Klei Aê Diê Blŭ: I Y-Pêtrôs 2:13-17
Êlan kliăng: “Kyua Khua Yang, brei diih gưt jih phung khua mnuih mkŏ mjing leh, thâodah kơ mtao jing pô prŏng hĭn, amâodah kơ khua prŏng…” (I Y-Pêtrôs 2:13-14a)
Klei êmuh ksiêm mĭn: Ya bruă klam phung đăo kơ Krist mâo hŏng phung khua kiă kriê? Ya ngă? Si srăng hdĭp tơdah drei yap drei jing phung dĭng buăl Aê Diê? Si srăng ngă čiăng kơ drei dưi bi leh bruă klam hŏng phung khua kiă kriê, êjai anăn drei ăt jing năng mơh hŏng klei jing phung anak ƀuôn sang Aê Diê?
Wăt tơdah phung khua kiă kriê kbiă mơ̆ng mnuih mkŏ mjing dưn, ƀiădah diñu ăt dôk ti gŭ klei Aê Diê kiă kriê mơh “kyuadah amâo mâo ôh klei dưi kiă kriê amâo kbiă hriê mơ̆ng Aê Diê, leh anăn klei dưi kiă kriê Aê Diê sơăi mjing leh” (Rôm 13:1). Kyuanăn, Khua ƀĭng kna Y-Pêtrôs mtă kơ phung đăo kơ Krist snei, “Kyua Khua Yang, brei diih gưt jih phung khua mnuih mkŏ mjing leh, thâodah kơ mtao jing pô prŏng hĭn, amâodah kơ khua prŏng…” (êlan 13-14). Jing phung ƀuôn sang kơ sa boh čar, jih jang mnuih srăng hdĭp leh anăn ngă bruă djŏ tui si klei bhiăn, kyuadah klei phung khua kiă kriê kñăm čiăng knhal tuč jing “bi kmhal phung ngă klei jhat leh anăn bi mni kơ phung ngă klei jăk” (êlan 14). Ƀiădah lĕ, bi hŏng đa đa mnuih, hŏng klei mtrŭn bi klăk hŏng klei đăo leh anăn klei kpă ênô phung đăo kơ Krist, brei drei ksiêm dlăng, ti anăp Aê Diê, gưt kơ mnuih amâodah gưt kơ Aê Diê (Bruă Phung Khua Ƀĭng Kna 4:19). Tơdah jing mnuih ƀuôn sang jăk, drei srăng dưi mkhư̆ mgang klei arăng mčeh luar bi kdơ̆ng hŏng phung đăo kơ Krist, mơ̆ng anăn phung amâo đăo ôh srăng čiăng hmư̆ Klei Mrâo Mrang Jăk (êlan 15).
Brei phung đăo kơ Krist hdơr, drei jing “hlŭn kơ Aê Diê”, kyuadah Khua Yang bi tui drei leh, leh anăn brei kơ drei mâo klei êngiê, “đăm yua ôh klei êngiê jing mnơ̆ng mdăp klei jhat”, ƀiădah brei drei răng kriê drei pô mơ̆ng klei êngiê ngă soh, amâo ngă tui si klei kđeh tluh ôh (êlan 16). Kyuanăn, čiăng bi leh bruă klam hŏng phung khua kiă kriê, leh anăn năng mơh hŏng klei jing phung ƀuôn sang Aê Diê, brei grăp čô phung đăo hdơr “Mpŭ bĕ kơ jih jang mnuih. Khăp bĕ kơ phung ayŏng adei đăo. Huĭ mpŭ bĕ kơ Aê Diê. Mpŭ bĕ kơ mtao” (êlan 17). Tal sa, brei drei mpŭ leh anăn khăp kơ jih jang mnuih, wăt kơ phung mnuih khua wăt kơ phung hđeh điêt, măng ai hlei digơ̆ jing, kyuadah mnuih jing mnơ̆ng Aê Diê hrih leh tui si rup Ñu pô. Tal dua, ti krah phung đăo, jing ayŏng adei hlăm klei đăo kơ Yêsu Krist, brei drei mâo klei khăp, kyuadah jih jang drei “ kbiă hriê mơ̆ng sa čô Ama” (Hêbrơ 2:11). Tal tlâo, phung đăo kơ Krist srăng huĭ mpŭ kơ Aê Diê, Pô Dlông Hĭn kơ klei phung mnuih kiă kriê, kyuadah “Klei huĭ mpŭ kơ Yêhôwa jing klei kčưm kơ klei thâo mĭn, leh anăn klei thâo kral Pô Doh Jăk jing klei thâo săng” (Klei Bi Hriêng 9:10). Tal pă, brei drei mpŭ kơ phung khua kiă kriê, anăn ăt jing bruă ngă “kyua Khua Yang” mơh, leh anăn bi mơak kơ Ñu.
Akâo Khua Yang đru drei mâo klei thâo mĭn mơ̆ng Ñu čiăng dưi bi leh bruă klam kơ sa čô mnuih ƀuôn sang ƀiădah amâo ngă soh hŏng klei bhiăn phung đăo kơ Krist ôh, čiăng kơ klei hdĭp drei bi guh kơang kơ Aê Diê, Pô drei kkuh mpŭ.
Ya mnơ̆ng brei drei hdơr nanao kơ drei jing hlŭn kơ Aê Diê?
Wah lač: Ơ Khua Yang, kâo mpŭ mni kơ Ih jing Pô Prŏng Hĭn, kâo bi mni kơ Ih bi tui kâo leh, leh anăn brei kơ kâo mâo klei êngiê. Akâo Khua Yang đru kâo hdĭp nanao hŏng klei êngiê bi mơak kơ Aê Diê leh anăn kơ mnuih, bi êdah klei hdĭp huĭ mpŭ kơ Khua Yang, kyua Khua Yang, mpŭ kơ phung khua kiă kriê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
