I Pêtrôs 2:13-17
“Bơ̆n athei chu yom kơ lu bơngai mă pơgơ̆r bơ̆n, na đe băt kơ ư-ang Kră Yang Yêsu Krist. Tơ̆ng bơ̆n ưh kơ pơm ‘lơ̆ng, ưh kơ băt phep, đe ưh kơ băt kơ bơ̆n bơngai ‘lơ̆ng ôh. Bơ̆n athei chu ‘bok pơtao tơm yua kơ sư pơgơ̆r đĭ đăng. Păng bơ̆n kư̆m athei chu yom kơ lu ‘bok kuan tih mơ̆n…” (I Pêtrôs 2:13-14a)
Nơ̆r jet tơchĕng pơwao:
– Lu bơngai lui kăl kơ pơm tơdrong kiơ hăm lu bơngai pơgơ̆r? yua kơ kiơ?
– Lăng kơ dih bơ̆n nhen thoi đĭch ‘Bok Kei-Dei kăl kơ arih thoi yơ?
– Pơm thoi yơ wă kơ bơ̆n jang keh tơdrong jang hăm lu bơngai pơgơ̆r, mă lei kŭm trŏ thoi minh ‘nu Bơngai kon Kră Yang?
Mă khan lu bơngai pơgơ̆r đơ̆ng kon bơngai bơ̆n pôk tơ iung mă lei lu sư jơ̆ ala kơ tơdrong ‘Bok Kei-Dei pơgơ̆r “Đĭ-đăng kơ bơ̆n athei chu yom kơ bơngai mă pơgơ̆r bơ̆n. Tơ̆ng ‘Bok Kei-Dei ưh kơ ăn, ưh kơ đei bu gơh pơgơ̆r. Đĭ-đăng lu bơngai pơgơ̆r đơ̆ng ‘Bok Kei-Dei ăn ngăl.” (Rôm 13:1). Thoi noh ‘bok Pêtrôs athei bơngai lui, “Bơ̆n athei chu yom kơ lu bơngai mă pơgơ̆r bơ̆n, na đe băt kơ ư-ang Kră Yang Yêsu Krist. Tơ̆ng bơ̆n ưh kơ pơm ‘lơ̆ng, ưh kơ băt phep, đe ưh kơ băt kơ bơ̆n bơngai ‘lơ̆ng ôh. Bơ̆n athei chu ‘bok pơtao tơm yua kơ sư pơgơ̆r đĭ-đăng” (I Pêtrôs 2:13). Lăm dêh char mă bơ̆n arih bơ̆n kon pơlei pơla kăl kơ arih kiơ̆ thoi khôi juăt teh đak đei hơmet ăn, yua kơ kơnhăm lu bơngai pơgơ̆r noh jơ̆ “wă rôp phak bơngai pơm kơnê̆ na pơ ư kơ lu bơngai mă pơm ‘lơ̆ng” (trong 14). Mălei, hăm minh ‘bar ‘nu bơngai kơnh phŏ tơdrong athei đơ̆ng bơngai pơgơ̆r noh jơ̆ tơplơ̆ kơ tơdrong lui, na bơ̆n kăl kơ pơlen lăng ‘bơ̆t anăp ‘Bok Kei-Dei bơ̆n wă mơ̆ng nơ̆r kon bơngai lei mă mơ̆ng nơ̆r ‘Bok Kei-Dei (Tơdrong jang 4:19). Lu bơ̆n mă minh ‘nu kon pơlei arih ‘lơ̆ng, lu bơ̆n gô pơgăn tơdrong đe roi ưh kơ ‘lơ̆ng kơ Khŭl Bơngai Lui, wă kơ bơngai nai hoei kơ lăng ưh kơ ‘lơ̆ng gah tơdrong lui (trong 15).
Lu bơngai lui kăl kơ băt “bơ̆n jơ̆ đĭch đam ‘Bok Kei-Dei”, yua kơ ‘Bok Kei-Dei đei dŏng bơ̆n păng ăn kơ bơ̆n đei tơdrong rơngei, mă lei “nĕ kơ ăn tơdrong rơngei ‘noh pơm che klâp lê̆ tơdrong pơm kơnê̆” na thei weh đơ̆ng tơdrong pơm kơnê̆, ưh kơ pơm kiơ̆ kơ sĕch akar (trong 16). Thoi noh, wă kơ jang keh hăm bơngai pơgơ̆r, hăm pơm trŏ thoi minh ‘nu kon ‘Bok Kei-Dei, rim kơ bơngai lui kăl kơ băt “Bơ̆n athei pơhiôk jơhngơ̆m đe ling-lang, băt ‘mêm mơnat kơ lu ‘nhŏng oh bơngai lui, chu kơ ‘Bok Kei-Dei hli kơ bơ̆n pơm ưh kơ lăp kơ Sư păng bơ̆n athei chu yom kơ ‘bok pơtao tơm mơ̆n.” (I Pêtrôs 2:17). Mă mônh, athei băt gĭt păng ‘mêm yom kơ đĭ đăng bơngai, mă khan ‘lơ̆p ‘lŏ, mă khan bơngai jang tih iĕ, yua kơ đĭ đăng bơngai noh jơ̆ rup ‘Bok Kei-Dei ngăl păng đơ̆ng ‘Bok Kei-Dei pơjing. Mă ‘bar, lăm tơduă bơngai lui kăl kơ đei tơdrong ‘mêm yua kơ lu bơ̆n đei “đơ̆ng minh ‘nu ‘Bă pơjing bơ̆n” (Hêbơrơ 2:11). Mă pêng, lu bơngai lui kăl kơ hli yom kơ Kră Yang, Kră Yang mă tih hloh kơ lu bơngai pơgơ̆r lăm teh đak âu, yua kơ “Băt hli yom kơ Kră Yang, noh tơm tơdrong gơh hơgei; Băt hlôh kơ Kră Yang Rơgoh, noh boih tơdrong hlôh wao” (Pơđơ̆k 9:10). Mă puăn, hăm lu bơngai pơgơ̆r lu bơ̆n kăl kơ tơ’bưh hăm tơdrong pơyom, “yua kơ Kră Yang” ‘noh kŭm pơm ăn kơ ‘Bok Kei-Dei lăp đon.
Apinh ‘Bok Kei-Dei ăn kơ bơ̆n đei tơdrong gơh hơgei đơ̆ng Kră Yang wă kơ pơm minh ‘nu bơngai trŏ thoi teh đak lăp đon hoei kơ ‘bơm lăm tơdrong teh đak hăm hoei kơ pơm glăi hăm tơdrong juăt ‘Bok Kei-Dei wă kơ chăl arih bơ̆n ư ang anăn Kră Yang tơ’ngla mă bơ̆n oei kơ kuh.
Ơ Kră Yang, inh ư-ang kơ anăn Ih mă tih hloh. Inh bơnê kơ Ih yua kơ Ih dŏng pơklaih inh păng ăn kơ inh arih đei tơdrong rơngei. Apinh Ih ling lang tơgŭm Inh wă kơ arih rơngei lăm Ih wă kơ Ih lăp đon păng kon bơngai kŭm lăp đon mơ̆n, wă kơ inh tơbôh chăl arih hli yom kơ Ih, păng yua kơ Ih na pơyom kơ lu bơngai pơgơ̆r. Yua anăn Kră Yang Yêsu Krist. Amen
Tơdrong kiơ tơ’blŏk ăn kơ bơ̆n ‘blŏk khan bơ̆n jơ̆ đĭch đam ‘Bok Kei-Dei?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Tơdrong Jang 6
Kênh Youtube BHKTHN:
