Klei Aê Diê Blŭ: Kôlôs 3:12-17
Êlan kliăng: “Ƀiădah êgao hĭn kơ jih klei anăn, brei diih hơô klei khăp, kyuadah klei khăp bi mguôp jih jang mnơ̆ng hlăm klei jăk klă.” (Kôlôs 3:14)
Klei êmuh ksiêm mĭn: Ya mta klei khua ƀĭng kna Y-Pôl mñă kơ phung anak ƀuôn sang Aê Diê? Si klei anei djŏ hŏng knhuah hdĭp hlăm gŏ sang? Si gŏ sang drei dôk hdĭp djŏ tui si Klei Aê Diê Blŭ?
Khua ƀĭng kna Y-Pôl brei sa klei mtă mtăn sĭt klă kơ klei hdĭp sa čô đăo kơ Aê Diê hlăm ƀuôn sang, boh nik nak hlăm gŏ sang. Ñu mñă kơ drei jing “phung Aê Diê ruah leh, jing phung doh jăk leh anăn phung Aê Diê khăp”. Kyuanăn, klei hdĭp mrâo hlăm Yang Krist brei bi êdah hlăm klei hdĭp dôk dơ̆ng ƀơ̆ng huă hdơ̆ng pô: “hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr” (êlan 12).
Gŏ sang yơh jing anôk tal êlâo hĭn lông dlăng klei đăo drei. Anôk anei yơh si knuih sĭt drei srăng bi êdah klă. Kyuanăn, Khua ƀĭng kna Y-Pôl brei ƀuh klei hdĭp kpă ênô leh anăn thâo khăp amâo kčưm dơ̆ng hŏng klei bhiăn ôh, ƀiădah kčưm dơ̆ng hŏng klei pap. Drei khăp, drei pap brei kyuadah drei mă tŭ leh klei khăp, klei pap brei. Tơdah grăp čô hlăm gŏ sang thâo kral drei pô jing dŏ Aê Diê leh anăn thâo Ñu khăp kơ drei amâo mâo mta klei čoh čuăn ôh, snăn jih jang klei bi mguôp kčưm dơ̆ng bi mlih yơh. Amâo mâo hlei pô lŏ hưn kơ ênoh yuôm ñu pô ôh; hrô kơ klei anăn, jih jang mnuih hriăm hdĭp hlăm klei bi pap brei hdơ̆ng pô.
Sa mta phŭn amâo dưi kƀah ôh hlăm sa boh gŏ sang, anăn jing klei bi pap brei. “Bi tŭ hdơ̆ng diih, leh anăn tơdah sa čô mâo klei hŏng mnuih mkăn, bi pap brei hdơ̆ng diih. Msĕ si Khua Yang pap brei kơ diih leh, brei diih pap brei msĕ mơh” (êlan 13). Grăp boh gŏ sang mâo sơăi klei amâo thâo bi djŏ leh anăn klei bi êka ai tiê. Tơdah kƀah klei bi pap brei, klei ăl phĭ đuôm ai ƀrư̆ ƀrư̆ srăng bi rai klei bi mguôp. Ƀiădah tơdah bi pap brei, Klei Mrâo Mrang Jăk srăng hdĭp wăt hlăm klei hdĭp grăp hruê. Êlâo hĭn kơ jih jang klei, ñu kñăm: “Brei diih hơô klei khăp, kyuadah klei khăp bi mguôp jih jang mnơ̆ng hlăm klei jăk klă” (êlan 14). Klei khăp jing atur čiăng kơ gŏ sang dưi dôk kjăp. Klei Aê Diê čiăng jing klei kpă ênô bi êdah hŏng klei khăp. Boh tŭ dưn jing gŏ sang mâo klei êđăp ênang hlăm Khua Yang (êlan 15). Êđăp ênang hlăm gŏ sang amâo djŏ ôh gŏ sang anăn amâo mâo klei amâo thâo bi djŏ, ƀiădah jing brei Yang Krist atăt gai jih hdră êlan klei drei wĭt lač, wĭt ngă. Tơdah mâo Khua Yang jing khua kơ klei hdĭp, klei ăl ngêñ srăng hrŏ trŭn, ai tiê mgao dưi bi êdu êun.
Sa boh gŏ sang kpă ênô jing sa gŏ sang dưm Klei Aê Diê Blŭ jing phŭn: hrăm mbĭt dlăng Klei Aê Diê Blŭ, hrăm mbĭt wah lač. Khua ƀĭng kna Y-Pôl klah čŭn: “Ya mta klei diih ngă, hlăm klei blŭ amâodah bruă ngă, ngă bĕ jih hlăm anăn Khua Yang Yêsu, leh anăn bi mni kơ Aê Diê Ama hlăm Ñu” (êlan 17). Tơdah grăp boh blŭ, klei čuăn ngă leh anăn klei kiă kriê dlăng ba, ngă jih kyua Khua Yang sơăi, gŏ sang anăn srăng jing anôk kkuh mpŭ hdĭp. Hdĭp kpă ênô leh anăn thâo khăp amâo djŏ kyua čiăng truh kơ klei jăk klă kluôm ôh, ƀiădah čiăng kơ Yang Krist bi mlih hlăm djăp mta klei bi mguôp đơ điêt grăp hruê.
Tơdah drei brei klei thâo pap hrô kơ klei ngă khăng ktang, klei bi pap brei hrô kơ klei ăl phĭ đuôm ai, leh anăn klei khăp atăt gai jih jang klei bi mguôp, gŏ sang drei srăng bi ktlă klei mngač Ƀuôn Ala Mtao Aê Diê. Leh anăn Klei Mrâo Mrang Jăk kčưm dơ̆ng mơ̆ng gŏ sang drei pô yơh.
Ya mta klei brei ƀuh gŏ sang drei jing anôk bi sĭt knhuah hdĭp mrâo hlăm Khua Yang?
Wah lač: Ơ Khua Yang, akâo Ih đru kâo hdĭp kpă ênô leh anăn thâo bi khăp hlăm gŏ sang kâo pô. Brei gŏ sang kâo jing anôk bi êdah klei pap, klei thâo bi pap brei leh anăn klei êđăp ênang Yang Krist grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 2-3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
