Khua Yang Bi Mbha Klei Brei Tui Si Ñu Čiăng – 1/4/2023

1327

 

Klei Aê Diê Blŭ: I Kôrantô 12:4-11

Êlan kliăng: “Jih jang klei brei anăn kbiă mơ̆ng sa Yang Mngăt Jăk anăn yơh, Pô bi mbha kơ grăp čô tui si Ñu čiăng” (I Kôrantô 12:11)

Klei êmuh ksiêm mĭn: Khua ƀĭng kna Y‑Pôl brei thâo, ya lu mta klei mâo hlăm Phung Sang Aê Diê leh anăn ya knŏng sa mta klei brei mđing mĭn? Ya klei ñu čiăng mtô lač tơdah kñăm lu blư̆ kơ boh blŭ “sa Yang Mngăt Jăk”? Si klei čiăng brei drei thâo kral leh anăn lŏ bi mđĭ klei brei Khua Yang bi mbha?

Khua ƀĭng kna Y‑Pôl čih hră anei mơĭt kơ Phung Sang Aê Diê Kôrantô êjai diñu dôk mâo klei bi kah phung. Kyuanăn, hlăm trăn anei ñu iêô mthưr klei bi mguôp sa hlăm asei mlei Yang Krist jing Phung Sang Aê Diê (I Kôrantô 12:12-31). Êlâo kơ mtô si mblang kơ asei mlei leh anăn kdrêč hlăm asei mlei Yang Krist, ñu čiăng kơ diñu thâo săng klă kơ klei brei myang Khua Yang brei kơ grăp čô (êlan 1).

Hlăm êlan 4-6, Khua ƀĭng kna Y‑Pôl yua dua boh blŭ bi mklăk lač kơ ênoh mrô, “lu”, leh anăn “sa” čiăng kñăm snei wăt tơdah hlăm Phung Sang Aê Diê mâo lu mnuih Khua Yang brei klei brei mdê mdê, ƀiădah knŏng mơ̆ng “sa Yang Mngăt Jăk”; mâo lu bruă jao mdê mdê, ƀiădah knŏng mâo sa Khua Yang Yêsu Krist; leh anăn wăt tơdah mâo lu bruă ngă mdê mdê, ƀiădah knŏng pioh kkuh mpŭ kơ hjăn sa Aê Diê yơh (êlan 4-6). Dơ̆ng mơ̆ng anăn, ñu blŭ klă “Yang Mngăt Jăk bi êdah kơ grăp čô klei dưi čiăng đru jih jang” (êlan 7). Wăt tơdah grăp čô phung đăo kơ Krist mâo klei brei mdê mdê, ƀiădah jih jang knŏng kơ sa klei kñăm čiăng pioh ba klei tŭ dưn mbĭt kơ bruă Sang Aê Diê, pioh rŭ mdơ̆ng Phung Sang Aê Diê leh anăn kkuh mpŭ kơ Aê Diê, amâo djŏ ôh kyua klei tŭ dưn kơ hjăn pô (I Kôrantô 14:12; Êphêsô 4:11-12).

Čuê tui tluôn, khua ƀĭng kna Y‑Pôl răk đa klei brei kơ grăp čô mă tŭ, ƀiădah ñu kñăm nanao kơ boh blŭ “sa Yang Mngăt Jăk” (êlan 8-9). Ti knhal tuč, ñu lŏ kñăm sa blư̆ snei: “Jih jang klei brei anăn kbiă mơ̆ng sa Yang Mngăt Jăk anăn yơh…” (êlan 11a). Kơ sa čô anei brei klei dưi blŭ hŏng klei thâo mĭn, kơ sa čô mkăn klei dưi thâo kral yang mdê mdê, kơ sa čô mkăn brei klei dưi bi hlao arăng, amâodah dưi ngă klei yuôm bhăn amâodah klei dưi hưn êlâo…, tui si klei čiăng mơ̆ng Yang Mngăt Jăk, Pô bi mbha klei brei (êlan 8-11).

Klei brei myang drei mă tŭ amâo djŏ ôh kyuadah drei mâo klei năng amâodah mâo klei čiăng, ƀiădah Khua Yang yơh pô čuăn bi mbha ya mta klei brei kơ hlei pô tui si Ñu čiăng (êlan 11b). Khua Yang mâo klei kñăm čiăng kơ klei hdĭp drei, leh anăn tơdah Ñu bi mbha klei brei myang, Ñu čiăng kơ drei yua pioh bi guh kơang kơ Anăn Ñu. Ƀiădah, tơdah drei yua klei brei Khua Yang bi mbha amâo djŏ tui si klei kñăm Khua Yang čiăng, bi mjhua klei brei kăp ngă klei bi kah phung, snăn Ñu dưi lŏ sua mă wĭt leh anăn brei kơ pô mkăn (Y‑Mathiơ 25:14-30). Brei grăp čô drei thâo kral leh anăn lŏ bi mđĭ hĭn klei brei Khua Yang bi mbha pioh ngă bruă kơ Khua Yang mđrăm mbĭt, đru rŭ mdơ̆ng leh anăn bi mđĭ Phung Sang Aê Diê.

Drei thâo kral ya mta klei brei myang Khua Yang bi mbha? Si ngă diih yua leh djŏ tui si klei Khua Yang čiăng mơ̆?

Wah lač: Ơ Khua Yang, bi mni kơ Khua Yang bi mbha leh klei brei myang kơ kâo tui si klei Ih čiăng wăt tơdah kâo amâo mâo klei năng ôh. Akâo kơ Khua Yang đru kâo thâo kral leh anăn yua klei brei Ama brei bi djŏ tui si klei kñăm čiăng, pioh ba klei tŭ dưn mbĭt kơ bruă Khua Yang.

Dlăng Klei Aê Diê Blŭ hlăm tlâo thŭn: Y‑Yôna 3:1-4:11

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTus Tswv Pub Koob Hmoov Raws Li Nws Pom Zoo – 1/4/2023
Bài tiếp theoChúa Ban Ân Tứ Theo Ý Ngài – 1/4/2023