Kôlôssê 3:12-17
“Kăl tơpă tơdrong ‘mêm mơnat dih băl; dah bơ̆n đei tơdrong ‘mêm mơnat dih băl bơih, bơ̆n gô ‘bôh tôm tơdrong bơ̆n pơm ‘lơ̆ng” (Kôlôssê 3:14).
Nơ̆r jet tơchĕng pơwao:
– ‘Bok Pôl tơ’blŏk kơ kon pơlei Kră Yang tơdrong kiơ?
– Tơdrong âu sư ‘bơm hăm tơdrong arih lăm hnam dơnŏ thoi yơ?
– Hnam dơnŏ lu bơ̆n arih dih băl kiơ̆ kơ Nơ̆r Kră Yang thoi yơ?
‘Bok Pôl đei pơma tơ’bôh dôm nơ̆r bơtho tơpă lăm chăl arih bơngai lui kơ Kră Yang lăm kon pơlei pơla, mă loi sư lăm hnam dơnŏ. Sư đei tơ’blŏk kơ lu bơ̆n jơ̆ bơngai ” ‘Bok Kei-Dei ‘mêm mơnat Sư rơih iŏk bơ̆n, wă kơ bơ̆n jing kon Sư; na bơ̆n athei băt ‘mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt”. Yua thoi noh, chăl arih lăm ‘Bok Krist athei pơm tơ’bôh đơ̆ng tơdrong arih sa dih băl: “. Na bơ̆n athei băt ‘mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt” (trong 12).
Hnam dơnŏ tơm ‘noh jơ̆ anih blŭng a đon lui lu bơ̆n hlôi đêl bơih. ’Nâu bơih tơdrong arih tơpă lăm lu bơ̆n mă đei pơm tơ’bôh hơđăl nhen. Yua thoi noh, ‘Bok Pôl đei tơ’bôh tơdrong arih ‘lơ̆ng tơpăt păng ‘mêm mơnat ưh kơ sĭ pơtơm hăm tơdrong juăt, mă-lei pơtơm hăm tơdrong mơnat ăn đĕch. Lu bơ̆n ‘mêm mơnat , huay kơ jô̆ yo yua kơ đei ‘mêm mơnat, huay pă jô̆ yo… Kơplah rim ‘nu lăm hnam dơnŏ băt kơ bơ̆n gah ‘Bok Kei-Dei bơih păng Sư ‘mêm kơ bơ̆n ưh kơ ngĕ kơ đơ̆ng bơ̆n pơm ‘lơ̆ng, dôm tơdrong bơ̆n tơ’bưh pơtơm blŭng a đei tơplih. Ưh kơ đei bu khan pơm tơ’bôh tơdrong; tơplih kơ tơdrong gĭt bơ̆n kơdih; tơplih kơ tơdrong noh, rim ‘nu pơhrăm trong tơdrong arih lăm tơdrong ‘mêm Kră Yang ăn kơ bơ̆n tơdrong ‘mêm dih băl.
Minh tơdrong kăl ưh kơ layơ kơ’bah lăm hnam dơ̆nŏ ‘noh huay kơ jô̆ yo. “ Kră Yang Yêsu ưh pă jô̆ yo kơ bơ̆n bơih, na bơ̆n kư̆m lei-lăi ‘nĕ kơ jô̆ yo kơ buăl bơ̆n” (trong 13). Hnam dơnŏ ayơ kư̆m đei ưh kơ lei-lăi đei ưh kơ hiôk băl. Tơdah kơ’bah kơ tơdrong huay kơ jô̆ yo, lei tơdrong ơh sơ’ngon lăm jơhngơ̆m gô pơrăm tơdrong pôm jơhngơ̆m đon. Mă-lei tơdah bơ̆n pơm tơpă tơdrong huay kơ jô̆ yo. Tơdrong ’ Nao ‘Lơ̆ng gơh đei arih hloi lăm chăl arih rim năr. Adrol hloh, sư đei pơma: “Kăl tơpă tơdrong .mêm mơnat dih băl; tơdah bơ̆n đei tơdrong ‘mêm mơnat dih băl bơih, bơ̆n gô ‘bôh tơdrong bơ̆n pơm ‘lơ̆ng” (trong 14). Tơdrong ‘mêm mơnat noh jơ̆ tơm wă kơ bơ̆n bơwei hnam dơnŏ kơjăp. Tơdrong Kră Yang wă lăp đon ‘noh jơ̆ tơdrong ‘lơ̆ng tơpăt mă đei tơ’bôh đơ̆ng tơdrong ‘mêm mơnat. Đei yua noh hnam dơnŏ đei hiôk hian lăm Kră yang (trong 15). Hiôk hian lăm hnam dơnŏ ưh kơ sĭ khan huay kơ hơtŭt băl ôh, mă-lei ăn kơ ‘Bok krist chông anhăk tơdrong kiơ wă kơ lu bơ̆n rok kiơ̆. Kơplah sư pơm Yŏng Tơ’ngla, tơdrong blĕk ơh gô rai dă ‘biơ̆, tơdrong pơ ang jing iŏk đon ala.
Minh pôm hnam dơnŏ ‘lơ̆ng tơpăt ‘noh jơ̆ hnam dơnŏ dan Nơ̆r ‘Bok Kei-Dei pơm tơm: Wang đŏk Nơ̆r ‘Bok Kei-Dei, wang krao khan. ‘Bok Pôl pơma pơtôch nơ̆r: “Mă dôm tơdrong kiơ kiơ bơ̆n wă pơma dah wă jang , bơ̆n thei pơma pơjao kơ Kră Yang Yêsu hăm gơnang kơ Sư wă bơnê kơ ‘Bă Tơm bơ̆n ‘Bok Kei-Dei” (trong 17). Kơplah rim nơ̆r pơma, wă pơm păng bơ̆jang wei rong mă đei pơm keh yua kơ Kră Yang, hnam dơnŏ jing anih akŭm kơkuh arih pran. Arih ‘lơ̆ng tơpăt păng ‘mêm mơnat ưh kơsĭ khan ‘lơ̆ng tôm hloi bơih ôh, mă-lei ăn kơ ‘Bok Krist tơplih đơ̆ng tơdrong tơ’bưh iĕ rim năr.
Kơplah lu bơ̆n lê̆ kơ jơhngơ̆m mơnat tơplih mă tơpă, huay kơ jô̆ yo tơplih kơ chhŭr nuih păng tơdrong ‘mêm mơnat chông anhăk dôm tơdrong đei tơ’bưh, hnam dơnŏ lu bơ̆n pơm tơ’bôh dêh char ‘Bok Kei-Dei. Păng Tơdrong ‘Nao ‘Lơ̆ng pơtơm đơ̆ng tơdrong hiôk chơt lu bơ̆n.
Ơ Kră Yang, apinh tơgŭm inh arih ‘lơ̆ng tơpăt păng ‘mêm mơnat lăm hnam dơnŏ inh kơdih. Apinh ăn kơ hnam dơnŏ inh jing anih pơm tơ’bôh tơdrong mơnat ăn đĕch, tơdrong huay kơ jô̆ yo păng hiôk hian đơ̆ng ‘Bok Krist rim năr. Krao khan yua anăn Kră Yang Yêsu Krist, Amen.
Tơdrong kiơ wă tơ’bôh kơ hnam dơnŏ lu bơ̆n đei pơm hloi tơdrong arih ‘nao lăm Kră Yang?
Đŏk Sơ̆p Hla ar ‘Bok Kei-Dei lăm pêng sơnăm: Sachari 2-3
Kênh Youtube BHKTHN:
