I Kauleethaus 12:4-11
Nqe cim:
“Tiamsis txhua yam no puavleej yog tib tug Vaj Ntsujplig pub xwb; nws pub rau txhua tus nyias muaj nyias tswvyim raws li nws pom zoo pub” (I Kauleethaus 12:11).
Lus nug rau sawvdaws xav:
– Timthawj Paulus qhia paub muaj ntau yam dabtsi nyob hauv Pawg Ntseeg thiab yuav tsum cim nco tib yam twg?
– Nws xav qhia txog dabtsi thaum hais ntau zaus txog lo lus “tib tug Vaj Ntsujplig”?
– Peb yuav tsum zeem paub thiab ua kom nthuav dav tej koob hmoov sab ntsujplig licas?
Timthawj Paulus sau tsab ntawv no xa mus rau Pawg Ntseeg Kauleethaus thaum lawv tabtom muaj ntau kev sib faib ua pab ua pawg. Vim li ntawd, nyob hauv ntu Vajluskub no, nws thiaj nqua hu kom muaj kev koom ua ib lub siab nyob hauv Tus Cawmseej lub cev uas yog Pawg Ntseeg (I Kauleethaus 12:12-31). Ua ntej yuav qhia txog lub ntsiab ntawm Yexus Khetos lub cev uas muaj ntau yam sib koom, nws xav kom lawv paub tseeb meej txog tej koob hmoov sab ntsujplig uas tus Tswv muab pub rau txhua tus (nqe 1).
Nyob hauv nqe 4-6, Timthawj Paulus siv ob lo lus sib txawv hais txog qhov ntau qhov tsawg, xws li “nyias muaj nyias” lossis “nyias ua nyias” yog qhov ntau, thiab “tib tug” yog qhov tsawg, los qhia meej hais tias txawm Pawg Ntseeg muaj coob leej nyias muaj nyias koob hmoob sib txawv, los puavleej yog tib tug Vaj Ntsujplig pub xwb; nyias ua nyias ib tes haujlwm, tiamsis puavleej yog ua rau tib tug Tswv xwb; thiab nyias muaj nyias tswvyim ua haujlwm, tiamsis tej ntawd puavleej yog Vajtswv tib leeg pub xwb (nqe 4-6). Dhau ntawd, nws hais meej hais tias “Vaj Ntsujplig pub nyias muaj nyias tswvyim kom sawvdaws thiaj sib pab tau” (nqe 7). Txawm cov ntseeg tau pub nyias muaj nyias koob hmoov sib txawv, los txhua yam ntawd puavleej muaj homphiaj yog ua muaj nqis rau Vajtswv tes haujlwm, uas yog txhim kho Pawg Ntseeg thiab txhawb nqa Vajtswv, tsis yog ua muaj nqis rau ib tug tibneeg twg (I Kauleethaus 14:12; Efexus 4:11-12).
Txuas ntxiv, Timthawj Paulus hais txog qee yam koob hmoov uas cov ntseeg tau txais, tiamsis nws puavleej hais meej txog lo lus “tib tug Vaj Ntsujplig” (nqe 8-9). Thaum kawg, nws hais meej ib zaug ntxiv hais tias: “txhua yam no puavleej yog tib tug Vaj Ntsujplig pub xwb…” (nqe 11a). Tus no tau koob hmoov muaj tswvyim kawm txawj kawm ntse, tus tod ua tau tej txujci tseemceeb, tus nrad muaj kev ntseeg, lossis muaj hwjchim kho tau mob zoo, lossis txawj qhia Vajtswv txojlus…, raws li Vaj Ntsujplig tus uas pub koob hmoov lub siab nyiam (nqe 8-11).
Koob hmoov sab ntsujplig uas peb txais tau tsis yog tim peb tsimnyog tau lossis xav tau ces tau, tiamsis yog tus Tswv xav muab pub rau leejtwg nyob ntawm Nws xwb (nqe 11b). Tus Tswv muaj homphiaj rau peb lubneej, thiab Nws pub rau peb tau koob hmoov sab ntsujplig, Nws xav kom peb siv los ua rau Nws lub npe tau koobmeej. Tiamsis, yog peb tsis siv tej koob hmoov tus Tswv pub raws li Nws lub homphiaj, lam siv los ua rau tawg pab tawg pawg, ces tus Tswv muaj cai sau rov qab thiab muab pub rau lwm tus (Mathais 25:14-30). Peb txhua tus yuav tsum zeem paub thiab nthuav dav tej koob hmoov uas tus Tswv pub, koom tes ua Nws haujlwm, txhim kho thiab ua rau Pawg Ntseeg huamvam.
Thov Vajtswv,
Tus Tswv, nyuam yaus ua Koj tsaug vim Koj pub koob hmoov sab ntsujplig rau nyuam yaus raws li Koj lub siab nyiam txawm yog nyuam yaus tsis tsimnyog tau tej ntawd. Thov pab nyuam yaus zeem paub thiab siv tej koob hmoov Koj pub raws Koj lub homphiaj kom muaj nqis rau Koj tes haujlwm. Amees.
Peb zeem paub koob hmoov tus Tswv pub rau peb yog dabtsi lawm tau? Peb puas tau siv raws li tus Tswv lub siab nyiam lawm?
Nyeem Vajluskub hauv peb lub xyoo: Yaunas 3:1-4:11
Kênh Youtube BHKTHN:
