II Hơ’mon 30:15-16
“Bơ̆n adrin jang tơdrong Kră Yang tôch bơneh kơ bơ̆n jang.” (Rôm 12:11)
Nơ̆r jet tơchĕng pơwao:
– Yua kơ kiơ lu ‘bok soi păng bơngai Lêwi ‘bôh mơlâu?
– Lu sư pơm kiơ hloi?
– Lu bơ̆n wă pơm kiơ kơplah bơ̆n ‘bôh mơlâu yua kơ bơ̆n kơdih rơdu rơmơ̆n na ‘nhŏng mŏ oh bơ̆n arih pơm ‘lơ̆ng, ‘mêm mơnat dah hơlăng hơmrah?
Sơ̆p Hla bơar nơ̆r ‘Bok Kei-Dei lăm chăl kơđeh ‘nâu roi gah Giĕng Năm Brih lăm jơhnơr Pơtao Hesekia lơ sơnăm ưh kơ đei pơjing tơ Isơrael păng dêh Juđa. Lăm mơjĭt puăn khei ‘bar kiơ̆ kơ bơngai Juđê tơdă hơmet đe ‘bet triu pơm Giĕng Năm Brih kiơ̆ kơ nơ̆r Kră Yang Lĕch đơ̆ng Êyiptơ chăl 12, Kră Yang ‘Bok Kei-Dei đei pơjing păng athei kon pơlei bơwei Giĕng Năm Brih rim sơnăm wă kơ ‘blŏk đêl dôm tơdrong kiơ mă Kră Yang đei dŏng lu sư chông lu sư lĕch đơ̆ng dêh Êyiptơ thoi noh Pơtao Hesekia wă kơ kon pơlei pơm kiơ̆ Nơ̆r Kră Yang (Jô̆ bơngai 9:13). Mă trŏ sư, athei pơm Giĕng Năm Brih lăm năr mơjĭt puăn khei mônh ră mălei yua kơ kơplah noh ưh tam mă tôm ‘bok soi hơmet akâu kơdih rơgoh (II Hơ’mon 30:13). Păng kon pơlei tam mă năm akŭm tơ Jêrusalem kơlih kơ thoi ei na pơtao păng bơngai wei lăng hăm đĭ đăng kon pơlei oei tơ Jêrusalem pơđâu dih băl păng wă pơm Giĕng Năm Brih lăm khei ‘bar. Thoi ei, lu sư kư̆m pơm kiơ̆ tơdrong juăt Kră Yang gah lu bơngai mă năm pơm giĕng ưh kơ trŏ năr noh yua kơ đei tơdrong tơpă (Jô̆ bơngai 9:11).
Kơplah ‘bôh jơhngơ̆m kon pơlei adrin tơpă, ‘maih pơm kiơ̆ nơ̆r Kră Yang wă pơm Giĕng Năm Brih, dôm lu ‘bok soi păng bơngai Lêwi pơhiơ̆ ưh kơ jah hơmet akâu kơdih rơgoh kiơ̆ kơ đei hơgăt, lu sư mơlâu. Lu sư hơmet akâu kơdih mă rơgoh păng anhăk lu tơmam soi ‘buh đơ̆ng kon pơlei mơ̆t lăm Hnam Akŭm. Lu sư dơ̆ng ‘bơ̆t anih lu sư kơdih, iŏk pham đơ̆ng bơngai Lêwi na tơtreh. Lăm kon pơlei kư̆m oei đei lơ bơngai tam mă hơmet akâu kơdih rơgoh thoi noh ưh kơ gơh wă ‘bet kon triu, kơlih kơ thoi ei lu bơngai Lêwi athei ‘bet pơlôch kon triu mă khă noh ưh kơ trŏ tơdrong jang lu sư.
Jơhngơ̆m lu kon pơlei adrin na pơm rơngơp jơhngơ̆m lu ‘bok soi păng bơngai Lêwi lăm kơplah jơ noh. Đơ̆ng mơlâu ră, lu sư tơbral păng adrin bơ̆jang kơ Kră Yang ưh kơsĭ lu sư lăp pơm keh tơdrong jang lu sư đĕch na kư̆m jang đĭ jơhngơ̆m păng jang hloh kơ tơdrong jang lu sư dơ̆ng thoi noh đei hiơ̆k jang keh lơ tơdrong jang gĭt kăl lăm năr Giĕng ‘nâu. Phŏ phŏ bơ̆n oei đei mơn ưh kơ hiơ̆k, rơdu lăm tơdrong bơ̆jang kơ Kră Yang dah mă ưh kơ hiơ̆k ră roi gah Kră Yang. Kơplah bơ̆n ‘bôh lu ‘nhŏng oh bơ̆n adrin ră roi Tơdrong ‘Nao ‘Lơ̆ng lei na phŏ lu bơ̆n kư̆m đei jơhngơ̆m gar dah mă ưh kơ hiơ̆k dơ̆ng yua kơ bơ̆n khan ‘noh ưh kơ trŏ kơ tơdrong jang bơ̆n.
Kră Yang wă kơ bơ̆n “’bôh mơlâu” thoi lu ‘bok soi păng lu bơngai Lêwi ‘nâu păng tơbral hơmet wă adrin pơm kiơ̆ nơ̆r Kră Yang tơtă đơ̆ng Kră Yang păng đĭ jơhgnơ̆m bơ̆jang kơ Sư.
Kơkuh kơ Ih Kră Yang, apinh Ih ăn kơ inh băt achăng lê̆ tơdrong mă juăt kơ ưh kơ hiơ̆k na đei jơhgnơ̆m adrin bơ̆jang kơ Kră Yang ling lang păng pơm kơdranh gah Ih. Apinh Ih ăn kơ inh băt hŏk pơhrăm kiơ̆ kơmĭl lu bơngai đei jơhngơ̆m adrin lăm Hnam akŭm, krao khan yua anăn Kră Yang Yêsu Krist, Amen!
Bơ̆n hăm mơn mơlâu gah tơdrong kiơ kơplah lăng ‘bôh tơdrong adrin đơ̆ng bơngai nai ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 7
Kênh Youtube BHKTHN:
