtswv txojlus, nws yuav tsum qhia; tus uas pab ua haujlwm, nws yuav tsum siv nws lub dag lub zog uas Vajtswv pub rau nws, yog nej cov uas ntseeg Yexus Khetos ua li ntawd, nej yuav ua rau Vajtswv tau ntsejmuag” (nqe 11). Nyob ntawm no, Timthawj Petus hais txog ob yam koob hmoov tseemceeb uas peb pheej pom nyob hauv Pawg Ntseeg, ntawd yog “qhuab qhia” thiab “pab ua haujlwm”. Tiamsis, tseem tshuav lwm yam koob hmoov sab ntsujplig tau Timthawj Paulus hais tawm nyob hauv nws cov ntawv sau mus rau cov ntseeg (Loos 12:6-8; I Kauleethaus 12:8-11; Efexus 4:11).
Yam peb yuav tsum nco ntawm no yog, tag nrho ob yam koob hmoov qhuab qhia thiab pab ua haujlwm puavleej yog tus Tswv muab pub, yog li ntawd tus uas ua tej haujlwm no yuav tsum siv lub dagzog tus Tswv pub thiaj yuav “ua rau Vajtswv tau ntsejmuag” (nqe 11). Thaum peb zeem paub koob hmoov tus Tswv pub thiab txaus siab siv tej ntawd los ua tus Tswv tes haujlwm, ces nws yuav ntxiv koob hmoov thiab ntxiv dagzog rau peb yim hnub yim ua tau haujlwm tawg paj txi txiv. Tiamsis, yog peb siv tej koob hmoov sab ntsujplig zoo li tus kheej ib yam kev txawjntse thiab tsuas ua muaj nqis rau tus kheej xwb, ces tus Tswv yuav sau tej koob hmoov ntawd rov qab.
Thov Vajtswv,
Tus Tswv uas muaj kev hlub, thov ua Koj tsaug vim Koj pub koob hmoov sab ntsujplig rau nyuam yaus. Thov pab nyuam yaus paub nthuav dav tej koob hmoov sab ntsujplig los ua haujlwm rau Koj thiab lwm tus, kom Koj tau koob meej thiab muaj nqis rau Koj Pawg Ntseeg. Amees.
Peb puas zeem paub thiab txaus siab siv txhua yam koob hmoov tus Tswv pub los ua tus Tswv tes haujlwm thiab pab lwm tus lawm tau?
Nyeem Vajluskub hauv peb lub xyoo: Mikhas 2:6-4:2
Kênh Youtube BHKTHN:
